Vilinga Via Vapostolo 7:1-60
7 Vunoni sasendote ua kama ua muihuile nguendi: “Evi viose vi nji nevu, via vusunga?”
2 Setefanu ua kumbuluile nguendi: “Enu vamala, vamuanetu nenu vatate, halakanenu. Njambi ua vumpahu, ua solokelele kukuluila yetu Avilahama muakele ku Mesopotamia, tele kanda aci ka tunge ku Halane.
3 Ua mu lekele nguendi: ‘Seza cifuti cove na vavusoko vove, kaha ya ku cifuti ci njika kumuesa.’
4 Ngeci ua tundile mu cifuti ca vakua Kalendeya, naku ka tunga ku Halane. Kaha mua tsile ise, Njambi ua mu lekele aka tunge mu cifuti cino cimuli na kuyoyela lelo lino.
5 Ambe ngoco, ka mu hanene vusuana na vumo vuahi mu cifuti cino, ambe vene cihela ca kuliatela; vunoni ua mu kulahesele ku mu hana cino cifuti mu kupua vusuana vuendi naku ci hana ku mbuto yendi, vutuhu mu ntsimbu ize tele kanda aci kale na muana.
6 Cikuavo naua, Njambi ua mu lekele nguendi vana* vendi va kapua vakua kulisuka mu cifuti cambala, kaha vaka vapuisa vandungo naku va yandesa mu miaka 400.
7 Kaha Njambi ua mu lekele naua nguendi: ‘Njika sompesa cifuti cize ci ka vapuisa vandungo. Mu nima yaco, vaka tundamo kaha vaka nji lingila vipanga via kulela mu cifuti cino.
8 “Ua lingile naua nendi litavasiano lia kulovoka, kaha Avilahama ua semene Isake naku mu lovola mu litangua lia mu 8, Isake co ua semene Yakomba, Yakomba ua semene mitue ya masoko va kupua 12.
9 Kaha eyi mitue ya masoko, vevuilile Yosefe cipululu ngeci va mu landesele ku vakua Ingitu. Vunoni Njambi uakele nendi.
10 Ua muohielele ku tuyando tuendi tuose naku mu hana mangana, ngeci Falao muangana ua Ingitu, ua mu lemene mua kama. Omo liaco, ua mu puisile nguvulu mu Ingitu na ndzivo yendi yose.
11 Vunoni mu Ingitu yose na mu Kanana, muezile njala ya kama, eyo, lamba ya kulinga na ha meso vui. Ngeci vakukuluila vetu, ka va uanene viakulia.
12 Vunoni Yakomba uevuile nguavo ku Ingitu kuli viakulia, ngeci ua tumineko vakukuluila vetu lua ku livanga.
13 Mua va tumineko lua mu civali, Yosefe ua lisoluele kuli vamuanaye kaha Falao ua tantekeyele vusoko vua Yosefe.
14 Ngeci Yosefe ua tumine kusana ise Yakomba na vusoko vuendi vuose; mu ku va tanda, vose vapuile 75.
15 Kaha Yakomba ua sikumukile ku Ingitu, kukekuo kua ka tsililile kaha na vakukuluila vetu naua.
16 Ngeci vava tualele ku Sekeme, naku va tsinda ku cihilo cize ca landele Avilahama na vimbongo via palata kuli vana va Hamole mu Sekeme.
17 “Omo ntsimbu ya ku puisamo cikulaheso ca lingile Njambi kuli Avilahama ya kele mu hiehi, vaIsaleli va lisemunuinine na kulana cikuma mu Ingitu.
18 Vunoni kua katukile muangana ueka ua putukile kusika Ingitu, uze ka tantekeyele Yosefe.
19 Muangana uaco ua pangesele makuli mu kualulukila muyati uetu. Ua yandesele vakukuluila vetu naku va sindiya va mbile tukeke vavo linga vatse.
20 Ha ntsimbu eyi, hakeho ha semukilile Mosesa. Kaha uapuile ua cili cikuma. Va mu lelele vingonde vitatu mu ndzivo ya ise.
