Vilinga Via Vapostolo 9:1-43
9 Vunoni omo Saulu ua ci kele na kuhalela vandongesi va Muangana Yesu na kutonda ku va tsiha, uaile kuli sasendote ua kama
2 naku mu pinga mikanda ya kuya nayo ku visinangonga via ku Ndamasiku linga aka kute vamala na vampuevo vose vali na kuendela mu Njila ya Muangana, naku va tuala ku Yelusalema.
3 Muakele mu vungendzi vuaco, ua hetele kuhiehi na Ndamasiku kaha haze vene ua muene kalanganja, ceke ca kutunda muilu ca mu tuililile.
4 Ngeci ua uililile ha mavu kaha uavuile lizi li handeka nendi ngualio: “Saulu, Saulu, vika nkuma uli naku nji yandesela?”
5 Kaha ikeye uehuileko nguendi: “Muangana, yove iya?” Ngeci lizi lia mu kumbuluile ngualio: “Yange Yesu yuli na kuyandesa.
6 Vunoni katuka, kovela mu mbonge kaha va ka kuleka vi ua pande kulinga.”
7 Na vamala vaze vendele nendi, vatsile cintsima muomu vavuile lizi vunoni ka va muene muntu na umo uahi.
8 Kaha Saulu ua katukile, vutuhu ua tonene vunoni ka muene na vimo viahi. Ngeci va mu kuatele ku livoko naku mu tuala mu Ndamasiku.
9 Mu matangua atatu ose, ka hasele kumona na vimo viahi kaha kalile cipue kunua.
10 Ku Ndamasiku kuakele umo ndongesi lizina liendi Ananiya kaha Muangana ua mu sanene mu cimona nguendi: “Ananiya!” Kaha ikeye ua mu kumbuluile nguendi: “Yange uno Muangana.”
11 Muangana ua mu lekele nguendi: “Katuka, ya ku tapalo iva tumbula nguavo ya Kusungama uka tonde umo yala ua lizina Saulu ua ku Talusu, ali ku ndzivo ya Yundase. Muomu mu ntsimbu ino ali na kuvundila.
12 Mu cimona, na mono umo yala uva sana nguavo Ananiya, na kovela mu ndzivo yali, naku mu saleka mavoko linga amone naua.”
13 Vunoni Ananiya ua kumbuluileko nguendi: “Muangana, ou muntu na tsimana omo lia viuma viavingi via kuvihia, via na lingi ku vantu vove va kulela mu Yelusalema.
14 Kaha kuno, vakuluntu va vasasendote va na mu hana mpoko ya kukuta* vose vasana ha lizina liove.”
15 Vunoni Muangana ua mu kumbuluile nguendi: “Ya! Muomu ou yala, napu cikuata ca kuhangula kuli yange linga a kambulule kuli vakua vifuti, ku vamiangana na vana vaIsaleli.
16 Muomu njika mu muesa ha toma tuyando tuose tua na pande kuhita, omo lia lizina liange.”
17 Ngoco vene, Ananiya uaile kaha ua kovelele muze mu ndzivo, ua mu salekele mavoko naku mu leka nguendi: “Muanetu Saulu, Muangana Yesu uze ua ku solokelele mu njila mu uakele na kuiza, na nji tumu kuno nji kanguise meso ove linga umone kaha naua usule na sipilitu santu.”
18 Haze vene, ha meso endi ha lahukile vimo ngue mavanda kaha ua putukile kumona. Ngeci ua katukile kaha va mu mbatizile,
19 mu nima yaco ualile kaha uakele na ndzili.
Uakele ku Ndamasiku hamolika na vandongesi mu amo matangua.
20 Kaha haze vene, ua putukile kuambulula via Yesu mu visinangonga nguendi, Yesu ikeye Muana Njambi.
21 Vunoni vose va mu vuile va likomokelele cikuma naku handeka nguavo: “Ou yala kati ikeye uakele na kuyandesa vantu mua vukenya mu Yelusalema, vaze vose vakele naku tumbula lizina lia Yesu? Nkuma kezile kuno na vutumbe vua ku va kuta linga ava tuale ku vakuluntu va vasasendote?”
22 Vunoni Saulu ua tualeleho kukala na ndzili kaha ua komouesele mua kama vaYundeya vose vakele ku Ndamasiku, muakele naku va lumbunuina vuino nguendi, Yesu ikeye Kilistu.
