Vilinga Via Vapostolo 25:1-27
25 Festu mua hetele ku muhato uze, linga aputuke kusika mua hitile matangua atatu kaha ua tundile ku Sesaliya naku kanduka ku Yelusalema.
2 Kaha vakuluntu va vasasendote hamolika na vamala vakua lutsimo va vaYundeya, va mu lekele via mulonga ua Paulu kaha va putukile ku lambelela Festu,
3 nguavo ava kuaseko kutuma Paulu ku Yelusalema, vutumbe vuavo vuapuile ku ka vandela Paulu mu tapalo linga va mu tsihe.
4 Vunoni Festu uava kumbuluile nguendi, Paulu va pande vene ku mu niungila ku Yelusalema kaha nguendi, nendi vene, vuovuno a hilukamo.
5 Cikuavo naua, uava lekele nguendi: “Vunoni kuye hamo nange, vamo vakua ku tuamenena hakati kenu, linga vaka handeke mulonga uendi, nga cili vene ou yala kuli vimo via na vihisa.”
6 Festu muakele navo mu Yelusalema, matangua aheta ku 8 ni 10, ua hilukile ku Sesaliya. Kaha lia mukuavo, ua tumamene ha citumamo cendi ca vusompelo na kutuma nguendi, va nehe Paulu.
7 Mua hetele Paulu, vaYundeya vaze va tundile ku Yelusalema va mu zengelekele kaha va mu vangeyele milonga yayingi ya kulinga nambe vene vukaleho vuahi.
8 Vunoni Paulu, ua lihakuilile nguendi: “Ka nja vulumuine mulonga na umo uahi kutuala ha Lisiko lia vaYundeya ni tembele nambe kuli Sezale.”
9 Mu kulinga Festu ua tondele kuya vaYundeya ku mutima, uehuile Paulu nguendi: “Utonda ku kanduka ku Yelusalema linga vaka ku sompeseleko ku meso ange ha viuma evi ni?”
10 Vunoni Paulu ua mu kumbuluile nguendi: “Yange njili ku citumamo ca Sezale ku va pande ku nji sompesela. Ngue mu uli na kulimuena ove vavenya, ka nja lingile mulonga na umo uahi kuli vaYundeya.
11 Nga cili vene nja pokola limo lisiko kaha nja lingi umo mulonga unja pande kutsila, ka nji viana kutsa. Vunoni nga viuma vi vali naku nji vangeya kati via vusunga, uahi ali na mpoko ya ku nji hana kuli vakevo omo lia ku vaya lika ku mutima. Ngeci nji lomba nguange, cimpande cange vaka ci sompe kuli Sezale!”
12 Mu nima ya ku simutuila na civunga ca vakua kumamuna, Festu ua mu kumbuluile nguendi: “Una lombo kuya kuli Sezale, kuli Sezale vene uya.”
13 Mu nima ya amo matangua, Muangana Angilipa na Mbenisi, vezile mu Sesaliya mu ku meneka Festu.
14 Mu kulinga ue ku kele kuze matangua a engi, Festu ua hetesele cimpande ca Paulu kuli muangana, nguendi:
“Kuli umo yala ya sile Felikisi mu kamenga.
15 Mu njakele ku Yelusalema, vakuluntu va vasasendote hamolika na vakuluntu va vaYundeya, va nji lekele via cimpande cendi naku nji pinga nguavo nji mu hise.
16 Vunoni nja va kumbuluile nguange, lisiko lia Vakua Loma ka lia tavesele kuhana muntu ku mavoko a vakua ku mu vangeya, ntsimbu kanda alimone navo citona meso, linga akale na vukovelelo vua ku lihakuila ku mulonga uva na mu tuiki.
17 Ngeci mukemuo, mu va hetele kuno, lia mukuavo vuasi-vuasi nja tumamene ha citumamo cange ca vusompelo na kutuma va nehe uze yala.
18 Vakua ku mu vangeya mu va putukile ku handeka, ku va tumbuile na vimo viahi via kuvihia vi nja singanyekele kutuala hali ikeye.
19 Vunoni ka va litavasianene lika kutuala ha cimpande ca ku lemesa* vanjambi vavo, na viou yala uatsa ive kusana nguavo Yesu, vunoni Paulu ue ku tualelaho ku handeka nguendi ali na muono.
20 Mu nja honouele mua kulingila, ngeci nja muihuile nga atonda kuya ku Yelusalema vaka mu sompeseleko kutuala ha cimpande eci.
21 Vunoni omo Paulu ua pingile nguendi, va mu niungile mu kamenga noho ha ce ku hetele cimpande cendi kuli Angustu ua Kulivanga, ngeci nja tumine nguange, va mu niunge noho ha nji ka mu tumina kuli Sezale.”
22 Ngeci Angilipa ua lekele Festu nguendi: “Nange nji tonda ku halakana ou yala.” Kaha Festu ua mu kumbuluile nguendi: “Imene uka mu halakana.”
23 Lia mukuavo, Angilipa na Mbenisi vezile oku va linyuma mu ku limuesa, kaha va kovelele mu hondo ya vusompelo hamolika na vakuluntu va masualale na vamala va lutsimo va mu mbonge. Kaha Festu ua tumine vanehe Paulu, ngeci va lingilemo.
24 Festu ua handekele nguendi: “Muangana Angilipa nenu vose mua likungulula kuno, ou yala imuli na kumona, ikeye iva pingile vaYundeya vose va mu Yelusalema nava va kuno, oku va tambakana nguavo, ka pandele kuyoya.
25 Vunoni nja muene nguange, ka lingile mulonga na umo uahi ua pandele kutsila. Mu kulinga vavenya ua pingile nguendi, cimpande cendi va cituale kuli Angustu ua Kulivanga, ngeci nja mu lekele nguange, nji kutumako.
26 Vunoni viahi mpundu nji sonekela muangana uange kutuala hali ou muntu, ngeci nja mu neha ku meso enu vose kaha cikuma-kuma ku meso enu, Muangana Angilipa, linga mu nima ya ku muihula nji uane via kusoneka.
27 Muomu nja mono nguange, ka ca sungamene kutuma cindzinda, ca kuhona ku lumbununa mulonga uva na mu uana nauo.”
Matota
^ Ni “ca vulombelo vuavo”
