Vilinga Via Vapostolo 23:1-35
23 Paulu ua talele sui vakua Mpunga, kaha ua handekele nguendi: “Enu vamuanetu, nji na yoyo na mutima ua kulela ku meso a Njambi naku lelo lino.”
2 Sasendote ua kama Ananiya, muavuile ngoco, ua lekele vaze vakele mu hiehi na Paulu, linga va mu pupe ku kanua.
3 Kaha Paulu ua mu lekele nguendi: “Njambi aku pupa ove mukua civembulu,* ua tumamoho linga unji sompese kuliya na Masiko, vunoni yove naua upokola Masiko aco mu kutuma vantu va nji pupe ni?”
4 Vaze vakele kuyehi nendi va handekele nguavo: “Ove, uli naku sahula sasendote ua kama ua Njambi?”
5 Ngeci Paulu ua kumbuluile nguendi: “Vamuanetu, ka nja tantekeyele nguange uapua sasendote ua kama. Muomu va soneka nguavo: ‘Kati uhandeke mua kuvihia mukua kusika vantu vove.’”
6 Paulu mua muene nguendi, mu Mpunga mua kele vivunga vivali, eci ca vaFaliseu cikuavo ca vaSanduseu, ua tambakanene nguendi: “Enu vamuanetu, yange nji kaFaliseu nji muana kaFaliseu, kaha vali naku nji sompesa omo lia lulavelelo lua cisangukilo ca vatsi.”
7 Mua handekele ngoco, hakati ka vaFaliseu na vaSanduseu ha katukile kulihoya ca kama, ngeci mbunga ya litepele hakati.
8 Muomu vaSanduseu ve ku handeka nguavo, ka kuakele cisangukilo cipue tungelo ni sipilitu, vunoni vaFaliseu va tava* nguavo, viose evi ku via kala.
9 Ngeci ha katukile kulihoya ca kama hakati kavo, kaha vamo vakua kusoneka va ku civunga ca vaFaliseu va katukile na kulinga mua kama vimpata nguavo: “Ou yala ka tua mu uanene na mulonga na umo uahi, vunoni nga sipilitu ni kangelo na handeka nendi—.”
10 Mu kulinga kulihoya cavo ca putukile ku livuezelela mua kama, mukuluntu ua masualale uakele na liova nguendi, Paulu vaka mu sanyona. Ngeci ua tumine masualale va sikumukeko naku ka tundisa Paulu hakati kavo, linga va mutuale ku cilombo ca masualale.
11 Vunoni ku vutsiki vuze vene, Muangana ua solokelele Paulu naku muleka nguendi: “Simpa, muomu ngue muze mu una hana vukaleho vuange mu vutuntu mu Yelusalema, ua pande naua ku kahana vukaleho vuaco naku Loma.”
12 Mukua cele, vaYundeya va mu tumbilile vutumbe na kulisinga nguavo, ku vali cipue kunua kuvanga noho va na tsihi Paulu.
13 Vantu vaco vakele novu vutumbe va tuvakanene 40.
14 Ngeci ava vamala vaile kuli vakuluntu va vasasendote na vakuluntu naku valeka nguavo: “Tua lisingi na kulikuminya nguetu, katuli na vimo viahi kuvanga noho tua tsihi Paulu.
15 Ngeci mukemuo, nenu hamolika na vakua Mpunga, mua pande kuleka mukuluntu ua masualale ami nehele Paulu, linga mu muese ngue mu tonda ku hilula vuino ha cimpande cendi. Vunoni ntsimbu kanda ahete ha yehi, yetu tu ka livuahesela mu ku mu tsiha.”
16 Vunoni muihua ua Paulu ua mukuendze, uavuile vutumbe vuaco, ngeci uaile mu cilombo ca masualale naku ka lekako Paulu viose.
17 Kaha Paulu ua sanene umo kapitau ua masualale, naku mu leka nguendi: “Tuala ou mukuendze kuli mukuluntu ua masualale, muomu kuli vimo via tonda ku mu leka.”
