Vilinga Via Vapostolo 21:1-40
21 Mu nima ya ku litepa navo, tua sunukile na mbapolo, tuaile ku Kose. Lia mukuavo, tua ka hetele ku Londese, ku tundaho tuaile ku Patala.
2 Kaha tua ka uaneneko imo mbapolo ya kele na kuya ku Fenisia, ngeci tua londelemo naku tualelaho vungendzi vuetu.
3 Kaha omo tuakele na kuya, tua muene nkundu ya Sipulu, tua isile ku cimosue, kaha tuaile ku Silia. Kaha mu tua hetele ku Tile, tua sulukile, muomu kukekuo ku veku longoluele vitenga mu mbapolo.
4 Tua tondele vandongesi kaha mu tua va uanene, tuakeleko matangua 7. Vunoni kuhitila mu sipilitu santu, va lekele Paulu kusua kumo nguavo kati aka liate ku Yelusalema.
5 Mu ya huile ntsimbu ya kukala kuze, tua katukile naku tualelaho vungendzi vuetu. Kaha vose, hamolika na vampuevo na vanike, va tu sindikiyile noho mu tua tuhukile mu mbonge. Kaha ku mukulo ua kalunga ndonga, tua tsikamene na kuvundila.
6 Tua lisalesele navo, ku tundaho, tua londele mu mbapolo, vunoni vakevo va hilukile.
7 Mu tua tundile ku Tile na mbapolo, tua ka hetele mu Tolemainda; tua menekele vamuanetu na kuandama navo litangua limo.
8 Lia mukuavo, tua ka hetele ku Sesaliya kaha tua kovelele mu ndzivo ya Filipu mukua kuambulula, umo ua vaze vamala 7, ngeci tuakele hamo nendi.
9 Ou Yala, uakele na vana vauana va vampuevo kanda va somboke,* vaze vakele na kuambulula vupolofeto.
10 Mu nima ya ku kalako matangua a engi, umo kapolofeto ua lizina Angavu ua tundile ku Yundeya,
11 kaha uezile kuli yetu. Ua kuatele muiva ua Paulu naku likutauo ku mavoko naku mikono kaha nguendi: “Sipilitu santu nguayo, ‘Ivene ou muiva, mukemuo mu vaka mu kuta muze ku vaYundeya mu Yelusalema, naku mu hana ku mavoko a vakua vifuti.’”
12 Mu tuavuile ngoco, netu na vamuanetu vakele kuze, tua putukile ku lambelela Paulu nguetu, kati aye ku Yelusalema.
13 Vunoni Paulu ua kumbuluile nguendi: “Vika muli na kulinga? Kulila na kunji zeyesa? Tantekeyenu nguenu nja livuahesela laza, kati lika via kunji kuta, vunoni na kutsa vene mu Yelusalema omo lia lizina lia Muangana Yesu.”
14 Mu kulinga ka tavele, ka tua mu sindiyile naua kaha tua handekele nguetu: “Cizango ca Yehova* lika honi cilingiue.”
15 Mu nima ya amo matangua, tua viukisile via vungendzi vuetu kaha tua putukile kuya ku Yelusalema.
16 Vamo vandongesi va ku Sesaliya, navo vaile netu, va tu tualele kuli Manasoni ua ku Sipulu, umo ua vandongesi va kulivanga, vavenya ndzivo ku tue ku tulilile.
17 Mu tua hetele ku Yelusalema, vamuanetu va tu tambuile na ndzolela.
18 Lia mukuavo, Paulu uaile netu mu kuka liuana na Tiango, na vakuluntu vose ku vakele.
19 Kaha uava hinduisile na kuputuka ku va lumbunuina vuino viuma via lingile Njambi kuli vakua vifuti, ku hitila mu cipanga cendi ca kuambulula.
20 Mu vavuile ngoco, va putukile ku zumbangeya Njambi. Vunoni va lekele Paulu nguavo: “Yove u tantekeya vaYundeya vangahi va naluluka na kutsiliela, kaha vose vali na ntuima ya kukava Lisiko.
21 Vunoni va nevu linguavo kutuala hali yove nguavo, uli naku longesa vaYundeya vose vali hakati ka vakua vifuti, nguove va likele kukava Masiko a Mosesa. Uli naku va leka naua nguove, kati va lovole vana vavo ni kulinga viuma muaya cisemua.
