Vilinga Via Vapostolo 27:1-44
27 Mu va tu lekele nguavo tuye ku Italia na mbapolo, Paulu na vindzinda vakuavo vava kundikile mu mavoko a umo kapitau ua masualale, lizina liendi Yuliu, ua ku civunga ca masualale va Angustu.
2 Kaha tua kovelele mu mbapolo ya tundile ku Andelamitiu ya kele na kuya ku vikuma via ku muhato ua Asia, ngeci tua sunukile. Cikuavo naua, Alistaliku ua ku Tesalonika, ku muhato ua Masendonia, nendi uaile netu.
3 Lia mukuavo, tua kemanene ku Sindone, kaha Yuliu ua muesele ngozi kuli Paulu mu ku mu tavesa aka meneke vavusamba vendi linga atambule vukuasi.
4 Mu tua sunukile kuze, tua suangesele nkundu ya Sipulu mu kutina luhundzi lua kele na kuiza ku lutue luetu.
5 Tua zavukile kalunga ndonga ku hiehi na Silisia na Pamefiliya kaha tua ka tutikile ku cikuma ca Mira mu Lisia.
6 Kaha kuze, kapitau ua masualale ua uanene imo mbapolo ya tundile ku Alesandeliya, yakele na kuya ku Italia, ngeci ua tu londekelemo.
7 Mu tuakele na kuya kavundende-kavundende oku tu pinda na mbapolo mu matangua a engi, tua ka hetele ku Kenindu. Kaha omo lia luhundzi lua tu honouesele kuya ku lutue, tuongolokelele ku Salemone, mu kusuangesa nkundu ya Keleta.
8 Mu tua tualeleho kusuangesa nkundu yaco oku tu pindasiana, tua ka hetele ku cihela ci vasana nguavo Vikuma via Cili, ku hiehi na mbonge ya Laseya.
9 Mu kulinga te mua hiti ntsimbu ya laha, ku tualelaho na vungendzi capuile vusonde vua kama. Muomu ambe vene ku livindika kulia ca Litangua lia Kusambuesa,* te ca hiti laza. Ngeci Paulu ua va mamuine
10 nguendi: “Enu vamala, yange nja mono nguange, vuno vungendzi vu tu kovelesa mu vusonde vua kama; muomu kati lika mbapolo na vitenga vinonga vunoni na miono yetu vene.”
11 Vunoni mu cihela ca ku halakana Paulu, uze kapitau ua masualale ua halakanene kuli mukua kuendesa mbapolo na vavenyayo.
12 Mu kulinga cize cikuma ka capuile ca cili ku kalako mu cisika, ngeci vavengi va handekele nguavo vasunune mbapolo na kuya ku Fenikisi ku cikuma ca ku Keleta, cize ca tala ku kunto* na ku mbuela,* nga citava, cisika ci ka va hitileko.
13 Kaha omo mpundzi ya ku sulu ya putukile kuhuhua kavundende, va singanyekele nguavo va puisamo honi vutumbe vuavo vua ku ka heta ku Fenikisi. Ngeci vasomuene cikuateso ca vuato na kuputuka kusuangesa nkundu ya Keleta.
14 Vunoni mu nima ya kantsimbu ka kandende lika, kua katukile imo mpundzi ya kama ivasana nguavo Yulukilu.*
15 Mpundzi yaco, ya ku vetele ha mbapolo na ndzili ya kama kaha ka tua hasele naua ku talekesa kuze ku yakele naku tundilila. Ngeci tua likelele na kuecela mbapolo ihungumuke.
16 Tua ka hitile ku kankundu ka kandende ka vasana nguavo Kaunda, kaha tua setekele kukoka vuato* vua vundende vu tua kutiliyile ku nima ya mbapolo, vunoni ka tua hasele.
17 Vunoni mu tua hasele kukokela vuato vuaco mu mbapolo, va vu kutile mu ku hitisa mikole kuintsi lia mbapolo linga vu kole. Mu kulinga vakele na liova nguavo va hasa ku pasamena ha museke-seke* ua Silite,* ngeci va tusuile mikole ya vitenda via mbapolo, na kuecela mbapolo ilihungumukile.
18 Mu kulinga tuakele na kupinda cikuma na luhundzi, ngeci lia mukuavo tua putukile kumbila viteli mu kalunga linga mbapolo yehuke.
19 Kaha ha litangua lia mu citatu, vambilile mu kalunga viuma via kuendesa navio mbapolo.
20 Mua hitile matangua a engi, ka tua muene cipue litangua ni vintongonosi, kaha kua huhuile luhundzi lua kama cikuma. Omo liaco, tua putukile kusinganieka nguetu, kuetu ngu.
21 Mu nima ya matangua a engi ca kuhona kulia na kunua, Paulu ua katukile hakati kavo naku handeka nguendi: “Enu vamala, nga mua nji halakanene mu nja mi lekele nguange kati tu tunde mu Keleta, hano nga lamba yose eyi yahi kaha nga na vimo viahi vi ne kunonga.
