Vilinga Via Vapostolo 6:1-15
6 Ku matangua aze omo vandongesi va tualeleho ku livuezelela, vaYundeya vaze vakele naku handeka ciNgelengu, vaputukile kutatuoka kutuala ha vaYundeya vaze vakele naku handeka ciHevelu, muomu tangua na tangua mu vakele naku tepela viakulia ku vantuluue, vantuluue vavo ka vakele naku va hana.
2 Ngeci vaze 12, va kunguluile mbunga ya vandongesi na ku va leka nguavo: “Kati cacili* kuli yetu, tuseze ku longesa lizi lia Njambi, tu putuke ku pangezela viakulia ha vimesa.
3 Ngeci mukemuo vamuanetu, hangulenu vamala 7 hakati kenu, vali na lutsimo lua cili, va na sulu na sipilitu na mangana kaha mu ka vaneha kuno linga tu va kundike eci cipanga ca seho.
4 Linga yetuco tu tuale mana ku kuvundila naku cipanga ca ku longesa lizi lia Njambi.”
5 Oyo nguli yaile ku mitima ya vantu vose, ngeci va hanguile Setefano yala ua lutsilielo kaha ua kusula na sipilitu santu na Filipu, Polokolu, Nikanole, Timone, Palemenase na Nikolau mukua Antioka uze ua lipuisile kaYundeya.
6 Vava nehele ku vapostolo kaha mu nima ya kuvundila vava salekele mavoko.
7 Omo liaco, lizi lia Njambi lia tualeleho ku lisanduoka kaha vandongesi va tualeleleho ku livuezelela mua kama mu Yelusalema. Cikuavo naua, vasasendote vavengi va putukile kutsiliela.
8 Kaha Setefanu uze ua sulile na kavumbi ka Njambi na ngolo, uakele na kulinga vitantekeyeso na vikomoueso via kama hakati ka vantu.
9 Vunoni kuezile vamo vamala vakua Sinangonga iva sanene nguavo, ya Vantu va Kupatuka hamolika na vakua Silene vakua Alesandeliya, vakua Silisia na vakua Asia, va putukile ku cokotesa Setefanu.
10 Vunoni ka va hasele ku mu hiana ku mana naku sipilitu santu ya mu kuasele ku handeka.
11 Ngeci va songangeyele vantu mu vusueke va handeke nguavo: “Tua muivu a handeka mezi aku sahula Mosesa na Njambi.”
12 Kaha va sangumuine vutenu vua vantu, vakuluntu na vakua ku soneka, ngeci va mu kungulukilile naku mu kuata kaha va mu tualele ku Mpunga.
13 Kaha vanehele vakaleho va makuli va handekele nguavo: “Ou yala ntsimbu yose ali naku sahula cino cihela ca kulela na Masiko.
14 Ca ku muenako, tuavuile a handeka nguendi, Yesu Mukua Nazaleta aka puzula cino cihela na kualulula Masiko atu hanene Mosesa.”
15 Kaha vose va tumamene mu Mpunga, mu va mu talele sui ku meso, va muene nguavo kua fuile ngue ku meso a kangelo.
Matota
^ Mu ciNgelengu “ka cimoneka vuino”