22 Vati honi tu linga? Muomu amba va tantekeya nguavo uneza.
23 Ngeci mukemuo, linga vino vi tu kuleka: Tuli na vamala vauana va na lingi imo nkuminyo.
24 Ya nava vamala, uka lilelese hamo navo kuliya na cisemua naku va fuetela viose viva tonda linga vaka tehule ku mitue yavo. Kaha vantu vose vaka tantekeya nguavo, linguavo li va nevu hali yove lia visaki. Vunoni nguavo uli na kuenda vuino kaha naua uli na kuononoka Masiko.
25 Vunoni kutuala hali vakua kutsiliela vali hakati ka vakua vifuti, tua va sonekelele laza cihangula cetu nguetu, va tualeleho kuzila ku viuma vi va na kombeleya ku tumponya, naku maninga, naku viuma via kutekenya,* naku vupangala.*
26 Ngeci lia mukuavo Paulu uaile na vaze vamala, ua lilelesele hamo navo kuliya na cisemua. Mu nima yaco, ua kovelele mu tembele linga aka va leke ntsimbu ika eku huile matangua a kulilelesa cavo kuliya na cisemua, linga va hane vuana, omo liavo muntu ku muntu.
27 Kaha omo matangua 7 tele a lingila kuhua, vaYundeya va ku Asia mu vamuene Paulu mu tembele, va songangeyele mbunga yose ngeci va mu kuatele.
28 Va tambakanene nguavo: “Enu vamala va mu Isaleli, tu kuasenuko! Ou yala ue ku longesa vantu vose ku vihela viose viuma vie ku liluisa na vantu vetu, na Masiko etu kaha na cino cihela. Cikuavo naua, na neha vaNgelengu mu tembele naku zualesa cino cihela ca kulela.”
29 Va handekelemo, muomu va livangele kumona mu mbonge Tolofimu ua ku Efesu hamolika na Paulu, ngeci va singaniekele nguavo na mu neha mu tembele.
30 Ngeci mu mbonge yose mua katukile liuayanga, mbunga ya yingi ya likungile. Va kuatele Paulu naku mu kokela ha mbandza ya tembele, haze vene va sokele mapito.
31 Kaha mu va tondele ku mu tsiha, kapitau ua masualale ua tambuile muzimbu nguavo mu mbonge yose ya Yelusalema muli liuayanga.
32 Ngeci haze vene, uambatele masualale na vakuluntu va masualale naku tuntilako. Kaha vantu mu va muene kapitau hamo na masualale vendi, valikelele kupupa Paulu.
33 Ngeci kapitau ua masualale ua sueneneko, ua mu kuatele, na kutuma va mu kute na malienge avali. Mu nima yaco, uehuile iya uapuile yala uaco na vika ua lingile.
34 Ngeci mbunga ya putukile ku tambakana, ava va tambeka evi, vakuavo va tambeka vize. Mu kulinga ka uanene ntsongo na ntsina ya cimpande caco omo lia liuayanga, ngeci uava lekele va tuale Paulu ku cilombo ca masualale.
35 Vunoni omo Paulu ua hetele ha vindondelo, masualale va mu kakuile omo lia vukenya vua ize mbunga,
36 muomu mbunga ya va kavele mu nima, oku va tambeka nguavo: “Mu tsihenu!”
37 Mu va tondele ku mu kovelesa mu cilombo ca masualale, Paulu uehuile mukuluntu ua masualale nguendi: “Citava nji handeke nenu?” Uze mukuluntu nguendi: “Nkuma u tantekeya kuhandeka ciNgelengu?
38 Kati yove uze Mukua Ingitu, ua songangeyele vantu valulukile nguvulu ku ntsimbu ya ku nima, naku kungulula vikelemi* 4.000 naku va tuala mu likango ni?”
39 Paulu ua mu kumbuluile nguendi: “Yange nji kaYundeya ua ku Talusu, imo mbonge ya kama ya mu Silisia. Ngeci mukemuo, nji ku lambelela nguange, nji tavese ku handeka nava vantu.”
40 Mua mu tavesele, Paulu uemanene ha vindondelo, ua sovueyele mbunga linga va holoke. Ngeci mu va holokele, ua handekele navo mu lilimi lia ciHevelu nguendi:
Matota
^ Mu ciNgelengu “vaze kanda va limona na yala”
^ Talenu Mizimbu ya ku Vuezako
^ Ni “viva na tsihi ca kuhona kumuanya maninga”
^ Mu ciNgelengu “Porneia.” —Talenu Mezi ava Lombolola
^ Ni “vambanditu; mihuza”