22 Ambe ngoco, mu ntsimbu ino nji mi leka nguange simpenu lika, muomu na umo uahi hakati kenu atsa, mbapolo lika i nonga.
23 Muomu vutsiki vua lelo, kangelo ua Njambi, eyo, Njambi yange uze inje ku pangela na nji solokelele
24 naku nji leka nguendi: ‘Kati uivue liova Paulu. Uapande ku kemana ku meso a Sezale. Kaha tala! Njambi ovola miono ya vose vali na kuenda nove mu mbapolo.’*
25 Ngeci mukemuo enu vamala, simpenu lika. Muomu nja kulahela muli Njambi yange nguange, viuma viose via nanji leka, vilingiua ngue omuo vene mua nambe.
26 Vunoni mancimba atu nakuila ku imo nkundu.”
27 Kaha omo vutsiki vua mu litangua lia 14 vua hetele, mancimba amu Kalunga ka Andeliya, akele naku tu hungumuna oku noku, mukati ka vutsiki, vakua kusunga mbapolo vanongonuene nguavo tuli na kusuena ku cimo cifuti.
28 Ngeci va setekele kulova ca mema, va uaneneho nguavo hakele 36 m.* Kaha mu nima ya kuendako kamandende, va setekele naua, kaha va uanene nguavo ha kele 27 m.*
29 Mu kulinga tuakele na liova lia ku ka patamena ha mavue, tua hakele vikuateso viuana via mbapolo via ku nima kaha tua lavelele nguetu kuce vuasi.
30 Vunoni omo vakua kusunga mbapolo va setekele kutina, mu kusuluisa kavuato oku va likuisa ngue vali na kuhaka vikuateso via mbapolo via ku lutue,
31 Paulu ua lekele kapitau ua masualale na masualale nguendi: “Kuvanga ava vamala vakale mu mbapolo, keti ngoco ka muovoka.”
32 Ngeci masualale va vatuile mikole ya kavuato naku kecela kaue.
33 Mu kua putukile kuca, Paulu ua kanyamesele vose linga valie, nguendi: “Mua hiti matangua 14 a mua tumama mu kulavelela vati vifua viuma kaha ka mua lile na vimo viahi.
34 Ngeci mukemuo, sukulukambu mua pande kulia linga mu kale na ndzili. Muomu na umo uahi ha kati kenu, a zimbalesa ambe vene cinkambu cimo.”
35 Mu nima ya kuhandeka aa mezi, Paulo ua tambuile mbolo, ua vundilile kuli Njambi ha meso a vose, ua ipazuile na kuputuka kulia.
36 Ngeci vose va simpile kaha navo va putukile kulia.
37 Tu vose tuakele mu mbapolo tuapuile 276.
38 Mu nima ya kulia na kukuta, vombilile tiliku mu kalunga linga mbapolo yehuke.
39 Mu kua cele, va muene limo linema kuakele museke-seke, vunoni ka va tantekeyele nga ku cifuti cika kuze, ngeci va singaniekele nguavo nga va hasa, vaka tutikeko mbapolo.
40 Ngeci va vatuile mikole ya vikuateso via mbapolo naku iuisila mu kalunga, cikuavo naua, va zituile mikole ya vilapo. Kaha mu nima ya kuzangumuna ntanga ye kukuasa mbapolo kuenda, va talekesele ku uze museke-seke.
41 Kaha mu va hetele ha muava, mbapolo ya kuatele ha mavu, ngeci ntonga yayo ya ku lutue ya shitamene mu museke-seke kaha ka ya hasele kuenda. Kaha mancimba aputukile kutavuola mua kama ntonga ya ku nima.
42 Masualale mu va muene ngoco, va tondele kutsiha vindzinda vose linga na umo uahi uavo atane, na kutina.
43 Vunoni mu kulinga kapitau ua masualale ua tondele kuovola Paulu, ua va vindikile kulingamo. Ngeci ua lekele vaze va tantekeya kutana va liumbile mu kalunga linga va livange kuheta ha ntunda,
44 vakuavo ve kuizile mu nima, vamo ha mavaya, vakuavoco ha vimbaluvuila via mbapolo. Ngeci vose va hetele ha ntunda na muono.
Matota
^ Ni “kulivindika kulia ca litangua lia kukonekela”
^ Ni “nordeste”
^ Ni “sudeste”
^ Ni “mpundzi ya ku tundilila ku nordeste.”
^ Ovu vuapuile vuato vu vakele naku pangesa mu kuovola vantu.
^ Ni “vutenda”
^ Talenu Mezi ava Lombolola
^ Mu ciNgelengu “a kuovuela miono ya vose.”
^ Mu ciNgelengu “mapeka makumi avali.” –– Talenu Mizimbu ya ku Vuezako
^ Mu ciNgelengu “mapeka likumi na atanu.” –– Talenu Mizimbu ya ku Vuezako
