Mu vingonde via Julho na Agosto, vamuanetu mu mavu ose va ka kunguluka ku ciuano ca muhato cimo lika vene kaha ha ntsimbu imo. Linga viose vi lipuisemo, ca tondekele ku langulula ciuano caco mu malimi a tuvakana 500. Ku vuahesa viose, ku ngalavala vimpande kaha na vivideo, ce ku ambatele muaka ni ku tuvakana. Vunoni omo lia musongo ua Corona virus vamuanetu vakua ku langulula Ciuano ca Muhato ca Mutue ‘Viukilile Ntsimbu Yose’! va pandele ku puisamo cipanga caco mu vingonde vitatu lika.

 Seketa ya Tala via ku Langulula na Seketa ya Tala via ku Landa Viuma via kuasele eci cipanga ca kama. Kaha Seketa ya Tala via ku Langulula ya nongonuene ngecize, vakua ku langulula linga va puisemo cipanga cavo, va tondekele vikuata vikuavo cikumakuma vimicrofone via cili. Ngeci Seketa ya Tala via ku Landa Viuma mu mavu ose ya landele vimicrofone 1.000 vi va tumine ku vihela kampe 200.

 Linga va zokotueya vimbongo, Seketa ya Tala via ku Landa Viuma mu mavu ose, ya landele vimicrofone via vingi na ku vi tuala ku cihela cimo lika, mu nima yaco va vi tumine ku vakua ku langulula mu mavu ose. Mu ku linga tua landele vimicrofone via vingi, nkala microfone tua i landele 170 dolar ya ku Amerika, kaha nga tua landele via vindende lika nga kua ile vimbongo via vingi.

 Seketa ya Tala via ku Landa Viuma mu mavu ose ya landele viuma viaco mu vingonde via Abril na Maio ya 2020. Mu ntsimbu yaco, mingoso ka yesi na kuenda naua ngeci mua laza omo lia musongo ua coronavirus. Vutuhu ngoco, ku ntsongo ya Maio cingi ca viseketa via vakua ku langulula, vimbetele, na vihela vikuavo via ku languluila, via tambuile vikuata vi va tondekele.

Muanetu Jay Swinney ue ku tuamenena Seketa ya Tala via ku Landa  Viuma mu Mavu ose ua handekele ngueni: “Viseketa via ha Mbetele via pangelele hamo lika na vakua ku landesa. Kaha omo lia vukuasi vua Yehova lika, tua hasele ku lingamo vuasi-vuasi na ku pangesa vuino milambu linga tu kuase vamuanetu.”

 Muanetu Nicholas Ahladis, ue ku pangela ku Seketa ya Tala via ku Langulula ua handekele ngueni: “Vakua ku langulula ka va kele na ku tuhuka omo lia musongo ua coronavirus, va viukililile cikuma mu va tambuile vikuata viaco. Kaha vutuhu vali ku laako na vakuavo mu ve ku pangela, vunoni va hasele ku panga hamo lika mu ku langulula na ku ngalavala vimpande, vidrama, na miaso mu malimi a tuvakana 500.”

 Eci cipanga ci li ha kati ka vikuavo vi tua puisamo mu ku tuhula Ciuano ca Muhato mu mavu ose ca 2020 ca Mutue ‘Viukililenu Ntsimbu Yose’! Omo lia milambu i mue ku hana ku hitila mu donate.pr418.com na mu vinjila vikuavo, tua hasele ku landa vikuata via tondekele.