Mu ku linga makulukazi na makulukazi a vantu vali na ku va mbatiza nkala muaka, ku tondeka naua vindzivo vikuavo via ku lemesela. Ngeci mukemuo, Seketa ya Tala via ku Tunga mu mavu ose, i na likuminyine ku tunga na ku tungulula vindzivo via ku lemesela vi tuvakana 2.700 mu muaka ua vipanga ua 2020. a

 Vunoni ca vusiua musongo ua COVID-19 u na hiluisa matumbe ose ha mavu. Linga tu niunge vamuanetu na vandumbuetu kaha na kuendela hamo na masiko a nguvulu, Ndzango ya Tala via ku Tuhula Mikanda ya ku Civunga ca Vantuamena yemikile vimo vipanga mu imo ntsimbu mu mavu ose. Vutuhu ngoco, mu muaka ua vipanga ua 2020, va na tungu na ku tungulula vindzivo via ku lemesela vi tuvakana 1.700 tele musongo kanda uimike viose. Cikuavo naua, va hasele ku manusula ku tunga vimo viMbetele, viRTO na vindzivo via viSikola via Vuangana.

 Mbetele ya ku Camarões. Mbetele ya laza ya kele ku mbonge ya Douala, ya puile ya indende kaha ya tondekele ku i hamesako. Kaha Ndzango ya Tala via ku Tuhula Mikanda ya tondele ku tungulula Mbetele yaco, vunoni vimbongo via ku i tungulula vie ku puile via vingi cikuma ku hiana ku tunga ikuavo. Cikuavo naua, va tondesesele nga citava va tunge ikuavo ni ku landa yeka kaha na ku vuahesa ize vene ya laza. Vunoni viose vene ku via vuahele ngue mu va vi singaniekele.

 Kaha vamuanetu va vuile ngecize, nguvulu ya kele na vutumbe vua kuala tapalo ku nolote ya mbonge ya Douala, ye ku hitile ku mukulo ua Ndzivo yetu ya Viuano. Tapalo yaco ye ku kuasele ku ka hetako kaha na ku tu kuasa tu pangese vuino ndzivo yaco. Evi vikevio vi ya tondekele mpundu Mbetele. Ngeci mukemuo, Civunga ca Vantuamena ca tavesele va tunge Mbetele mutamba ukuavo ua cihela ca Ndzivo ya Viuano.

 Vamuanetu va pangelele hamo lika na vakua impreza va va laniene, kaha eci ca kuasele ku zokotueya vimbongo na ku pangesa vuino ntsimbu. Cipanga caco ha ile 2 milhões dollar (USD) kaha via puile via vindende ku tuvakana mu va vi singaniekelele. Kaha na vusoko vua Mbetele vua hasele ku nungulukila ku Mbetele ya iha ntsimbu kanda musongo ua Corona virus u hete.

 Na Mbetele ya iha ku Camarões, vusoko vua Mbetele vuli honi na cihela ca cili ca ku pangela na ku yoyela. Kuli vakevo, Mbetele ya iha inapu vuana vua ku tunda kuli Yehova. Vamo vayala na mpuevo va handekele nguavo: “Tu tonda ku lihakela kapandi ka ku panga cikuma kaha na ku muesa ku santsela cetu ku vuana vu va na tu hana.”

 Seketa ya Vakua ku Langulula (RTO) ya Lilimi lia Tojolabal ku México. Mu miaka ya yingi, vakua ku langulula mikanda mu lilimi lia Tojolabal va kele na ku pangela ha Mbetele ya ku América Central, mu hiehi na mbonge ya México. Vunoni lilimi lia Tojolabal ve ku lihandeka cikuma ku vimbonge via Altamirano na ku Las Margaritas hali ntunda ya 1.000 km ku tunda ku Mbetele. Kaha evi via shamuisile lilimi liavo. Cikuavo naua, ca kuluuilile vakua ku langulula ku uana vamuanetu na vandumbuetu mu hiehi na Mbetele, vakua ku handeka lilimi liaco linga va kuase mu ku langulula na ku ngalavala.

 Ngeci mukemuo, Ndzango ya Vakua ku Soneka ya ku Civunga ca Vantuamena ya tondele ku nungulula vakua ku langulula ku cihela ku ve ku handeka cikuma lilimi lia Tojolabal. Linga va vi puisemo, Mbetele ya landele imo ndzivo kaha na ku i vuahesa. Ku lingamo, ca kuasele ku zokotueya vimbongo ku tuvakana ku tunga ni ku lukala viseketa.

 Umo mukua ku langulula a handeka ha ku vezika ca na uanamo ngueni: “Mu miaka likumi i nji na pangela ha Mbetele ku kulangulula, ka nja liuanene na vumo vusoko vuahi vua handekele lilimi liange. Vunoni hano honi, seketa yetu va na i neha mu kati ka vaTojolabal, kaha nje ku handeka navo tangua na tangua. Evi via nji kuasa ku handeka vuino lilimi liange, kaha na ku kuasa ku cipanga ca ku langulula.”

 Mu muaka ua vipanga ua 2021 nga viuma vi kala vuino, kuli vutumbe vua ku pangela ha Viseketa via Vakua ku Langulula (RTO) via ku pua 75 kaha na vindzivo via viSikola via Vuangana. Tu tualelelaho mu ku pangela ha viMbetele via ku pua 8. Ngeci mua Mbetele ya pua mutamba ua ku cikota ca kama ua ku Ramapo, ku Nova York kaha na ku nungulula viMbetele via ku Argentina na ku Itália. Cikuavo naua, ku tondeka ku tunga Vindzivo via Vuangana vi tuvakana 1.000 linga vi hinge mu vihela vi ve ku lemesela vamuanetu ka viesi vuino kaha naua, ku tondeka ku vuahesa Vindzivo via Vuangana via ku pua 4.000.

 Vati honi evi vipanga via ku tunga na ku vuahesa ve ku hasa ku vi fuetela? Muanetu Lázaro González ua ku Civunga ca Vakuluntu va Mbetele ya ku América Central, ua kumbuluile eci cihula omo ua kele na ku handeka ha cipanga ca ku tunga Seketa ya Vakua ku Langulula (RTO) ya tojolabal. Ua handekele ngueni: “Mu cifuti cetu ce ku kaluua ku puisamo via ku tunga. Ngeci mukemuo, ca ku hona vukuasi vua vamuanetu mu mavu ose, nga ka tua hasele ku tunga Viseketa via Vakua ku langulula mu malimi a vamuanetu. Omo lia milambu ya vamuanetu mu mavu ose, tu na hasa ku tuala vakua ku langulula ku vimbonge ku ve ku handeka malimi avo. Tu santsela cikuma ku vamuanetu va mu mavu ose omo lia vuhuanga vuavo.” Cili vene, milambu yenu vamuanetu ikeyo ye ku kuasa ku puisamo evi vipanga via ku tunga. Cingi cayo mue ku i lingila ku hitila mu saiti yetu ha mutamba donate.pr418.com.