18 Ngeci ua tualele uze mukuendze kuli mukuluntu ua masualale naku mu leka nguendi: “Cindzinda Paulu nanji sanene, kaha na pingi nji mi nehele ou mukuendze muomu nguavo kuli vimo via tonda ku mileka.”
19 Kaha mukuluntu ua masualale ua kuatele uze mukuendze ku livoko, naku mu kokela ku mukulo nguendi: “Vika utonda ku nji leka?”
20 Uze mukuendze ua kumbuluile nguendi: “VaYundeya va na likuminya nguavo, va ku kupinga linga utuale Paulu kuli vakua Mpunga imene, vamuese ngue va tonda ku tantekeya mizimbu ikuavo, kutuala ha cimpande cendi,
21 ngeci mukemuo, kati uva tave, muomu vamala va tuvakana 40, va na vandelela Paulu kaha va na lisingi nguavo, ka vali ni kunua na vimo viahi kuvanga va na mu tsihi. Mu tu handeka ngeci, va na liviukisila laza, va na vandamena lika yove uva tavese.”
22 Ngeci uze mukuluntu ua masualale, uecelele uze mukuendze, mu nima ya ku mu mamuna nguendi: “Kati ulekeko na umo uahi nguove ua nji lekako.”
23 Mu nima yaco, mukuluntu ua masualale ua sanene tupitau vavali naku va leka nguendi: “Vuahesenu masualale 200, vakua tuvalu 70 na vakua makunga 200, linga muye ku Sesaliya ku vi 21 ola.*
24 Cikuavo naua, vuahesenu umo kavalu linga Paulu endeleho, aka hete vuino kuli nguvulu Felikisi.”
25 Kaha mukuluntu ua muasualale ua sonekele umo mukanda nguendi:
26 “Nja ku meneka ove Mukua Vukama, Nguvulu Felikisi: Tambula mukanda utunda kuli yange Kalaundiu Lisiya!
27 VaYundeya va kuatele uno yala kaha va tondele ku mu tsiha, vunoni yange na masualale vange, tua zanguile mu ku ka muohiela, muomu njavuile nguavo uapua Mukua Loma.
28 Mu kulinga nja tondele ku tantekeya mulonga uka uakele nauo, ngeci nja mu tualele ku Mpunga yavo.
29 Nja muene nguange, ka va mu uanene na mulonga na umo uahi uva pandele ku mu tsihila ni ku mu soka mu kamenga, vunoni va mu tuikile lika mulonga omo lia Masiko avo.
30 Mu kulinga va na nji ndemuinako vutumbe vuavo vua kuvihia kutuala hali ikeye, ngeci nja mu tumu kuli yove, na kutuma vaze va na mu tuika mulonga linga vaku uhandekele ku meso ove.”
31 Kaha vaze masualale vambatele Paulu kuliya na masiko ava tambuile, ngeci ku vutsiki, va mu tualele ku Antipatili.
32 Lia mukuavo, vecelele vakua Tuvalu linga va tualeleho na Paulu, kaha vakevo va hilukile mu cilombo ca masualale.
33 Vakua tuvalu mu vaka hetele mu Sesaliya, va hetesele Paulu kuli nguvulu na mukanda uvambatele.
34 Ngeci nguvulu ua tandele uze mukanda na kuihula nga Paulu ua ku muhato uka kaha va mu lekele nguavo, ua tundile ku Silisia.
35 Ngeci nguvulu ua lekele Paulu nguendi: “Nja ku halakana vuino cimpande cove, mu va heta vaze va na kutuiki mulonga.” Kaha ua sikile nguendi vaniungilile Paulu ku nganda ya Helonde.
Matota
^ Mu ciNgelengu “civumbe ca ku kuita livala lia kutoka”
^ Ni “ve kuambulula ku mbunga”
^ Mu ciNgelengu “ola ya mu citatu ku vutsiki.”
