Vilinga Via Vapostolo 2:1-47
2 Ha litangua lia Cilika ca Pentekoste, cikungulukilo cose ca kele ha cihela cimolika.
2 Va tungumuke, muilu mua tundile muyoyo ua kama ngue luhundzi luli na kuhuhua. Kaha muyoyo uaco ua zivikile mu ndzivo yose i vakele.
3 Kaha talenu! Va muene tumilengi tua tuhia tua kulifua na vindaka kaha tumilengi tuaco tua lisanduokele na kutongama ha muntu ku muntu.
4 Ngeci va sulile na sipilitu santu na kuputuka ku handeka malimi a kuliseza-seza ngue muze sipilitu ya va kuasele.
5 Ha ntsimbu ize, vaYundeya vose vaze vakele naku lemesa Njambi, va tundile ku vifuti via ku liseza-seza via ha mavu, vakele mu Yelusalema.
6 Ngoco vene, mu vavuile uze muyoyo, mbunga yose ya likunguluile hamo kaha va likomokelele mua kama muomu muntu ku muntu uavuile vandongesi va handeka mu lilimi liendi.
7 Mua vusunga vene, va likomokelele mua kama naku handeka nguavo: “Talenu! Ava vose vali naku handeka nkuma kati vakua Ngalileya ni?
8 Vati honi muntu ku muntu hakati ketu tuli naku vevua mu malimi etu a cisemua?
9 Muomu hakati ketu hali vakua Palitiya, vakua Mende na vakua Elame; naua na vaze vakala ku Mesopotamia, ku Yundeya na Kapandosiya ku Ponto na mitambela ya Asia,
10 ku Filiziya na Pamefiliya, ku Ingitu na membo a mu Limbia ku hiehi na Silene; na vangendzi vaze va tundile ku Loma, tuvose tuapua vaYundeya na vaze va lipuisa vaYundeya;
11 vakua Keleta na Alambia. Tu vose tuli na kuivua vandongesi va handeka mu malimi etu, viuma via ku komouesa via Njambi.”
12 Cili vene, vose va likomokelele na kutsa cintsima. Kaha va lihandekesele umo na mukuavo nguavo: “Vika via lumbunuka evi viuma?”
13 Vunoni vakuavo vava yenguile naku handeka nguavo: “Va na pende ava.”
14 Vunoni Petulu uemanene hamolika na vaze 11, ua handekele na lizi lia kama nguendi: “Enu vamala va mu Yundeya nenu vose muakala mu Yelusalema, aci manenu ngoco kaha halakanenu vuino vi nji mileka.
15 Ava vantu ka va pendele, ngue mu muli naku singanieka, muomu ino icili 9 ola.*
16 Vunoni mua vusunga, evi vikevio vi va handekele ku hitila muli kapolofeto Yoele,
17 Njambi nguendi: ‘“Ku matangua aku kotokela, njika muanyena sipilitu yange ha vantu va vifua viose.* Kaha vana venu va vamala nava va vampuevo vaka ambulula vupolofeto kaha vakuendze venu vaka mona vimona na vakulupe venu vaka lota vindzozi.
18 Ku matangua aco naua, njika muanyena sipilitu yange hali vangamba vange va vamala nava va vampuevo kaha vaka polofeta.
19 Kaha njika linga vikomoueso muilu na vitantekeyeso ha mavu; vikapua maninga, tuhia na mbundu ya vuisi.
20 Ntsimbu kanda litangua lia Yehova* lia kama lia ku komouesa lihete, litangua likaluluka na kupua milima na ngonde ikaluluka kupua maninga.
21 Kaha uose uze aka tambeka lizina lia Yehova, a kovoka.”’
22 “Enu vaIsaleli, halakanenu kuno: Yesu mukua Nazaleta, Njambi ua mu soluele kuli yenu ku hitila mu vipanga via ngolo, vikomoueso na vitantekeyeso via lingile Njambi kuli yenu ku hitila muli ikeye, ngue mu mua tantekeya enu vavenya.
23 Kaha ou yala, va mu hanene ku mavoko enu kuliya na cizango ca Njambi na vuhasi vuendi vua ku tantekeya vi ka soloka ku lutue. Vunoni yenu mua mu hanene ku mavoko a vakua ku pokola masiko, va mu sukikile ha citi naku mu tsiha.
24 Vunoni Njambi ua mu sangula mu ku mu zitula ku kutsa.* Muomu kutsa ku ca hasele ku mu kuta.
25 Muomu Ndaviti ua handekele kutuala hali ikeye nguendi: ‘Nji na haka Yehova ku meso ange ntsimbu yose, muomu ali ku livoko liange lia cilio linga kati nji taliangele.
