Vilinga Via Vapostolo 22:1-30
22 “Enu vamala, vamuanetu, nenu vatate, nji halakanenu omo nji lihakuila ku meso enu.”
2 Mu va mu vuile a handeka navo mu ciHevelu, va holokele honi kulu, ngeci uava lekele nguendi:
3 “Yange nji kaYundeya, nja semukila ku Talusu ya mu Silisia, vunoni va nji longesele mu mbonge ino vene kuli Ngamaliele. Va nji longesele muaya Masiko a vakukuluila vetu kaha njakele na ntuima mu cipanga ca Njambi ngue mu muli na kulinga yenu lelo lino.
4 Nja yandesele vakua kukava eyi Njila, kutuala naha kutsa cavo. Nja kutile vamala na vampuevo naku va tuala mu tumenga.
5 Sasendote ua kama hamolika na mbunga yose ya vakuluntu, vahasa kuhana vukaleho vua viuma evi. Cikuavo naua, va nji hanene mikanda ya kuya nayo kuli vamuanetu vakele ku Ndamasiku kaha nja ileko na vutumbe vua ku ka va kuta naku va neha ku Yelusalema, linga vava hane kasitiku.
6 “Vunoni mu njakele mu vungendzi vuaco, tele nji lingila kuheta ku Ndamasiku oku litangua liendela hakati, haze vene njamuene kalanganja, ceke ca kutunda muilu ca nji tuililile.
7 Ngeci nja uililile ha mavu kaha njavuile lizi lihandeka nange ngualio: ‘Saulu, Saulu, vika nkuma uli naku nji yandesela?’
8 Njehuileko nguange: ‘Muangana, yove iya?’ Ua nji kumbuluile nguendi: ‘Yange Yesu Mukua Nazaleta yuli naku yandesa.’
9 Vamala vakele nange, navo va muene ceke, vunoni ka vavuile lizi lia muntu uakele naku handeka nange.
10 Ngeci njehuileko nguange: ‘Muangana, vika nja pande kulinga?’ Muangana ua nji kumbuluile nguendi: ‘Katuka, ya ku Ndamasiku kaha vaka kuleka viuma viose viva naku hanguila kulinga.’
11 Vunoni mu kulinga ka njakele na kumona na vimo viahi omo lia vumpahu vua cize ceke ca nji tuililile, umo ua vaze vakele nange, ua nji kuatele ku livoko naku Ndamasiku.
12 “Kaha kuakele umo yala lizina liendi Ananiya, mukua ku lemesa Njambi na kuononoka Masiko. VaYundeya vose vakele kuze va mu tantekeyele nguavo mukua vilinga via cili,
13 uezile kuli yange. Ua suenene muhiehi naku nji leka nguendi: ‘Muanetu Saulu, putuka kumona!’ Haze vene meso ange akangukile kaha nja mu muene.
14 Ua nji lekele nguendi: ‘Njambi ya vakukuluila vetu na kuhangula linga utantekeye cizango cendi, umone mukua vuoloke naku halakana lizi lia ku kanua kendi.
15 Muomu ukapua mukaleho uendi ku vantu vose, kutuala ha viuma vi ua mono na kuivua.
16 Hano honi, vika uli naku vandamena? Katuka va ku mbatize, kaha kusa vupi vuove mu kusana ha lizina liendi.
17 “Vunoni mu nja hilukile ku Yelusalema, tele njili mu tembele mu ku vundila, nja uililile mu tulo.
18 Kaha nja muene Muangana anji leka nguendi: ‘Zangulako, tunda muno mu Yelusalema vuasi-vuasi muomu ku va tava vukaleho vuove kutuala hali yange.’
19 Ngeci nja mu kumbuluile nguange: ‘Muangana, navo va tantekeya vuino nguavo njakele na kuya mu sinangonga ku sinangonga, mu kuveta makote na kuhaka mu kamenga vaze va tsilielele muli yove.
20 Kaha ambe mu vakele na kumuanya maninga a mukaleho uove Setefanu, nange ha njakele. Nja tavele vize vi vakele na kulinga na kuniunga vuzalo vua vaze vakele naku mu tsiha.’
21 Vutuhu ngoco, Muangana ua nji kumbuluile nguendi: ‘Ya, muomu nji kutuma ku vakua vifuti vakala ku vihela via ku lahako.’”
22 Va mu halakanene lika na ha mezi aa. Kaha va tambekele nguavo: “Muntu ua cifua eci mu tundisenu hano ha mavu, muomu ka pandele kuyoya!”
23 Mu kulinga vakele naku tambakana na kumbangela vizalo viavo, oku va suuila livu muilu,
24 ngeci mukuluntu ua masualale ua tumine va kovelese Paulu mu cilombo ca masualale, va muihule oku va mupupa makote, linga va tantekeye omo lia vika vantu vakele naku tambekela ngoco hali ikeye.
25 Vunoni mu nima ya ku mu kuta linga va mupupe makote, Paulu uehuile kapitau ua masualale uemanene kuze nguendi: “Nkuma masiko ami tavesa kupupa Mukua Loma, ntsimbu kanda va mu uane na mulonga* ni?”
26 Kapitau mua vuile ngoco, ua ka lekele mukuluntu ua masualale nguendi: “Vika utonda kulinga? Uze yala uapua Mukua Loma.”
27 Ngeci mukuluntu ua masualale uaile kuli Paulu naku muihula nguendi: “Njileke, nkuma u Mukua Loma?” Ngeci ua mu kumbuluile nguendi: “Eyo.”
28 Mukuluntu ua masualale ua handekele nguendi: “Nja fuetele vimbongo viavingi linga njipue Mukua Loma.” Paulu ua mu kumbuluile nguendi: “Vunoni yange kua ku semukila.”
29 Haze vene, vaze vamala va tondele ku muihula naku mupupa makote, va muecelele. Kaha uze kapitau ua masualale uavuile liova mua nongonuene ngecize, ua kutile Paulu malienge vutuhu ua pua Mukua Loma.
30 Mu kulinga mukuluntu ua masualale ua tondele ku tantekeya omo lia vika vaYundeya va na tuiki Paulu mulonga, ngeci lia mukuavo, ua zituile Paulu na kutuma vakuluntu va vasasendote hamolika na Mpunga yose va likungulule. Mu nima yaco, va tualele Paulu naku muimika hakati kavo.
Matota
^ Ni “ntsimbu kanda va mu sompese”
