Vivideo vi tue ku tala ku viuano via muhato vie ku tu kuata 2ku mutima na ku tu kuasa ku ivuisisa vuino vi ya longesa Mbimbiliya. Ciuano ca Muhato ca 2020 ca Mutue ‘Viukililenu Ntsimbu Yose’! ili na vivideo 114 hamo lika na vimpande 43 vi va hele vakua Civunga ca Vantuamena na vakuasi vavo. Mua singaniekaho laza ku fuitangana ce ku kalako kaha na vimbongo vie ku tondeka linga va tuhule vivideo viaco ni?

 Vamuanetu mu mavu ose va heta kampe 900 va lihanene na ku pangesa vutongue vuavo mu ku kuasa ku tuhula ciuano ca muhato. Kaha va pangesele viola kampe 100.000 mu ku linga cipanga caco mu miaka ivali. Ca ambatesele kumo na viola 70.000 via tondekele mu ku manusula drama ya 76 minutu ya Nehemiya: “Ndzolela ya Yehova Ikeyo Ngolo Yenu.”

 Mua vusunga, kua tondekele vimbongo via vingi linga tu niunge ava muanetu vakua ku lihana na ku va hana vukuasi vu va tondekele, vindzivo vi va kele kaha na vikuata via ku panga linga va puisemo cipanga.

 Muanetu Jared Gossman ue ku pangela ku Sekeya ya Tala via viAudio na Vivideo, ua handekele ngueni: “Ndzango ya Tala via ku Longesa ya ku Civunga ca Vantuamena ya tonda ku muesa visemua na vihela via ku liseza-seza mu vivideo vietu. Ve ku lingamo muomu tua likuata kumo na vamuanetu va ku visemua via ku liseza-seza mu mavu ose. Linga tu puisemo ovu vutumbe, vivunga 24 via mu vifuti 11 via pangelele hamo lika mu cipanga eci. Kua tondekele vimbongo via vingi ku fuitangana, na ku moneka vuino viose via tondekele.”

 Linga tu hase ku tuhula vivideo vietu, tue ku tondeka vikuata via cili via ku panga navio kaha na vihela via ku liseza-seza via ku ngalavalela. Ca ku muenako, vihela ku va ngalavalele video ya Nehemiya: “Ndzolela ya Yehova Ikeyo Ngolo Yenu” va vi tungile ku Mt. Ebo ku stúdio ya kala mu hiehi na Patterson, Nova Yorke, Estados Unidos de Amerika. Linga tu pangese vuino milambu yetu na ku linga cose linga vivideo vietu vi soloke vuino mu litombola na muzimbu ua mu Mbimbiliya, vamuanetu va pangele vimo vikuata linga vi soloke ngue vivumbe via Yelusalema ku laza. Vikuata viaco via puile via mavaya a kele a vimetro 6 kaha va a kuitile tinda linga a soloke ngue livue. Mavaya aco va kele na ku ha tumbika ku vihela via ku liseza-seza mu ku ngalavala mitamba ya ku liseza-seza, kaha eci ca tepuluile ku viuma via tondekele. Vunoni ambe ngoco, linga va hase ku panga viuma via tondekele mu ku ngalavala drama lika, kua tondekele vimbongo kampe 100.000 dolar ya ku Amerika. a

 Mua vusunga, ku tantekeya kamandende vati va viukisile ciuano ca muhato ca uno muaka, ca vueza ku ku santsela cetu. Tuli na vusunga nguetu ku fuitangana cose ci na keleko mu ku viukisa ciuano ca muhato, ci napu ku sangaziala Yehova mu mavu ose. Tua santsela ku milambu yenu mu ku kuasa cipanga ca mavu ose ku hitila mu donate.pr418.com na vinjila vikuavo.