Vilinga Via Vapostolo 26:1-32
26 Angilipa ua lekele Paulu nguendi: “Citava uhandeke mu ku lihakuila.” Ngeci Paulu uoluele livoko na kuputuka ku lihakuila nguendi:
2 “Muangana Angilipa, njili na ndzolela ya kama lelo, muomu njili na vukovelelo vua ku lihakuila ku meso ove, kutuala ha viuma viose vi vali naku nji vangeya vaYundeya.
3 Cikuma-kuma utantekeya mua cili visemua viose via vaYundeya na kulihoya ca kala hakati kavo. Ngeci sukulukambu, nji halakane na ntsintsa.
4 “Ku handeka vusunga, muono uange tunde ku vunike, hakati ka vantu vange* na mu Yelusalema, vaYundeya vose va utantekeya vuino.
5 Vaze va nji tantekeya tundeko, nga va na zange va hasa ku nji hakuila nguavo njapuile kaFaliseu ua mu kacivunga ka kulimanena kaze ka kavele cikuma vilongesa via vulombelo vuetu.
6 Vunoni vali naku nji sompesa omo lia lulavelelo luange ku cikulaheso ca kulahesele Njambi vakukuluila vetu.
7 Cikulaheso caco, cikeco ci vali naku lavelela miyati yetu 12 linga ci lipuisemo, ngeci veku tualelaho ku pangela Njambi vutsiki na mutana. Muangana uange, vaYundeya va na nji tuika mulonga omo lia lulavelelo luaco.
8 “Omo lia vika ci li naku mi kaluuila kutsiliela nguenu Njambi a hasa kusangula vatsi?
9 Nange vene, nja muene nguange nja pande kuluisa lizina lia Yesu Mukua Nazaleta mu vinjila viose-ovio.
10 Evi vikevio vene vi nja lingile mu Yelusalema. Nja hakele vakua kulela vavengi mu tumenga muomu vakuluntu va vasasendote va nji hanene mpoko ya kulingamo. Cikuavo naua, ambe mu vakele na kutsiha vakua kulela, nange njakele naku vi hakuila.
11 Nja va yandesele kusua kumo mu visinangonga viavo viose, linga va viane lutsilielo luavo. Mu kulinga nja vavuilile mua kama matoto, nja ka yandesele vene na vaze vakele ku vimbonge via ku lahako.
12 “Mu ku tualelaho novu vutumbe, nja kutile vungendzi vua kuya ku Ndamasiku tele vakuluntu va vasasendote va na nji hana mpoko na masiko aku lingamo.
13 A Muangana! Tele njili mu njila kaha litangua tele liendela hakati, nja muene kalanganja, ceke ca kutunda muilu ca ku viakula mua kama kuhiana litangua, ca nji tuililile hamolika na vaze vakele nange.
14 Ngeci tu vose tua uililile ha mavu kaha njavuile lizi lihandeka nange mu ciHevelu ngualio: ‘Saulu, Saulu, vika nkuma uli naku nji yandesela? Kulimika* nange ni, yove vavenya lika ulivulumuna.’
15 Vunoni njehuileko nguange: ‘Muangana yove iya?’ Kaha Muangana ua nji kumbuluile nguendi: ‘Yange Yesu yuli naku yandesa.
16 Vunoni katuka. Vikevio vi nja solokela kuli yove, linga nji ku hangule upue ngamba na mukaleho ua viuma viose vi ua mono na vize vi nji ka kumuesa kutuala hali yange.
17 Kaha nji ka kuovola kuli ava vantu na kuli vakua vifuti ku nji kutuma,
18 linga utonese meso avo, uva tundise ku milima naku va neha ku ceke, uva patule ku ndzili ya Satana naku va neha kuli Njambi, linga vava konekele ku vupi vuavo naku ka tambula vusuana hakati ka vakua kulela, omo lia lutsilielo luavo muli yange.’
19 “Ngeci mukemuo, Muangana Angilipa, ka nja muesele lisino ku cize cimona ca tundile muilu,
20 vunoni ha katete, nja kambuluilile vakua Ndamasiku, mu nima yaco njaile kuli vakua Yelusalema. Kutundaho, njaile mu cifuti cose ca vaYundeya kaha na kuli vakua vifuti. Njakele naku vambuluila nguange, va pande kualuluka naku hiluka kuli Njambi, mu kulinga vipanga vi muesa ngecize va naluluka.
21 Evi vikevio via lingisile vaYundeya ku nji kuata na kutonda ku nji tsiha, tele njili mu tembele.
22 Vunoni mu kulinga Njambi ue ku nji kuasa, ngeci na lelo lino, njili naku tualelaho kuambuluila ava vavandende na vakua vukama. Kaha ka kuesi vieka vi njili naku handeka, kuvanga lika vize viva handekele Vapolofeto na Mosesa ngecize vi ka soloka,
23 nguavo Kilistu aka yanda, kaha naua, mu kulinga ikeye ua kulivanga ku mu sangula ku vatsi, akambulula ceke kuli ava vantu na kuli vakua vifuti.”
24 Kaha omo Paulu uakele naku handeka evi viuma mu ku lihakuila, Festu ua handekele na lizi lia kama nguendi: “Paulu una zaluka ove! Ku lilongesa cikuma ci li naku ku zaluisa!”
25 Vunoni Paulu ua kumbuluile nguendi: “Ku nja zalukile Festu Mukua Vukama, njili naku handeka viuma via vusunga kaha via mana.
26 Ku handeka vusunga, ou muangana unjili naku handeka nendi naku zituka cose, atantekeya mua cili evi viuma. Njili na vusunga nguange, ha viuma viose evi na vimo viahi via mu hiti, muomu ka va vi lingile mu vusueke.
27 Muangana Angilipa, vuno ua tsiliela mu Vapolofeto ni? Njili na vusunga nguange ua va tsiliela.”
28 Vunoni muangana Angilipa ua lekele Paulu nguendi: “Mu kantsimbu aka lika vene, utonda ku nji kokueya kupua Mukua Kilistu.”
29 Paulu mua vuile ngoco, ua handekele nguendi: “Nji vundila kuli Njambi nguange ambe mu ntsimbu ya kama ni ya indende kati yove lika, vunoni nava vali naku nji halakana lelo, vapue ngeci muange. Vunoni kati na ano malienge.”
30 Kaha muangana ua katukile, hamolika na nguvulu, na Mbenisi na vose vakele navo.
31 Vunoni mu va tuhukile, va putukile ku lihandekesa hakati kavo nguavo: “Viali na kulinga ou yala, kati vikevio viva na pande ku mu tsihila ni ku mu soka mu kamenga.”
32 Ngeci Angilipa ua lekele Festu nguendi: “Ou yala nga ka pingile nguendi cimpande cendi va ci tuale kuli Sezale, nga na patuka.”