23 Kaha mu nima ya matangua a engi, vaYundeya va likuminyine ku mu tsiha.
24 Vunoni Saulu uavuile via vutumbe vua kutonda ku mu tsiha. Kaha vakele na kuniunga mapito vutsiki na mutania linga va mu tsihe.
25 Ngeci vandongesi vendi va muambatele, kaha ku vutsiki va mu hakele mu civuvi naku mu suluisila ha katuntu ka civumbe.
26 Mua ka hetele ku Yelusalema, ua lihakelele kapandi ka ku lipandakana na vandongesi. Vunoni vose va muivuilile liova muomu ku va kulahelele nguavo uapuile honi ndongesi.
27 Ngeci Mbanambasa ua mu kuasele naku mu tuala ku vapostolo. Kaha ua va lumbunuine viose kutuala ha vati Saulu ua muene Muangana mu njila, na vati Muangana ua handekele nendi. Cikuavo naua, ua va lumbunuine vati Saulu uambuluile na kusimpa cose mu lizina lia Yesu ku Ndamasiku.
28 Ngeci Saulu uakele hamo navo, ua liendelele mu ku zituka* mu Yelusalema na kuambulula na kusimpa cose mu lizina lia Muangana.
29 Uakele naku handeka na kulihoya na vaYundeya vakua ku handeka ciNgelengu, vunoni va tondele ku mu tsiha.
30 Vunoni vamuanaye mu va vivuile, va mu tualele ku Sesaliya kaha naku mu tuma ku Talusu.
31 Kaha cikungulukilo mu Yundeya yose, mu Ngalileya na mu Samaliya, cakele mu ciyulo kaha ca kanyamene. Mu kulinga ca tualeleho ku singimika Yehova; naku tambula ku lembezieka ku hitila mu sipilitu santu, ca tualeleho ku livuezelela.
32 Mu kulinga Petulu uakele naku hitangana muaya membo ose, ngeci ua ka menekele vaze vakua kulela vakele ku Linda.
33 Kaha ua ka uaneneko umo yala ua lizina Enease, uze uakele ha muhela miaka 8 muomu uakele na kalepa.
34 Ngeci Petulu ua mu lekele nguendi: “Enease, Yesu Kilistu aku kanguisa. Hinduka, ala muhela uove.” Kaha haze vene ua hindukile.
35 Vantu vose vakele mu Linda na mu Salone mu vavi muene, va tsilielele muli Muangana.
36 Mu mbonge ya Yopa muakele umo ndongesi lizina liendi Tambita lia lumbunuka “Ndolokase.”* Mpuevo uaco, uakele na kulinga vipanga via cili viavingi na kutetela vihutu mu ku va hana vuana.
37 Ku matangua aze, ua vavalele ngeci ua tsile. Kaha va mu tanesele naku mu langeka mu hondo ya helu.
38 Mu kulinga Linda yakele ha hiehi na mbonge ya Yopa, kaha vandongesi vavuile nguavo Petulu ali mu mbonge yaco, va tumine vamala vavali va ka mu lambelele nguavo: “Sukulukambu tuntila kuno.”
39 Ngeci haze vene, Petulu ua katukile na kuya navo. Mua ka heteleko, va mu tualele mu hondo ya helu kaha vantuluue vose vezile kuli ikeye vakele naku linyenga na kulila, oku va mu muesa vizalo via helu na vizalo vikuavo viavingi, via va tongelele Ndolokase tele acili na muono.
40 Petulu ua tumine vose va tuhuke hambandza kaha ua tsikamene na kuvundila. Mu nima yaco, ua tengulukile na kutala ku civimbi nguendi: “Tambita, hinduka!” Ngeci Tambita uemukile kaha mua muene Petulu ua hindukile na kutumama.
41 Petulu ua mu kuatele ku livoko naku mu katula. Ngeci ua sanene vaze vakua kulela na vantuluue kaha ua va haneneye na muono.
42 Kaha ou muzimbu ua tsimanene mu mbonge yose ya Yopa, ngeci vavengi va tsilielele muli Muangana.
43 Kaha Petulu uakele mu Yopa matangua a engi, ku ndzivo ya Simone mukua ku kotongola vilambu.
Matota
^ Mu ciNgelengu “ku haka mu malienge”
^ Mu ciNgelengu “uakele naku kovela naku tuhuka”
^ Mu ciNgelengu Ndolokase, mu ciAlamaiku Tambita. Mazina ose avali a lombonoka “Mbambi.”
