Mukanda ua Yunda 1:1-25
1 Yange Yunda ngamba ya Yesu Kilistu, nji muanaye ya Tiango. Njili naku sonekela yenu vava sana, vaze va alema Njambi Tata, kaha vava na niungila Yesu Kilistu:
2 Nkeke, ciyulo na cilemo vili vuezelele muli yenu.
3 Vakua cilemo cange, vutuhu nji na lihakela kapandi ka ku mi sonekela via kuovoka cetu vose, vunoni njamono nguange cili kulutue nji mi sonekele mu ku mi mamuna, linga mulue ndzita ya ikalu omo lia lutsilielo luenu, lutsilielo luze lu vahele lumolika kuli vakua kulela.
4 Njili naku lingamo, muomu kuli vamo va na livembe na kukovela hakati kenu. Vaze vava tumbuile laza mu Visoneka nguavo, vaka va sompesa. Ava vantu vaco, ka ve kuvuila Njambi liova kaha vali na kupangesa ngozi ya kama ya Njambi yetu, mu kupua vukovelelo vua ku tualelaho kulinga vilinga via kasahuntu,* cikuavo naua, va na viana sukuluetu umolika na Muangana uetu, Yesu Kilistu.
5 Vutuhu mua tantekeya vuino evi viuma viose, vunoni njitonda ku mi vuluisa nguange, Yehova* uovuele vantu mu ku va tundisa ku cifuti ca Ingitu vunoni mu nima yaco, ua nongesele vaze ka va muesele lutsilielo.
6 Na tungelo vaze vasile cipangi cavo, vaze va tundile ku cihela cavo mpundu, na va kutu na malienge a miaka yose mu milima ya kama, linga va lavelele litangua lia kama lia ku va sompesa.
7 Mumolika vene na vakua Sondoma na Ngomola na vakua vimbonge via mambueli, va likovelesele cikuma mu vupangala* na kukava masungu ose a ntsitu. Ava vapua cilungula kuli yetu muomu va tambuile cihiso ca tuhia va ku miaka yose.
8 Vutuhu ngoco, ava vantu vapua vakua kulota ngoco, vali naku zualesa mivila yavo, kusahula vaze vali na mpoko naku handeka mua kuvihia vaze vali na vumpahu.
9 Vunoni kangelo ua kama Mingeli muakele naku lihoya na Ndiavu mu ku lizungila muvila ua Mosesa, ka mu hisile ni ku mu handeka mua kuvihia, vunoni ua handekele nguendi: “Yehova aku hise.”
10 Vunoni ava vantu vali naku handeka mua kuvihia viuma viose, ambe vene vize ka via va lumbunukile. Kaha vize co vi vevuisisa, va vivuisisa ngue tusitu va kuhona mana ngeci vali naku lizualesa vakevo vavenya.
11 Kuvindama cavo, muomu va na kava njila ya Kaini na kukava lungano lua kuvihia lua Mbalame omo lia fueto, ngeci va na nongo omo lia kukava vihandeka via kasahuntu* via Kola.
12 Ava vantu vanapu ngue mavue aku vanda kuintsi lia mema, mu ve kulia nenu ku vilika vienu via kulimuesa cilemo. Vanapu ngue tuniungi va lilisa vakevo vavenya ca kuhona liova; ngue maselua akuhona mema aze a pekumuka ngoco na mpundzi; vanapu ngue miti ka ye kuima vusuka ha ntsimbu iya pande, inatsi luvali* kaha va na itukuila kumo na mizi yayo.
13 Vanapu ngue mancimba aku tenuka amu kalunga ndonga, aze a tutumuna lifulu lia ntsoni yavo vavenya; kaha vanapu naua ngue vintangantanga vie kuendangana ngoco kaha va nava tulikila milima ya kama ya ya-ye.
14 Enoke uze uapuile ua vu 7 ku cikota ca Andama, nendi ua polofetele kutuala ha vantu vaco nguendi: “Talenu! Yehova neza na makulukazi na makulukazi a vakua kulela vendi,
15 linga aku sompese vantu vose na kuhisa vakua vupi vose omo lia vilinga viavo via kuvihia, vie kumuesa nguavo ka ve kuvuila Njambi liova. Cikuavo naua, aka hisa ava ka ve kuvuila Njambi liova omo lia vihandeka viavo via kasahuntu, kutuala hali ikeye.”
16 Ava vantu vapua vakua kulinyenyeta na kutatuoka via muono uavo, ve kukava masungu avo vavenya kaha tunua tuavo tue kuhandeka lika via kulihalesa, oku va likuisa kusangala vakuavo linga va uaneneho vimo.
17 Vunoni enu vakua cilemo cange, vulukenu viva livangele ku mileka vapostolo, kutuala hali Muangana uetu Yesu Kilistu,
18 nguavo: “Ku matangua aku kotokela, ku kakala vakua kutsopa vaka linga via kasahuntu mu ku kavangeya masungu avo.”
19 Ava vakevo vakua kuneha matepeso, vakua vilinga via vusitu,* va kuhona lutsilielo.
20 Vunoni yenu vakua cilemo cange, kaniamesenu lutsilielo luenu lua kulela kaha vundilenu na vukuasi vua sipilitu santu,
21 linga mu tualeleho kukala mu cilemo ca Njambi, ntsimbu mu lavelela nkeke ya Muangana uetu Yesu Kilistu na muono ka ue kuhua.
22 Cikuavo naua, tualelenuho kumuesa nkeke kuli vaze va ci li na vimpata,
23 vohielenu mu ku va nyangula mu tuhia. Vakuavo co tualelenuho ku va muesa nkeke, vunoni zangamenu* omo mu lingamo, kaha zindenu ambe vene vizalo viavo viva na zualesa na vilinga viavo via kuvihia.*
24 Njambi ahasa ku mi niunga linga kati mu suntsuke. Ahasa ku mi kuasa kuimana ku meso endi a vumpahu na ndzolela ya kama, ca kuhona kapenga.
25 Ikeye Njambi yetu umolika na Muovole uetu ku hitila muli Yesu Kilistu, kuli Ikeye kukale vumpahu, na vukama, na ngolo, na mpoko, tunde ku miaka yose na lelo lino kaha naku miaka ya ya-ye. Ame.
Matota
^ Mu ciNgelengu “asélgeia.”—Talenu Mezi ava Lombolola
^ Talenu Mizimbu ya ku Vuezako
^ Talenu Mezi ava Lombolola
^ Ni “kualulukila”
^ Ni “inatsililila”
^ Ni “vuntu”
^ Mu ciNgelengu “na vuoma”
^ Ni “via vusitu.”
