Vilinga Via Vapostolo 4:1-37
4 Ntsimbu Petulu na Yoano tele vacili naku handeka na mbunga, vasasendote, na kapitau ua ku tembele hamolika na vaSanduseu vezile kuli vakevo.
2 Va nyenguele mua kama, muomu vapostolo vakele naku longesa na kuambulula via cisangukilo ca Yesu.
3 Ngeci vava kuatele naku va soka mu kamenga naku litangua likuavo, muomu tele kua toko laza.
4 Vunoni vaze va halakanene ku cimpande va tsilielele, kaha vamala va hetele ku 5.000.
5 Lia mukuavo, vakua nguvulu, vakuluntu na vakua ku soneka, va likunguluile mu Yelusalema,
6 hamolika na Anase mukuluntu ua vasasendote na Kayafase, Yoano, Alesandele na vavusoko vose vou mukuluntu ua vasasendote.
7 Va hakele Petulu na Yoano hakati kavo na ku vehula nguavo: “Na ngolo ika ni mu lizina lieya mu na lingi evi viuma?”
8 Vunoni Petulu ua sulile na sipilitu santu, ua handekele nguendi:
“Enu vantuamena va vantu na vakuluntu,
9 nga lelo muli naku tuihula kutuala ha viuma via cili vi tua lingi hali ou yala ua cilema, kaha mu tonda naua ku tantekeya iya na mu kanguisa,
10 mu vose na mbunga yose ya Isaleli, tantekeyenu ngecize, ou yala imuli na kumona hakati kenu, na kanguka mu lizina lia Yesu Kilistu Mukua Nazaleta, uze imua sukikile ha citi vunoni Njambi ua mu sanguile ku vatsi.
11 Eyo ou Yesu ikeye livue, lize li mua sembuluile enu vakua kutunga, vunoni likelio linapu honi livue lia seho lia mu mbango.’*
12 Cikuavo naua, ka tu hasa ku uana kuovoka ku muntu ueka muomu ka kuesi lizina lieka hano ha mavu, lize li va hana ku vantu li tu hasa kuovokela.”
13 Kaha va likomokelele mua kama mu vamuene Petulu na Yoano, va handeka na kusimpa cose; muomu va tantekeyele nguavo vapuile vantu va ngoco kaha ka va lilongesele.* Ngeci va nongonuene honi nguavo, vendele hamolika na Yesu.
14 Mu va muene uze yala ua kangukile nemana hakati kavo, ku vakele naua na mezi aku handeka.
15 Ngeci va vatumine ku tuhuka mu Mpunga na kuputuka ku simutuila ha cimpande caco,
16 va lihuile nguavo: “Vati tulinga ava vamala? Muomu cili vene, va na lingi citantekeyeso ca ku komouesa, na vantu vose mu Yelusalema va na limuenaco kaha ka tuhasa ku ci viana.
17 Vunoni tu lingenu muze, kutina ou muzimbu utualeleho ku lisanduoka muaya vantu vose, tu va zuzuisenu naku va leka kati va handeke naua via lizina eli, ku muntu naumo uahi.”
18 Ngeci va vasanene naua naku va vindika nguavo, kati va handeke naua na vimo viahi, cipue ku longesa mu lizina lia Yesu.
19 Vunoni Petulu na Yoano vava kumbuluile nguavo: “Hiluleniho eni vavenya mumone nga cacili vene ku meso a Njambi, ku miononoka yenu mu cihela ca kuononoka Njambi.
20 Vunoni etu ka citava tu likele ku handeka viuma vi tu na limuena naku livuila.”
21 Ngeci mu nima ya ku va zuzuisa naua va vecelele vaye, muomu ka vava uanene na mulonga ua ku va hanena kasitiku. Cikuavo naua vavuile liova lia vantu, muomu vose vakele na kuhana vumpahu kuli Njambi omo lia viuma via lingikile.
22 Yala iva kanguisile ku hitila mu cikomoueso caco, uakele na miaka ituvakana 40.
23 Mu nima ya ku vecela, vaile kuli vakuavo vandongesi naku va leka viose vi vava lekele vakuluntu va vasasendote na vakuluntu.
24 Mu va vuile ngoco va likuatele kumo na kuvundila kuli Njambi nguavo:
“A Sukulu ua Kuhiana, yove ua tangele melu na mavu, kalunga ndonga na viose via kalamo,
25 yove ua handekele ku hitila mu sipilitu santu yove, muli kukuluila yetu Ndaviti ngamba yove nguove: ‘Omo lia vika vakua vifuti va nyenguele? Omo lia vika vantu va singaniekele ha viuma via ngoco?
26 Vamiangana va ha mavu va katukile na vanguvulu va likunguluile hamo, linga valuise Yehova na uze ua kuvuavesa uendi.’
27 Omo vene, Helonde na Pontiu Pilatu, vakua vifuti na vantu va mu Isaleli, va likunguluile mu mbonge ino mu kuluisa ngamba yove ua kulela, Yesu uze iua vuavesele,
28 linga valinge vize vi ua tondele tunde ku laza, ku ngolo yove* na cizango* cove nguove vi ka soloke.
29 Ngeci mukemuo Yehova, halakana mu vali naku tu zuzuisa kaha kuasa vangamba vove, va tualeleho kuambulula lizi liove na kusimpa cose,
30 ntsimbu uolola livoko liove naku kanguisa vantu na kulinga vitantekeyeso na vikomoueso ku hitila mu lizina lia ngamba yove ua kulela Yesu.”
31 Kaha mu va manusuile kuvundila,* cihela ci vakele ca ningangeyele kaha vose va sulile na sipilitu santu na kuputuka kuambulula lizi lia Njambi na kusimpa.
32 Cikuavo naua, mbunga ya vaze va tsilielele, yakele na mutima umolika na muono* umolika kaha na umo uahi hakati kavo uakele naku handeka nguendi, viuma viakele navio viapuile lika viendi vunoni vakele naku lipangezela viose vi vakele navio.
33 Na ndzili yose, vapostolo va tualeleho kuhana vukaleho vua cisangukilo ca Muangana Yesu. Kaha vose Njambi ua va vezikisile cikuma mu ku va muesa ngozi ya kama.
34 Mua vusunga, na umo uahi hakati kavo ua kambelele vimo muomu vose vaze vakele na mehia avo ni vindzivo viavo, va vi landesele kaha va nehele vimbongo viva uanene,
35 naku vihana kuli vapostolo. Vapostolo co, va vi pangelele muntu ku muntu kuliya na kukalekeya cendi.
36 Evi vikevio via lingile Yosefe, umo kaLevi ua semukilile ku Sipulu, u vakele na kusana naua vapostolo nguavo Mbanambasa (ku lumbunuka “Mukua Kulembezieka”),
37 uakele na lihia liendi ngeci ua lilandesele kaha ua nehele vimbongo naku vihana ku vapostolo.
Matota
^ Mu ciNgelengu “linapu mutue ua mu mbango.”
^ Ca lumbunuka ngecize, ku vaile ku masikola ava Lambi, kati nguavo ka va tantekeyele ku tanda na ku soneka.
^ Ni “na livoko liove”
^ Ni “kumamuna”
^ Ni “kulambelela”
^ Talenu Mezi ava Lombolola
