Vilinga Via Vapostolo 28:1-31
28 Mu tua hetele ha ntunda, tu vose tele tu novoka amba honi tu nongonone nguetu, ize nkundu ve ku isana nguavo Malita.
2 Vavenya limbo, va tu muesele ngozi naku tu tambula vuino tuvose. Mu kulinga kua kele na kunoka, kaha kua tontuele muakama, ngeci va tu vuekelele tuhia.
3 Paulu uakele na kukunga vitetele, kaha mua tambuile mukuta uaco naku uhaka ha coto, ha capulukile umo limbuambua omo lia ku yukuma, ngeci ua mu sumine naku kakatela ku livoko liendi.
4 Vavenya limbo mu va muene linoka ua vusungu na sumu Paulu kaha kasi ali na kunyengelela ha livoko liendi, va lihandekesele hakati kavo nguavo: “Mua vusunga, ou yala uapua mukua kutsiha vantu, vutuhu novoka mu kalunga ndonga vunoni vuoloke ku vua mu tavesele ku tualelelaho kuyoya.”
5 Vunoni Paulu ua mu mianguilile mu tuhia, kaha ka mu vulumuine.
6 Vutuhu ngoco, vakele naku lavelela nguavo azimba ni kuuila ha mavu na kutsa. Kaha mu va vandamenene mu ntsimbu ya laha, na kumona nguavo viahi via mu solokela, valuluile visinganieka viavo, na kuputuka ku handeka nguavo uapua njambi.
7 Ku hiehi na cize cihela, kuakele mehia a umo yala mukua vukama ua haze ha nkundu, lizina liendi Pumbiliu. Yala uaco, ua tu tambuile vuino kaha ua tu zumbuile mu matangua atatu ose.
8 Ise ya Pumbiliu, uakele ha muhela tele avavala masika-sika na musongo ua kuhitisa maninga. Kaha Paulu uaileko, ua vundilile, naku mu saleka mavoko ngeci ua mu kanguisile.
9 Mu nima yevi, vavezi vose vakele haze ha nkundu, va putukile kuiza kuli Paulu kaha uava kanguisile.
10 Cikuavo naua, va tu singimikile mu ku tu hana vuana vua vuingi kaha tele tulingila ku sunuka na mbapolo, va tu longekeyele viuma viose vi tua tondekele.
11 Mu nima ya vingonde vitatu, tua tundile haze ha nkundu na mbapolo yakele na citantekeyeso nguavo, “Vana va Zeusi.” Mbapolo yaco, ya tundile ku Alesandeliya kaha ya vandamene haze ha nkundu na ku ntsongo ya cisika.
12 Ngeci tua ka tutikile ku cikuma ca Silakusa kaha tua ka keleko matangua atatu.
13 Mu tua tundile kuze, tua tualeleho na vungendzi vuetu kaha tua ka hetele ku Lengiu. Mukua hitile litangua limo, mpundzi ya ku sulu ya katukile kaha tua ka hetele lika ku Puzolo, litangua lia mu civali.
14 Tua ka uaneneko vamo vamuanetu kaha va tu lambelele nguavo, tukale navo matangua 7, ku tundaho tuaile ku Loma.
15 Vamuanetu va ku Loma mu vavuile via muzimbu uetu, vezile vuasi kua ku liuana netu ha citanda ca Apiu ku Vindzivo via Vangendzi Vitatu. Kaha Paulu mua va muene ua santselele Njambi, ua livuile kukanyama.
16 Mu tua hetele honi mu Loma, Paulu va mu tavesele kukala likaliendi na umo lisualale ua ku mu niunga.
17 Mu nima ya matangua atatu, Paulu ua sanene vamala vakua vukama va vaYundeya. Kaha mu va likunguluile, ua va lekele nguendi: “Enu vamala, vamuanetu, vutuhu ka nja vulumuine na cimo cahi ku meso a vantu ni ku visemua via vakukuluila vetu, vunoni va njambatele mu Yelusalema ngue cindzinda naku nji hana ku mavoko a vakua Loma.
18 Mu nima ya ku njihula, va tondele ku njecela muomu ka va nji uanene na mulonga na umo uahi unja pandele kutsila.
19 Vunoni mu kulinga vaYundeya va vianene nguavo, kati va nji patule, ca nji lingisile nji pinge nguange va tuale cimpande cange kuli Sezale. Vutumbe kati vua kutuika mulonga vakua cifuti cange, houe.
20 Ngeci mukemuo, nji na pingile va mi sane linga nji handeke nenu. Muomu va na nji kutu lino lilienge omo lia lulavelelo lua vaIsaleli.”
21 Va mu kumbuluile nguavo: “Etu ka tua tambuile na umo mukanda uahi ua kutunda ku Yundeya. Cikuavo naua, ambe vene vamuanetu va na tunduko, na umo uahi na handeka via kuvihia kutuala hali yove.
22 Vunoni, tua mono nguetu, ci li kulutue tu halakane visinganieka viove, muomu ku handeka vusunga, aka kacivunga veku ka handeka mua kuvihia ku vihela viose.”
23 Ngeci vali kuminyine litangua lia ku liuana nendi, kaha vaka likungile vavengi na kuya ku ndzivo yakele. Kaha tunde ku cimene naku cinguezi, uakele naku valumbunuina via cimpande cendi oku ava hana vukaleho mu vutuntu kutuala ha Vuangana vua Njambi, oku aseteka ku va kokueya va tave Yesu, kuliya na Masiko a Mosesa na Visoneka via Vapolofeto.
24 Vamo va tsilielele via handekele, vunoni vakuavo ka va tondele ku vi tsilielela.
25 Mu kulinga ka va lizivasanene hakati kavo, va putukile kuya, kaha Paulu ua handekele aa mezi, nguendi:
“Sipilitu santu ya handekele vusunga kutuala hali vakukuluila venu ku hitila muli kapolofeto Isaya nguayo:
26 ‘Ya uka leke ava vantu nguove: “Kuivua mu kevua vunoni ka mu kevuisisa, kutala ni mu ka tala vunoni ka mu ka mono.
27 Muomu mitima yava vantu ya kaluua. Kuivua vali na kuivua, kumona vali na kumona, vunoni vali na vusitui vua kuivuisisa vi vali na kumona ni kuivua, linga mitima yavo yaluluke nji hase ku va kanguisa.”’
28 Ngeci mukemuo, tantekeyenu nguenu, ou muzimbu ua kuovoka ua kutunda kuli Njambi va na utumu kuli vakua vifuti. Kaha vakevo vaka uhalakana vene.”
29 ——
30 Ngeci Paulu uakele kuze miaka ivali ya mutuntu, mu ndzivo ya ku lifuetela, kaha uakele na kutambula vuino vose vakele na kuiza mu ku mu meneka,
31 oku avambuluila via Vuangana vua Njambi naku va longesa via Muangana Yesu Kilistu na kusimpa cose, kaha na umo uahi ua mu vindikile.
