Lelo lino, Vakaleho va Yehova ve ku tambula cikuma via ku lia via mu lutsilielo mu formato digital ku hiana ku nima. Vunoni ku vihela via vingi, vamuanetu ka ve ku hasa ku pangesa internete. Vamo va kala ku vihela ka kua kele tuhia tua vunengu ntsimbu yose, internet ya ku kokoloka, vakuavo co na internete vene ka ya keleko.

 Vutuhu ngoco, vamuanetu va hasa honi ku tupulula mikanda ya electroniku ca ku hona internet! Vati omuo?

 JW Box ka pua kacikasa kakandende ka vi na tambula vikungulukilo via kala na vitanga via internete. Vamuanetu va ku Seketa ya viKomputador ku Mbetele, ve vuahesa vipendrive na ku hakamo mikanda ya electroniku hamo lika na vivideo via tuhuka mu saiti jw.org. Kacikasa kaco ve ku ka landa kampe 75 dolar ya ku Amerika.

 Ku Ndzivo ya Vuangana, vamuanetu ve ku tokakana vifoni na vitablet viavo ku JW Box linga va tupulule mikanda na vivideo ca ku hona internete. Cipue vaze va kala na vifoni ni vitablet via laza ni via ndando ya indende, navo va hasa ku tokakanako. Vunoni nga cikungulukilo kacesi na internete, vati honi mu kacikasa ka JW Box mu kala mikanda na vivideo via viha? Mbetele ye ku tupulula mikanda na vivideo via viha mu vipendrive, kaha nkala pendrive ve ku i landa 4 dolar ya ku Amerika. Ngeci ve ku vi tuma hamolika na vikasa via mikanda mu vikungulukilo.

 Vati JW Box ye ku kuasa vamuanetu? Umo cisemi ua yala ua ku República Democrática do Congo, ua handekele ngueni: “Vintsimbu via vingi nja kele na ku seteka ku tupulula drama ‘Sempre Confie em Jeová’ na Lembre-se da Mulher de Ló. Vunoni ka nja hasele ku lingamo, nja vuile vusiua vua kama. Vunoni hano honi nje ku hasa ku tupulula vivideo mu foni yange, kaha mu ku pua visemi tue ku hasa ku longesa vuino vana vetu.”

 Umo muanetu ku Nigéria ue ku kuasa vikungulukilo ku pangesa kacikasa ka JW Box ua handekele ngueni: “Vamuanetu ve ku mona kacikasa ka JW Box ku pua vuana vua ku lifuila vua tu hana Yehova. Ve ku ivua ndzolela ya kama muomu ve ku hasa ku tupulula mikanda na vivideo via mu Vikuata via ku Longesa Navio.”

 Tuvikasa tua JW Box tu tuvakana 1.700, va tu tuma ku vamuanetu mu Afrika, Oceania, na Amerika do Sul kaha kuli vutumbe vua ku vi tuma naua ku vikungulukilo vikuavo via vingi. Kulihi vie ku tunda vimbongo vi ve ku vi landa? Ku milambu i ve ku hana vamuanetu mu ku kuasa cipanga mu mavu ose, kaha cingi cayo ve ku i lingila ku hitila mu donate.pr418.com. Tua mi santsela mu vose omo lia vuhuanga vuenu.