26 Ngeci mukemuo, mutima uange ua viukililile na ndaka yange ya viukililile cikuma-kuma. Kaha njika kala na lulavelelo;
27 muomu ka uka njecelela* mu Cihilo,* cipue kuecelela muvila uange uvole muomu nja ku kakatela.
28 Una nji muesa vinjila via muono, uka nji sulisa na ndzolela ku meso ove.’
29 “Vamuanetu, nji tavesenu ku mi leka via Ndaviti mutue ua vusoko. Ikeye uatsa kaha va mu tsinda, na mbumbo yendi tuli nayo na lelo lino.
30 Mu kulinga uapuile kapolofeto kaha ua tantekeyele nguendi, Njambi ua lisingile kuli ikeye nguendi aka tumbika umo ua vakua mbuto yendi ha citumamo cendi ca vuangana,
31 Ndaviti ua muene vualumo vi ka soloka ku lutue kutuala ha cisangukilo ca Kilistu, ngeci ua vi handekele nguendi, ka vaka mu seza mu Cihilo nambe kuecelela muvila uendi uvole.
32 Njambi na sangula ou Yesu kaha tuvose tu vakaleho.
33 Ngeci mukemuo, mu kulinga va na mu haka ku vukama naku mu haka ku livoko lia cilio lia Njambi; kaha na tambula sipilitu santu kuli Tata ize ya mu kulahesele, na muanyena hali yetu evi vimuli na kumona na kuivua.
34 Muomu Ndaviti kaile muilu, vunoni ua handekele nguendi: ‘Yehova ua lekele Muangana uange nguendi: “Tumama ku livoko liange lia cilio
35 noho ha njika hakela vitozi vove kupua cituamo ca viliato viove.”’
36 Ngeci mukemuo, ndzivo yose ya Isaleli i tantekeye ngecize, ou Yesu umua tsihile ha citi, mua vusunga vene, Njambi na mu puisa Muangana na Kilistu.”
37 Mbunga muya vuile ngoco, vavuile ku mitima vo, ngeci vehuile Petulu na vapostolo vakuavo nguavo: “Enu vamala, vamuanetu, vika honi tua pande kulinga?”
38 Petulu uava kumbuluile nguendi: “Alulukenu, kaha muntu ku muntu va mu mbatize mu lizina lia Yesu Kilistu, linga va mi konekele ku vipi vienu kaha mu ka tambula vuana vua sipilitu santu.
39 Muomu eci cikulaheso va na ci lingi kuli yenu na vana venu, na kuli vaze vose vali ku lahako, na vose vaze va aka sana Yehova Njambi yetu, veze kuli ikeye.”
40 Kaha ua handekele naua mezi akuavo a engi mu ku va hana vukaleho mu vutuntu naku va mamuna nguendi: “Ovokenu hali ou muyati ua kuvihia.”
41 Ngeci vaze vose va tavele ku lizi liendi na ndzolela, vava mbatizile. Kaha ha litangua lize vene, vantu* vaheta ku 3.000 va livuezelele kuli vakevo.
42 Kaha va tualeleho ku likuatelela ku vilongesa via vapostolo, ku likuasa umo na mukuavo na viose vi vakele navio, kulia hamolika na kuvundila.
43 Mua vusunga vene, vantu vose va putukile kuivua liova, kaha vapostolo va putukile kulinga vikomoueso na vitantekeyeso viavingi.
44 Vose vaze valulukile na kuliveya, vakele hamolika, ku likuasa umo na mukuavo na viose vi vakele navio.
45 Vakele naku landesa mehia avo na vupite vukuavo vu vakele navuo, kaha vimbongo viva uanene, va litepelele umo na mukuavo kuliya na vuhasi vua nkala muntu.
46 Tangua na tangua, vakele naku likunguluila mu tembele kaha mu viose va uisilile kumo; vakele naku liendela ku vindzivo, kulia hamolika na ndzolela ya kama na mutima umo,
47 naku sangaziala Njambi kaha vantu vose va vuahelelele navo. Cikuavo naua, tangua na tangua Yehova ua tualeleho ku va vuezelela vantu vaze va kovoka.
Matota
^ Mu ciNgelengu “ola ya mu citatu.”
^ Mu ciNgelengu “ntsitu yose.”
^ Talenu Mizimbu ya ku Vuezako
^ Ni “mikole ya kutsa.”
^ Ni “seza muono uange”
^ Ni “Hades,” ya lumbunuka vihilo via vantu vose.—Talenu Mezi ava Lombolola
^ Ni “miono.”