21 Vunoni mu va mumbilile kuti, muana Falao ua mpuevo ua muambatele kaha ua mu lelele ngue munendi.
22 Ngoco vene, Mosesa va mu longesele mangana ose a vakua Ingitu. Kaha uakele na ndzili mu mezi na mu vilinga viendi.
23 “Vunoni mua puisile miaka 40, ua vuile cizango ca kuka meneka vamuanaye vana vaIsaleli.
24 Vunoni omo ua muene umo uavo vali naku mu linga mua kuvihia, ua muohielele. Na vutumbe vua ku linguila muanaye, ua tsihile uze mukua Ingitu.
25 Ikeye ua singaniekele nguendi halumo vamuanaye vanongonona nguavo, Njambi ali naku vovola ku hitila muli ikeye, vunoni ku vaci nongonuene.
26 Lia mukuavo, uaile kuli vakevo naua, ua uanene va lipupa ngeci uesekele ku va kanda mu ciyulo nguendi: ‘Enu vamala, enu mu vamuanoko. Amba vika honi mu lipupila?
27 Vunoni uze uakele na kupupa mukuavo, ua nakuile Mosesa naku muamba nguendi: ‘Iya naku hangula kupua mukua ku tu tumina na ngazi hakati ketu?
28 U tonda ku nji tsiha ngue mu unaka tsihile izau mukua Ingitu?’
29 Mosesa muavuile ngoco, ua tinine. Kaha uaka puile ngendzi mu cifuti ca Mindiane muze mua ka semenene vana vavali va vamala.
30 “Mu nima ya miaka 40, kangelo ua mu solokelele mu likango lia ku Muncinda ua Sinayi mu mulengi ua tuhia uakele naku lekuka mu ciputa.
31 Mosesa mua ci muene, ua likomokelele muakama. Vunoni mua sueneneko linga aci talesese muacili, uevuile lizi lia Yehova ngualio:
32 ‘Yange Njambi ya vakukuluila vove; Njambi ya Avilahama, na Isake na Yakomba.’ Ngeci Mosesa ua putukile kuzaza kaha ka hasele naua ku talako.
33 Kaha Yehova ua mu lekele nguendi: ‘Sulula vinkaku viove muomu cihela ci unemana cinapu ca kulela.
34 Njina mono kayando ka vantu vange mu Ingitu, kaha nji nevu mivindzo yavo ngeci nji neza nja ku vohiele. Ngeci mukemuo, tuaya nji ku tume ku Ingitu.’
35 Uze vene Mosesa uva vianene naku handeka nguavo: ‘Iya na kupuisa mukua ku tu sika na ngazi yetu?’ Ikeye ya tumine Njambi mu kupua ntuamena na muovole ku hitila muli kangelo uze ua mu solokelele mu ciputa.
36 Uze yala, ua va tundisile mu Ingitu na kulinga vitantekeyeso na vikomoueso via vingi mu Ingitu, mu cisali ca kutila na mu likango mu miaka 40.
37 “Ikeye vene naua Mosesa ua lekele vana vaIsaleli nguendi: ‘Njambi aka mi hanguila kapolofeto ua kulifua nange hakati ka vamuanoko.’
38 Ou Mosesa, ikeye uakele hamolika na cikungulukilo mu likango, ikeye naua uakele hamolika na kangelo uze ua handekele nendi ha Muncinda ua Sinayi, kasi ikeye naua vene, uakele na vakukuluila vetu kaha ua tambuile mezi a kulela na muono, naku tuambuluilao.
39 Vakukuluila vetu va vianene ku muononoka kaha va mu sembuluile. Mitima yavo ya hilukile ku Ingitu.
40 Va lekele Alone nguavo: ‘Tu pangele vanjambi va tu tuamenena. Muomu ka tu tantekeya vi na solokela ou Mosesa ua tu tundisile mu cifuti ca Ingitu.’
41 Ngeci va pangele kamponya ua muana ngombe kaha va mu nehelele milambu na kuputuka ku livuisa ndzolela na vipanga via mavoko avo.
