Kuhitila Muli Yoano 4:1-54
4 Omo Muangana ua nongonuene nguendi vaFaliseu va nevu nguavo ali na kupuisa vantu vavengi vandongesi naku va mbatiza kuhiana Yoano—
2 vutuhu kati Yesu mpundu uakele na kumbatiza vantu vunoni vandongesi vendi—
3 ngeci ua tundile mu Yundeya na kuhiluka naua ku Ngalileya.
4 Vunoni ua pandele kuhita mu Samaliya.
5 Ngeci ua kovelele mu imo mbonge ya mu Samaliya iva sana nguavo Sikale, ku hiehi na cihela ca hele Yakomba kuli muanendi Yosefe.
6 Kukekuo kuakele lisima lia Yakomba. Mu kulinga Yesu tele na hono omo lia vungendzi, uaka tumamene kuze ku lisima. Eyi yapuile 12 ola.*
7 Umo mpuevo mukua Samaliya uezile mu kutekula mema. Ngeci Yesu uamu lekele nguendi: “Nji haneko mema a kunua.”
8 (Muomu vandongesi vendi tele vanayi mu mbonge mu kulanda viakulia.)
9 Ngeci uze mpuevo mukua Samaliya uehuile Yesu nguendi: “Yove u kaYundeya, vati upinga mema kuli yange mukua Samaliya?” (Muomu vaYundeya ka ve ku lizivasana na vakua Samaliya.)
10 Yesu uamu kumbuluile nguendi: “Nga ua tantekeyele vuana vua Njambi, naku tantekeya ou na kupingi nguendi, ‘Nji haneko mema a kunua,’ nga una mu pingi kaha ikeye nga na kuhana mema a muono.”
11 Uze mpuevo uamu kumbuluile nguendi: “Muata, ove na ciyenjo ca kutekuisa mema cahi, kaha eli lisima lia lova. Amba oo mema a muono, u auana kuli?
12 Nkuma ua hiana kukuluila yetu Yakomba, uze uatu hele lino lisima mua nuine na vana vendi na vimuna vendi ni?”
13 Yesu uamu kumbuluile nguendi: “Uose anua aua mema akevua naua mpuila.
14 Vunoni uose anua mema anji mu hana, ka katsi naua mpuila. Muomu mema anji mu hana aka himpuka ndundzi ya mema ika sumpuoka* muli ikeye, na kuhana muono ka ue kuhua.”
15 Mpuevo uamu kumbuluile nguendi: “Muata, nji haneko ni oo mema, linga kati njitse naua mpuila, ni cipue kati njize-ize kuno mu kutekula mema.”
16 Yesu uamu lekele nguendi: “Yaka sane yaliove linga muize kuno.”
17 Uze mpuevo uamu kumbuluile nguendi: “Kanjesi na yala.” Yesu uamu lekele nguendi: “Uli na vusunga vua kuhandeka nguove, ‘Kanjesi na yala.’
18 Muomu ua sombokele ku vamala vatanu, kaha yala iuli nendi mu ntsimbu ino kati yaliove. Vusunga una handeka.”
19 Uze mpuevo uamu lekele nguendi: “Muata, nja mono nguange nkuma u kapolofeto.
20 Vakukuluila vetu vakele naku lemesela hano ha muncinda, vunoni yenu nguenu vantu va na pande kuka lemesela mu Yelusalema.”
21 Yesu uamu lekele nguendi: “Tava mezi ange ove mpuevo, muomu ola ili na kuiza omo ka muka lemesela naua Tata ha muncinda ou, cipue mu Yelusalema.
22 Yenu mue kulemesa vize ka mu tantekeya. Vunoni etu tue kulemesa vi tu tantekeya, muomu vuovoke vu tundilila ku vaYundeya.
23 Vutuhu ngoco, ola ili na kuiza kaha ikeyo vene ino, omo vakua kulemesa va vusunga vaka lemesa Tata mu sipilitu na mu vusunga, muomu cili vene, vantu va cifua eci vakevo va ali na kutonda Tata vamu lemese.
24 Njambi uapua sipilitu, kaha vaze vamu lemesa va na pande kumu lemesa mu sipilitu namu vusunga.”
25 Uze mpuevo uamu lekele nguendi: “Nja tantekeya nguange, Mesiya iva sana nguavo Kilistu ali na kuiza. Kaha omo akeza, aku tu lumbunuina ha toma viuma viose.”
26 Yesu uamu lekele nguendi: “Ange njili na kuhandeka nove, yange vene ikeye.”
27 Haze vene, vandongesi vendi va hetele, kaha va likomokelele muomu uakele na kuhandeka na mpuevo. Vunoni naumo uahi ua hasele ku muihula nguendi: “Vika utonda?” ni “Vika uli naku handekela nou mpuevo?”
