Kuhitila Muli Yoano 9:1-41
9 Omo Yesu uakele na kuhita, ua uanene umo yala ua semukile kapuputa.
2 Ngeci vandongesi vendi va muihuile nguavo: “Lambi, iya ua lingile vupi linga ou yala asemuke kapuputa? Vuno ikeye vene ni visemi vendi?”
3 Yesu uava kumbuluile nguendi: “Ou yala ka lingile vupi na vumo vuahi, ambe visemi vendi. Vunoni via fuilemo linga vipanga via Njambi vi lisolole kuhitila muli ikeye.
4 Tua pande kulinga vipanga via Uze uanji tumine ntsimbu ku ci li mutana, muomu vutsiki vuiza omo naumo uahi aka hasa kupanga.
5 Ntsimbu njicili ha mavu, nji ceke ca mavu.”
6 Mua manusuile kuhandeka ngoco, ua zekuilile ha mavu, ua tikile livu na malendzi, ngeci uambatele lize livu na kulikuita ha meso a kapuputa.
7 Kaha uamu lekele nguendi: “Ya ku cisali ca Siloame uka taneho” (lizi Siloame lia lumbunuka “Ua Kutuma”). Ngeci uze yala uaile uaka tanene, ua hilukile ali na kumona.
8 Ngeci vantu va atungile navo na vaze vakele naku mu mona apinga vuana, va putukile kuihula nguavo: “Kati ikeye ou yala uakele na kutumama kuze mu kupinga vuana?”
9 Vamo vakele na kuhandeka nguavo: “Ikeye vene.” Vakuavo nguavo: “Houe, kati ikeye, valifua lika.” Ngeci vavenya ua handekele nguendi: “Yange vene.”
10 Ngeci va muihuile nguavo: “Vati honi ua putuka kumona?”
11 Uava kumbuluile nguendi: “Umo yala ive kusana nguavo Yesu, na tikile livu na malendzi, kaha ua likuita ha meso ange naku njileka nguendi, ‘Ya ku Siloame u kataneho.’ Ngeci nji naile njina katanaho, vuno njili na kuomona.”
12 Kaha va muihuile nguavo: “Yala uaco ali kuli?” Uava kumbuluile nguendi: “Yanini.”
13 Ngeci va tualele uze yala uapuile laza kapuputa ku vaFaliseu.
14 Lize litangua lia tikile Yesu livu na malendzi linga emuise meso auze kapuputa, lia puile lia Sapalalo.
15 Omo liaco, vaFaliseu navo vaputukile kuihula uze yala vati ua putukile kumona. Uava kumbuluile nguendi: “Uanji kuitile ha meso livu lia tikile na malendzi, ngeci njaka taneneho, vuno nji mona.”
16 Vamo vaFaliseu va putukile kuhandeka nguavo: “Ou yala kati mukua Njambi, muomu ke kuniunga Sapalalo.” Vakuavo co nguavo: “Vati muntu uapua mukua vupi ahasa kulinga citantekeyeso ngeci mueci?” Ngeci hakele kulitepa hakati kavo.
17 Lukuavo naua vehuile uze kapuputa nguavo: “Amba yove vika uhandekaho? Muomu yove ya nemuisa meso.” Uze yala ua kumbuluile nguendi: “Uapua kapolofeto.”
18 Vutuhu ngoco, vaYundeya ka va tsilielele nguavo ikeye uapuile kapuputa, vuno ali honi na kumona, noho va sanene visemi vendi.
19 Ngeci va vehuile nguavo: “Ou ikeye muanenu imuli na kuhandeka nguenu ua semukile kapuputa? Amba vati honi ali na kumona?”
20 Visemi vendi va kumbuluileko nguavo: “Cili vene uapua munetu, kaha ua semukile vene kapuputa.
21 Vunoni ka tutantekeya vati na putuka kumona, ambe ouo na muimuisa meso, ka tumu tantekeya. Muihulenu. Nakolo, alihandekele vavenya.”
22 Visemi vendi va handekele ngoco, muomu vakele na liova lia vaYundeya, muomu vaYundeya va likuminyine nguavo, uose atava nguendi, Yesu ikeye Kilistu, vamu sekula mu sinangonga.
23 Vikevio via lingisile visemi vendi va handeke nguavo: “Nakolo, muihulenu.”
24 Ngeci va sanene naua lua mu civali, uze yala uapuile kapuputa naku mu leka nguavo: “Hana vumpahu kuli Njambi, muomu tu tantekeya nguetu ou yala uapua mukua vupi.”
25 Uava kumbuluile nguendi: “Nga uapua mukua vupi, yange ka nji vitantekeya, nji tantekeya lika nguange, njapuile kapuputa, vuno njili honi na kumona.”
26 Ngeci va muihuile nguavo: “Vati honi na kulingi? Vati nemuisa meso ove nkuma?”
27 Uava kumbuluile nguendi: “Njina mileka laza, vunoni uenu kutava, vika munji pakesela ku hilukilaho? Vuno nenu mu tonda kupua vandongesi vendi?”
28 Ngeci vamu siluile* nguavo: “Yove u ndongesi yendi, yetu tu vandongesi va Mosesa.
29 Tu tantekeya nguetu, Njambi ua handekele na Mosesa, vunoni ou yala ka tu tantekeya kuiko na tundu.”
30 Uze yala ua kumbuluile nguendi: “Munji komouesa, ka mu tantekeya kuiko na tundu ou yala, vuononi na hasa ku njimuisa meso.
31 Tu tantekeya nguetu, Njambi ke ku halakana vakua vupi, vunoni uose amu singimika* na kulinga cizango cendi, ikeye ya halakana.
32 Tunde kulaza, kanda tuivue nguavo kuakele umo uemuisile meso a muntu ua semukile kapuputa.
33 Nga ou yala ka tundile kuli Njambi, nga ka hasele kulinga na vimo viahi.”
34 Kaha vamu kumbuluile nguavo: “Yove ua semukila mpundu mu vupi, kaha utonda utu longese etu?” Ngeci vamu sekuile!
35 Yesu uavuile nguavo uze yala va namu sekula, ngeci mua liuanene nendi ua muihuile nguendi: “Ua tsiliela muli Muana muntu ni?”
36 Uze yala uamu kumbuluile nguendi: “Muata, iya honi ouo, linga njimu tsiliele?”
37 Yesu uamu lekele nguendi: “Uamu monaho laza, ikeye vene ou ali na kuhandeka nove.”
38 Uze yala ua handekele nguendi: “Nja mu tsiliela, Muangana.” Ngeci ua tsikamenene Yesu.
39 Yesu ua handekele nguendi: “Njineza ha mavu mu kusompela, linga tupuputa va mone kaha vaze ve kumona vapue tupuputa.”
40 Ngeci vamo vaFaliseu vakele nendi, mu vavuile ngoco va muihuile nguavo: “Vuno netu naua tu tupuputa?”
41 Yesu uava lekele nguendi: “Nga mua puile tupuputa, nga kamuesi na vupi. Vunoni enu nguenu, ‘Tuli na kumona.’ Ngeci mukemuo, mu tualelaho na vupi vuenu.”
