Vilinga Via Vapostolo 3:1-26
3 Omo Petulu na Yoano vaile ku tembele ha ntsimbu ya ku vundila, ntsimbu yaco yapuile 15 ola,*
2 Vantu vamo vambatele umo yala uapuile cilema tunde ku kusemuka cendi. Tangua na tangua yala uaco vakele naku mu haka ku hiehi na mbelo ya tembele, i vakele na kusana nguavo, Mbelo ya Cili, linga a vundile vuana* kuli vaze vakele naku kovela mu tembele.
3 Omo ua muene Petulu na Yoano va kovela mu tembele, ua putukile ku va pinga vuana.
4 Vunoni Petulu na Yoano, va mu talele sui. Ngeci Petulu ua mu lekele nguendi: “Aci tutale.”
5 Ngeci uava talele, naku singanieka nguendi halumo va mu hanako vimo.
6 Vunoni Petulu ua mu lekele nguendi: “Kanjesi na palata cipue olu, vunoni nji kuhana vize vi njili navio. Mu lizina lia Yesu Kilistu Mukua Nazaleta, Enda!”
7 Ngeci ua mu kuatele ku livoko liendi lia cilio naku mu katula. Kaha haze vene, viliato viendi na tuntsendengele via kanyamene.
8 Kaha tumbu, uemanene na kuputuka kuenda. Ngoco vene, ua kovelele navo mu tembele oku a tumbozoka mu kulisamba naku sangazala Njambi.
9 Vantu vose va mu muene ali na kuenda naku sangazala Njambi.
10 Kaha va mu nongonuene nguavo, ikeye uze yala uakele naku tumama ku Mbelo ya Cili ya tembele na kulomba-lomba vuana. Ngeci vose va likomokelele mua kama naku viukilila cikuma omo lia viuma via mu solokelele.
11 Ntsimbu uze yala ua kakatelele kuli Petulu na Yoano, vantu vose va tuntilile kuli vakevo, ku cihela ci va sanene nguavo Cimbimbi ca Solomone, oku va likomokela mua kama.
12 Petulu mua mueneko, ua va lekele nguendi: “Enu vaIsaleli, vika mu likomokela ha viuma evi? Ni vika honi mu tu talela muze? Enu nguenu tua kanguisa ou yala ku ngolo yetu ni omo lia ku pangela Njambi?
13 Njambi ya Avilahama na Isake na Yakomba, eyo, Njambi ya vakukuluila vetu na haka ku vukama Ngamba yendi Yesu, uze imua hanene mu mavoko a vantu naku mu vianena ku meso a Pilato vutuhu ua tondele ku muecela.
14 Omo vene, mua vianene muntu ua kulela kaha mukua vuoloke, na kupinga nguenu va mi patuile yala uapuile mukua kutsiha vantu.
15 Mua tsihile Ntuamena Uakama ua muono. Vunoni Njambi ua mu sanguile ku vatsi kaha tu vakaleho.
16 Uno yala imuli na kumona kaha imu tantekeya, na putuka kuenda ku hitila mu lizina lia Yesu na lutsilielo luetu mu lizina liaco. Lutsilielo lu tuli naluo muli Yesu, lukeluo lua lingisa ou yala ku kanguka ha meso enu mu vose.
17 Ngeci mukemuo vamuanetu, nja tantenteya nguange mua vi lingilile ku ndzimba, ngue mu va lingile vakua ku mi sika.
18 Vunoni, eyi ikeyo njila yana puisilamo Njambi viuma viose via livangele ku handeka ku hitila muli vapolofeto vose nguendi, Kilistu uendi aka yanda.
19 “Ngeci mukemuo, alulukenu naku hiluka kuli Njambi linga va zimangane vipi vienu, linga vintsimbu via kuhuima vi ka tundilile kuli vavenya Yehova,*
20 naku mi tuma naua Kilistu iva na mi hanguila, ikeye Yesu.
21 Lilu lia pande ku mu niunga, noho ha ika hetela ntsimbu ya ku hiluisa viuma viose ngue mu via fuile ha katete, vize via handekele Njambi ku hitila mu vapolofeto vendi va kulela va ku ntsenkulu.
22 Muomu Mosesa ua handekele nguendi: ‘Yehova Njambi yenu, aka mi hanguila kapolofeto ua kulifua nange hakati ka vamuanoko, kaha mua pande ku halakana viose via mi leka.
23 Mua vusunga, uose ka halakana ou kapolofeto, Njambi aka mu nongesa linga atunde hakati ka vantu.’
24 Kaha vapolofeto vose ku putukila hali Samuele na vaze vezile munima yendi, vose va handekele ha toma kutuala ha matangua ano.
25 Enu mu vana va vapolofeto, kaha naua mu vana va litavasiano lize lia lingile Njambi na vakukuluila venu mua lekele Avilahama nguendi: ‘Ku hitila mu mbuto yove, masoko ose aha mavu aka vezika.’
26 Mu nima ya ku mu sangula, Njambi ua livangele ku mu tuma kuli yenu linga ami vezikise, naku mialuluisa mu vose mu seze vilinga vienu via kuvihia.
Matota
^ Mu ciNgelengu “9 ola”
^ Ni “vuana vua cikeketima.” —Talenu Mezi a va Lombolola
^ Talenu Mizimbu ya ku vuezako
