Ngonde ku ngonde tue ku lavelela na cizango cose viprograma via mu lutsilielo hamo lika na vivideo vie ku tuhuka mu JW Broadcasting. Vunoni, vamuanetu vavengi mu Afrika ka ve ku hasa ku tupulula viprograma viaco na Internete. Omo lia vika?

 Cingi ca vihela mu Afrika ka kua kele Internete, kaha ambe vene ku vihela ku ya kala ye tondeka vimbongo via vingi. Ca ku muenako, umo kaniungi ua ku zinguluka ku Madagáscar tangua limo ua tupuluile programa ya JW Broadcasting mu ku pangesa Internete ya imo venda ya kafe. Kaha ua fuetele 16 USD (10.000kz), vimbongo viaco vi tuvakana ha vimbongo vi ve ku tambula vamo mu simano. a

 Vutuhu ngoco, makulukazi a vantu mu Afrika va hasa honi ku tupulula viprograma via JW Broadcasting ca ku hona Internte. Vati omo?

 Tunde mu 2017, vose va kala mu Afrika ya ku mavanda citava va tale programa ya JW Broadcasting ku hitila mu imo kanal ha TV mu ku pangesa Satélite. Kaha kanal yaco ye ku panga matangua ose ha ntsimbu yose-oyo mu malimi 16.

 Linga va hase ku vi puisamo, Vakaleho va Yehova va na fuetela imo kanal ya TV mu ku pangesa Satélite. Kanal yaco vali na ku I pangesa mu vifuti 35 mu Afrika ya ku mavanda. Ve ku fueta 12.000 USD (7 milhões) mu ngonde. Vintsimbu vimo, nga kuli viuano via kama ve ku fueta naua vimbongo vikuavo linga va vi hitise ha kanal ikuavo. Evi vie ku kuasa makulukazi a vantu va kunguluke ku viuano via muhato ni viprograma via likuata na vangendzi ve ku meneka Mbetele.

 Vantu vavengi cipue vene vaze ka va puile Vakaleho va Yehova, ve ku tala kanale ya JW Satélite ku vindzivo viavo. Vutuhu ngoco, vamuanetu vavengi ka ve ku hasa ku landa vikuata vi tondeka linga va tale kanale yaco. Ngeci mukemuo, lukungulukilo lua landa vikuata vi tondeka mu vikungulukilo vi tuvakana 3.670 linga va taleleko JW Broadcasting. Nga tua landa vikuata viaco kaha va tu nehelavio ku vakua ku landesa, tue ku fueta 70 USD (43.000kz) nga Ndzivo ya Vuangana mua kala laza TV ni projector. Ngeci mukemuo nga Ndzivo ya Vuangana ka yesi na TV ni projector, ce ku tondeka 530 USD (333.000kz) linga tu lande vikuata viaco.

 Vamuanentu na vandumbuetu ve ku santsela cikuma ku kanal yaco. Umo mukuluntu mu cikungulukilo ku Camarões ngueni: “Ovu vuana ku vusoko vuetu, vunapu ngue manna mu kati ka mpambo.” Muanetu Odebode ua ku Nigéria a handeka ngueni: “Tue ku tala JW Satélite mu vusoko, lutatu mu simano. Vana vange ve ku lavelela na ndzolela ntsimbu yaco. Kaha vintsimbu vimo ve ku tonda tu tale kanal JW mu matangua akuavo.” Kaha ndumbuetu Rose ua ku Nigéria ngueni: “Njili na ndzolela ya kama, muomu mu cihela ca ku tala lika vene mizimbu ya ku TV, nje ku tala honi kanal ya JW Satélite. Mu nja kele na ku tala mizimbu, ya kele na ku nji luvalesa cikuma kaha mbunge ya kele na ku londa. Vunoni mu nje ku tala JW Broadcasting ye ku nji kaniamesa na ku nji simpisa! Ikeyo i nja lema cikuma ku tala. Ya pua civezikiso ca kama ca Yehova.”

 Umo kaniungi ua ku zinguluka ku Moçambique ua handekele ngueni, Vindzivo via Vuangana via muimbo mue ku meneka, va na kutiyamo vikuata via ku litokakana ku kanal ya JW Satélite. Kaha vamuanetu va mu vikungulukilo viaco, ve ku livanga imo ola ni vi ola vivali ntsimbu ciuano kanda ci putuke linga va hase ku tala JW Broadcasting ku hitila mu satélite.

 Ku ciuano ca vifuti ca 2019 ku Johannesburg, Afrika do Sul, va pangesele JW Satélite mu ku solola vimpande via kama ku vihela vikuavo via ku pua 9, hamo lika na vimpande via vakua Civunga ca Vantuamena. Muanetu Sphumelele ua ku Seketa ya Broadcasting ya ku Afrika do Sul, a handeka ngueni: “Laza tua kele na ku hitisa vimpande viaco mu ku pangesa internete, vunoni kua tondekele vimbongo via vingi linga tu hase ku vi tokakana vuino. Ngeci mukemuo, ku pangesa kanal ya JW Satélite ca tu kuasa cikuma ku zokotueya kambongo kaha citava ku i kulahela.”

 Viose tua hasa ku vi puisamo omo lia vuhuanga vua vamuanetu mu mavu ose ku hitila mu milambu. Kaha vamuanetu na vandumbuetu vavengi mu Afrika, ve ku hasa ku tala honi JW Broadcasting ku hitila mu satélite. Tu mi santsela cikuma ku milambu yenu i mue ku hana mua ku liseza-seza ku hitila ha mutamba ua mu saiti donate.pr418.com.