42 Ngeci Njambi ua va talekesele nima naku vecelela va pangele vivunga via muilu, ngue mu va soneka mu mukanda ua Vapolofeto nguavo: ‘Enu vaIsaleli, ize milambu na vikombelo vimua hanene mu likango mu miaka 40, kuli yange mua vihanene ni?
43 Houe. Vunoni muambatele mbalaka ya Moloke, na ntangantanga* ya njambi Lefane, vaze tumponya va mua pangele linga mu va lemese. Ngeci mukemuo, njika mi sekuila ku lahako ku tuvakana Mbambilone.
44 “Vakukuluila vetu, vakele na mbalaka* ya vukaleho mu likango kuliya na masiko a hele Njambi kuli Mosesa nguendi, a ipange kusetekesa na ize ya muene.
45 Vakukuluila vetu, va isuanene kaha hamolika na Yehosua va kovelele nayo mu cifuti ca vakua mavu, vaze va a sekuile Njambi ku meso a vakukuluila vetu. Kaha ya kelemo kuheta naku matangua a Ndaviti.
46 Ndaviti uaile Njambi ku mutima, kaha ua vundilile civezikiso ca ku tungila Njambi ya Yakomba ndzivo.
47 Vunoni Solomone ikeye ua tungilile Njambi ndzivo.
48 Vutuhu ngoco, Mukua ku Hiana Viose ke kukala mu vindzivo via kutunga na mavoko a vantu. Ngue mua handekele kapolofeto nguendi:
49 ‘Lilu, liapua citumamo cange ca Vuangana, kaha mavu apua cituamo ca viliato viange. Amba ndzivo ya cifua cika muhasa ku nji tungila? Nguendi Yehova. Ni cipue cihela cange ca ku huimina, cili kuli?
50 Nkuma kati livoko liange lia tangele viuma viose evi ni?’
51 “Enu vakua vimpata na mitima ya ku kaluua, mua soko mitima yenu, na kuzika matuitui enu,* ntsimbu yose muli na kuviana sipilitu santu; ngue mu va lingile vakukuluila venu, mukemuo nenu mu muli na kulinga.
52 Kapolofeto muka ka va yandesele vakukuluila venu? Ku handeka vusunga, va tsihile vaze va handekele vualumo via kuiza ca mukua vuviuke uze imuendele vungungu naku mu tsiha.
53 Yenu mua tambuile lisiko ngue muze mu va miambuluilelio tungelo vunoni ka mua liniungile.”
54 Vunoni mu nima ya kuivua evi viuma, vavuile vene ku mutima vo, ngeci vaputukile kulisumanga ku mazo.
55 Kaha Setefanu ua sulile na sipilitu santu. Mua talele muilu, ua muene vumpahu vua Njambi na vua Yesu nemana ku livoko lia Njambi lia cilio.
56 Kaha ua handekele nguendi: “Talenu! Njili na kumona lilu lia sokoloka kaha Muana muntu nemana ku livoko lia Njambi lia cilio.”
57 Mu vavuile ngoco va tambekele na lizi lia kama na kuzika mu matuitui avo na mavoko kaha vose va mu kungulukilile.
58 Mu nima ya ku mumbila hambandza ya mbonge, va putukile ku muasa mavue kaha vakaleho va lundikile vizalo viavo via helu ku mikono ya umo mukuendze ua lizina Saulu.
59 Omo Setefanu vakele naku muasa mavue, ua lambelelele Yesu nguendi: “Muangana Yesu, tambula muono uange.”
60 Kaha ua tsikamene naku tambeka na lizi lia kama nguendi: “Yehova kati uhane ava vantu mulonga omo liovu vupi.” Mua manusuile ku handeka ngoco, ua kosele tulo va kutsa.
Matota
^ Ni “mbuto”
^ Ni “ntongonosi”
^ Ni “tavenakulu”
^ Mu ciNgelengu “vilima mu mitima na mu matuitui”
