Vilinga Via Vapostolo 24:1-27
24 Mu nima ya matangua atanu, sasendote ua kama Ananiya, uaile na vamo vakuluntu kaha na Teletulu uze ua tantekeyele ku handeka vuino ha mbunga.* Ngeci vaka lekele nguvulu mulonga ua Paulu.
2 Teletulu mu va mu sanene, ua putukile ku handeka via mulonga ua Paulu nguendi:
“Tue kuyoya mu ciyulo ca kama omo liove nguvulu yetu kaha omo lia mana ove, viuma vie kuenda vuino muno mu cifuti cetu.
3 Ntsimbu yose, tue ku limuenavio evi viuma ku vihela viose, ngeci tu ku santsela mua kama ove Mukua Vukama Felikisi.
4 Vunoni ku nji tondo ku ku vihisila ntsimbu, ngeci nji ku lambelela ku ngozi yove, tu halakane kavundende.
5 Ou yala napu musongo ue ku sambukila, ali naku songangeya vaYundeya vose ku vihela viose via ha mavu. Cikuavo naua, uapua ntuamena ua kamo kacivunga ka Vakua Nazaleta.
6 Ua tondele naua ku zualesa tembele, ngeci tua mu kuatele.
7 ——
8 Ngeci mukemuo nguvulu yetu, mumu muihula mu limuena enu vavenya nguenu, viuma viose vi tua mu hanena mulonga, via vusunga.”
9 Kaha vaYundeya navo va tavele mulonga uaco naku handeka nguavo viuma viaco viapuile via vusunga.
10 Ngeci nguvulu ua sovueyele Paulu na mutue linga ahandeke. Kaha Paulu ua handekele nguendi:
“Nja tantekeya vuino nguange u ngazi mu cifuti cino mu miaka yayingi. Ngeci mukemuo, nji handeka linga nji lihakuile.
11 Ngeci mu mua limuena enu vavenya, ka mua hitile matangua a tuvakana 12 tunde ha nja kandukilile ku Yelusalema mu ku lemesa.
12 Kaha ka va nji uanene nji lihoya na muntu mu tembele ni ku songangeya vantu va nehe liuayanga mu visinangonga ni ambe ku cihela ceka ca mu mbonge.
13 Cikuavo naua, ambe vakevo kuvesi na vukaleho vua viuma vi vali naku nji vangeya.
14 Vunoni yange nji litavelako lika vino viuma ku meso ove: nje ku lemesa Njambi ya vakukuluila vange kuliya na njila ive ku sana vakevo nguavo kacivunga. Cikuavo naua, nja tsiliela mu viose viakala mu Lisiko na mu Visoneka via Vapolofeto.
15 Kaha njili na lulavelelo kuli Njambi, lulavelelo luze vene lu vali naluo ava vantu, nguange ku kakala cisangukilo ca vakua vuviuke na vakua vuhenge.
16 Ngeci mukemuo, nje ku lihakela kapandi ntsimbu yose, linga nji kale na mutima ua kulela ku meso a Njambi na vantu.
17 Mu nima ya miaka ya ingi, njaile ku Yelusalema mu kutuala vuana vua cikeketima ku vakua muyati uange, kaha na kuhana mavuana akuavo.
18 Ntsimbu tele nji linga evi viuma, va nji uanene mu tembele tele nja lilelesa laza kuliya na cisemua. Ka njakele na mbunga ni kukoka liuayanga houe. Vunoni kua kele vamo vaYundeya va tundile ku muhato ua Asia,
19 vakevo tele va pandele kuiza kuno ku meso ove nguvulu, linga va nji hane mulonga nga kuli vimo mpundu vi nja vihisa.
20 Ni ambe ava vamala vali hano, va handeke mulonga uka va nji uanene nauo mu njemanene ku meso a Mpunga,
21 kuvanga lika mpano, mezi anja tambakanene mu njakele hakati kavo nguange: ‘Lelo vali naku nji sompesa ku meso enu omo lia cisangukilo ca vatsi!’”
22 Vunoni mu kulinga Felikisi ua tantekeyele vuino via Njila ya Muangana, uemikile cimpande naku handeka nguendi: “Tua ku manusula cino cimpande mua keza mukuluntu ua masualale Lisiya.”
23 Mu nima yaco, ua tumine kapitau ua masualale aniungiliye Paulu, vunoni a mu hane naua mpoko ya kulingako vimo naku tavesa vavusamba vendi va mu lingile viuma via tonda.
24 Mu nima ya amo matangua, Felikisi uezile na mpueyendi Ndulusila uze uapuile kaYundeya. Ua tumine vantu vasane Paulu, kaha ua mu halakanene mua kele naku handeka via kutsiliela muli Kilistu Yesu.
25 Vunoni omo Paulu ua putukile ku handeka via vuoloke, via kukuata mutima naku sompesa cikeza ku lutue, Felikisi ua uililile mu liova naku handeka nguendi: “Mu ntsimbu ino aciye tahi, mu nji uana ntsimbu, amba nji kusana naua.”
26 Ikeye uakele naku singanieka naua nguendi, halumo Paulu a mu hana vimbongo. Ngeci uakele naku mu sana kusua kumo linga a simutuile nendi.
27 Vunoni mu nima ya miaka ivali, Felikisi va mu hingile kuli Polisiu Festu; kaha mu kulinga Felikisi ua tondele kuya ku mitima ya vaYundeya, ngeci ua sile Paulu mu kamenga.
Matota
^ Ni “lihako.”
