Mbimbiliya yapua muzimbu ua tuma Njambi kuli yetu vose. Tua pande ku lilongesayo linga tu tantekeye Vaveniayo. (Yoano 17:3; 2 Timoteu 3:16) Mu livulu liaco, Yehova Njambi ua muesa vutumbe vuendi ku vantu naku limbo liavo.—Njenisisi 3:15; Kusolola 21:3, 4.

Ka kuesi livulu likuavo lia kuata mua kama ku miono ya vantu ku hiana Mbimbiliya. Mbimbiliya ye ku tu kaniamesa tu muese vifua via Yehova ngeci mua cilemo, cikeketima, na ngozi. Ye kuhana lulavelelo, luze lue ku kuasa vantu ku kolesa cipue mu visoti via vikalu vati. Kaha ye ku tualelelaho kuaneka ku mutana viuma via hano ha mavu vize ka via litombuele na cizango ca Njambi.—Visamo 119:105; vaHevelu 4:12; 1 Yoano 2:15-17.

Ha katete Mbimbiliya va isonekele mu ciHevelu, ciAlamaiku na ciNgelengu, kaha va i langulula cipue mu vutuntu ni mu mitamba mu malimi a pulakana 3.000. Ka kuesi livulu lieka li va langulula na ku tepela hano ha mavu ku hiana ikeyo. Kaha vikevio vene vi tua lavelela. Muomu vumo vupolofeto nguavuo: “Kaha ou muzimbu ua cili ua Vuangana, [muzimbu ua kala mu Mbimbiliya] va ka uambulula mu mavu ose, linga upue vukaleho kuli vakua vifuti viose, amba vuose ku kotoka ci keza.”—Mateu 24:14.

Mu kulinga tua tantekeya seho ya mizimbu ya mu Mbimbiliya, tu na ihituluka na kasingimiko ka kama ku muzimbu uayo. Tu tantekeya vulemu vua kala ha ku ilangulula mpundu ngue muze mua tonda vavenia Njambi. Cino ku hituluka ca hitukila ha viMbimbiliya via Mavu a Aha viva tuhuile imo miaka 60 kunima. Vunoni, Ingles inaluluka mu kuhita ca miaka. Ngeci vakua New World Bible Translation Committee va nongonuene ngecize ci tondeka ku ihituluka naua. Vutumbe vuetu vua ku tuhula Mbimbiliya kati lika ku langulula viuma mu vusunga, vunoni naua mu njila ya yasi ku i tonda na ku ivuisisa. Mizimbu ya ku Vuezako “Vitume via ku Langulula Mbimbiliya,” “Viuma vili muno mu Mbimbiliya ya ku Hituluka,” na “Vati Mbimbiliya ya Heta Kuno ku Matangua Etu” ya muesa imo handekesi itua sungamesa mu Mbimbiliya ino.

Vaze va lema Yehova Njambi kaha ve ku mu lemesa, va tonda ku kala na Mbimbiliya ya langulula viuma mu vusunga na mu njila ya yasi, ize ikuasa kuivuisisa vuino Lizi lia Njambi. (1 Timoteu 2:4) Linga tu hase ku puisamo evi, tu na hituluka ino Mbimbiliya ya Ingles kaha tuli na vutumbe vua ku ilangulula mu malimi ose atu hasa. Tua vundila na ku lavelela ngecize ino Mbimbiliya ika mi kuasa enu vakua kutanda, omo mu lihakela kapandi ka ku ‘tonda Njambi, . . . na ku mu uana.’—Vilinga 17:27.