28 Ngeci uze mpuevo ua sezele njava yendi ya mema, uaile mu mbonge naku ka leka vantu nguendi:
29 “Tuayenu mua ku mone uno yala nanji leka viose vinja lingile. Kati ikeye Kilistu?”
30 Ngeci mbunga yose ya tundile mu mbonge na kuya kuli ikeye.
31 Ha ntsimbu yaco vandongesi vendi vakele naku mu lambelela nguavo: “Lambi, aci lieko vimo.”
32 Yesu uava kumbuluile nguendi: “Njili na viakulia vintsa ka mu tantekeya yenu.”
33 Ngeci vandongesi va putukile kulihula umo na mukuavo nguavo: “Vuno kuli umo namu nehela viakulia ni?”
34 Yesu uava lekele nguendi: “Viakulia viange, kulinga cizango ca uze uanji tumine naku manusula cipanga cendi.
35 Kati mue kuhandeka nguenu kua lisupu vingonde viuana linga ntsimbu ya kutia ihete ni? Halakanenu! Nji mileka nguange: Andulenu meso enu mu tale mehia, vimbuto vinahi laza, via lavelela ku vitia. Mu ntsimbu ino vene.
36 Mukua kutia ali na kutambula fueto, naku kungulula vusuka vua muono ka ue kuhua, linga mukua kukuva na mukua kutia va viukilile hamolika.
37 Ngeci mukemuo, mezi ava handeka nguavo: Umo mukua kukuva, mukuavo mukua kutia, apua a vusunga.
38 Nja mi tumu mu katie vize ka mua limine. Vakuenu va na fuitangana, vunoni enu mua uana vukuasi ku ku fuitangana cavo.”
39 Vakua Samaliya vavengi va muze mu mbonge va tsilielele Yesu, omo lia vukaleho vua ambuluile uze mpuevo nguendi: “Nanji leka viose vinja lingile.”
40 Kaha vakua Samaliya mu vezile kuli Yesu, vamu lambelele linga akale navo, ngeci uakele navo matangua avali.
41 Omo liaco, vantu vavengi navo va tsilielele omo lia viuma via handekele,
42 kaha va lekele uze mpuevo nguavo: “Ka tua tsilielele lika omo lia viuma viu na tu lekele, vunoni netu vavenya tua livuila, tua tantekeya honi nguetu mua vusunga ou yala ikeye muovole ua mavu.”
43 Kaha mu ahuile aze matangua avali, ua tundile kuze na kuya ku Ngalileya.
44 Vutuhu vavenya Yesu uakele na kuhandeka nguendi, kapolofeto ka veku mu singimika muimbo liendi.
45 Vunoni mua kovelele mu Ngalileya, vakua Ngalileya vamu tambuile muacili, muomu va limuenene viuma viose via lingile ku cilika mu Yelusalema, muomu navo ku vaile ku cilika caco.
46 Yesu uaile naua ku Kana ya mu Ngalileya, kuze kua himpuilile mema kupua vinyu. Mu Kapenama, muakele umo kapitau ua muangana kaha muanendi uakele na kuvavala.
47 Uze kapitau muavuile nguavo Yesu na tundu ku Yundeya na kuiza mu Ngalileya, uaile kuli Yesu na kupinga nguendi aka kanguise muanendi, muomu tele alingila kutsa.
48 Vunoni Yesu uamu lekele nguendi: “Enu nga ka mua muene vitantekeyeso na vikomoueso, ka mu tsiliela.”
49 Kapitau ua lekele Yesu nguendi: “Muangana, tuye, ntsimbu muanange kanda atse.”
50 Yesu uamu lekele nguendi: “Citava uye, munove ali na muono.” Uze kapitau ua tsilielele mu mezi a Yesu ngeci uaile.
51 Muakele naku sikumuka, ua liuanene na vangamba vendi vamu lekele nguavo muanendi ali na muono.*
52 Ngeci ua vehuile nga ola ika ua kangukile. Vamu kumbuluile nguavo: “Masika-sika anaka mu huile izau ku vi 13 ola.”*
53 Ngeci uze ise ya muana ua nongonuene nguendi, ha ola yaco hakeho ha mu lekelele Yesu nguendi: “Muanove ali na muono.” Ngeci ikeye na vakua ndzivo yendi vose va tsilielele.
54 Eci cikeco citantekeyeso ca mu civali ca lingile Yesu, mua tundile ku Yundeya na kuiza mu Ngalileya.
Matota
^ Mu ciNgelengu “ola ya mu 6.”
^ Ni “ku vueloka”
^ Ni “ali naku kanguka.”
^ Mu ciNgelengu “ha ola ya vu 7.”
