Vilinga Via Vapostolo 20:1-38
20 Mu lia tepulukile lize liuayanga, Paulu ua tumine vantu vaka sane vandongesi. Mu nima yaku va kanyamesa ua va salesele na kuya ku Masendonia.
2 Ua hitanganene mu vimbonge viose via kuze na ku kanyamesa vandongesi na mezi a engi kaha uaka hetele ku Ngelesia.
3 Uaka keleko vingonde vitatu, vunoni mua nongonuene nguendi mue ku ile ku Silia, vaYundeya vakele na vutumbe vua ku mu linga mua kuvihia, ualuluile vutumbe vuendi na kuhita njila ya ku Masendonia.
4 Uaile na Sopatele muana Pilu ua ku Mbeleya; Alistaliku na Sekundu va ku Tesalonika; Ngayu ua ku Ndeleve, kaha na Timoteu, Tikiku na Tolofimu va ku muhato ua Asia.
5 Ava vamala va tuamene ku lutue kaha vaka tu vandamenene mu Toloase.
6 Mu nima ya matangua a Cilika ca Mbolo ya ku Hona Cimbaluila, tua tundile mu Filipu na vuato. Kaha mu nima ya matangua atanu, tua ka liuanene navo mu Toloase, ngeci tua ka keleko matangua 7.
7 Ha litangua lia kulivanga mu simano, te tua likungulula linga tulie, Paulu ua putukile kuhandeka na vose, muomu lia mukuavo, ue ku ile vungendzi. Ngeci ua tualeleho kuhandeka na mukati ka vutsiki.
8 Mu hondo ya helu itua likunguluile, mua kele vindeya viavingi.
9 Umo mukuendze, lizina liendi Yutiku, ua tumamene ku njanena kaha ua uililile mu tulo va kama ntsimbu tele Paulu aci handeka. Kaha omo lia tulo, ua uililile ha mavu kutunda ha ndzivo ya mu citatu ya kulilundakana, ngeci mu vaka mu hinduile, va mu uanene natsi.
10 Vunoni Paulu ua sulukile, ua limbilile hali ikeye, ua mu vumbatela kaha nguendi: “Simpenu, ali na muono.”
11 Kaha Paulu ua hilukile mu ndzivo ya kuilu, ngeci ua pazuile mbolo na kulia. Ua tualeleho kuhandeka mu ntsimbu ya laha kuheta na ha kuca ca litangua, ngeci uaile.
12 Kaha va tualele uze mukuendze ku ndzivo na muono uendi, kaha eci ca va lembeziekele mua kama.
13 Yetu tua tuamene na mbapolo kaha tua zavukile na kuya ku Asosi, ku tue kuka hituile Paulu na mbapolo, mukemuo mua tu sikile, muomu ikeye ua tondele kuyako ha mikono.
14 Ngeci mua ka tu uanene ku Asosi, tua muambatele mu mbapolo na kuya ku Mitilene.
15 Mu lia cele litangua, tua katukile na kuka heta mu hiehi na Kiyu. Vunoni lia mukuavo, tua ka vandamene mu Samuse kaha lia hateleko, tua ka hetele ku Miletu.
16 Paulu ka tondele kuhita mu Efesu linga kati avihisile ntsimbu mu muhato ua Asia, muomu uakele na kutuntila ku Yelusalema, linga aka kaleko ha litangua lia Cilika ca Pentekoste nga citava.
17 Vunoni mua kele mu Miletu, ua tumine vantu vaka sane vakuluntu va mu cikungulukilo ca mu Efesu.
18 Mu va ku hetele, uava lekele nguendi: “Yenu mu tantekeya vuino mu nja yoyele nenu, tunde vene ha litangua lia katete li nja liatele mu muhato ua Asia.
19 Nja pangele ngue ngamba ya Muangana, naku likehesa cose, na masozi, na vieseko vi nja hitile omo lia matumbe a vaYundeya, a kutonda ku nji linga mua kuvihia.
20 Cikuavo naua, ka nja likelele ku mi leka viuma viose-ovio vi mi kuasa ni ku mi longesela ha mbunga, naku ndzivo na ndzivo.
21 Vunoni nja hanene vukaleho mu vutuntu kuli vaYundeya na vaNgelengu ngecize, va pandele kualuluka na kuiza kuli Njambi kaha na kutsiliela muli Muangana uetu Yesu.
22 Hano honi, sipilitu ya nji sindiya njiye ku Yelusalema, vutuhu ka nji tantekeya vi ka nji solokelako.
23 Nji tantekeya lika nguange nkala mbonge inja hiti, sipilitu santu ya kele naku nji leka kusua kumo nguayo, tumenga na tuyando via nji vandamena.
24 Vutuhu ngoco, ka nje kumona muono uange kupua ua seho ya kama kuli yange; cuma ca seho ya kama kuli yange, kumanusula vungendzi na cipanga ci nja tambuile kuli Muangana Yesu, ca kuhana vukaleho vua muzimbu ua cili ua ngozi ya kama ya Njambi.
25 “Halakanenu! Hano honi nja tantekeya nguange, hakati kenu va nji nambuluila muzimbu ua Vuangana, na umo uahi aka mona naua cihanga cange.
26 Ngeci mukemuo, nja mi sana mupue vakaleho ha litangua lia lelo, nguange nja sambua ku maninga a vantu vose.
27 Muomu ka nja likelele ku mi leka vutumbe vuose vua Njambi.
28 Liniungenu enu vavenya na kuniunga vutanga vuose vuze vu ina mi hanguila sipilitu santu kupua tuniungi vavuo, linga mu niunge cikungulukilo ca Njambi ca landele na maninga a Muanendi mpundu.
29 Nja tantekeya nguange mu nima ya kuya cange, tungunga va vukalu vaka kovela hakati kenu, kaha ka vaka tetela vutanga.
30 Ha ka katuka vamo vaka handeka viuma via kuhenga linga va hungumune vandongesi mu ku va kava.
31 “Ngeci mukemuo, tualelenuho kuvingila. Vulukenu nguenu mu miaka itatu yose, ka nja likelele ku mi mamuna muntu ku muntu na masozi.
32 Hano honi, nji mi kundika mu mavoko a Njambi na mu lizi lia ngozi yendi ya kama. Lizi liaco, li hasa ku mi kolesa* naku mi hana vusuana, hakati ka vakua kulela vose.
33 Ka nja liveyelele palata ni olu ni vizalo via muntu.
34 Nenu mua tantekeya vuino nguenu, nja fuitanganene na mavoko ange linga nji uane via kulisuka navio hamolika na vakuetu.
35 Mu viuma viose, nja mi sila lungano kutuala ha ku fuitangana. Ngeci mukemuo, nenu mua pande kukuasa vaze va na zeye naku vuluka mezi a handekele Muangana Yesu nguendi: ‘Kuhana, ce ku neha ndzolela ya kama ku tuvakana ku tambula.’”
36 Mua manusuile kuhandeka evi viose, ua tsikamene hamo navo na kuvundila.
37 Ngeci vose va putukile kulila muakama, kaha va vumbatelele Paulu naku mu tsemba,
38 muomu vakele mu vusiua vuakama, cikuma-kuma omo lia mezi ava lekele Paulo nguendi ka vaka mono naua cihanga cendi. Mu nima yaco, va mu sindikiyile naku mbapolo.
Matota
^ Mu ciNgelengu “ku mi tunga”
