Ha kati ka vantu vavengi va ku Amerika Latina, ha kala makulukazi na makulukazi a vantu va kala na malimi avo na visemua viavo. Cingi ca ava vantu va pua vamuanetu na vandumbuetu mu lutsilielo kaha va haka seho ya kama ku visemua viavo. Linga va hase ku kuasa vantu mu lutsilielo, ve ku langulula na ku tepela mikanda ya Vakaleho va Yehova mu malimi a tuvakana 130 mu membo a ku Amerika Latina. a Vutuhu ngoco, vamo ve ku va luisa omo lia ku hangula ku pangela Yehova na ku viana ku lihaka mu visemua ka via litombuele na Mbimbiliya via tsimana ku membo avo. Vati tua pangesa milambu yenu mu ku va kuasa?

 Ku cifuti ca Mexiku, vamuanetu va muimbo lia Huichol ku mincinda ya Jalisco va vianene na kasingimiko ku lihaka mu vilika via malombelo vi va muene ngecize ka via litombuele na Mbimbiliya. b Vunoni evi via nienguesele vamo vantu muimbo. Lia 4 ya Dezembro ya 2017, cimo civunga ca vukenia ca zukukilile vamo Vakaleho va Yehova na vakuavo va kele navo, mu ku va tingula. Civunga caco ca sekuile Vakaleho va Yehova muimbo, ca nongesele vindzivo viavo, na ku va leka nguavo uose a ka hiluka va ku mu tsiha.

 Vakaleho va mu vimbonge via kala ha hiehi na limbo liaco, vuasi-vuasi va lihakelele kapandi ka kuasa vamuanaye. Vati honi ve ku lingile linga va va kuase ku hiluka ku membo avo? Umo muanetu ua lizina Agustin ngueni “Ka tua kele na vimbongo via ku puamo via ku fueta umo lihako a ka tu hakuileko mu ndzango. Kaha ka tua kele na umo uahi a hasa ku tu mamunako via masiko.”

 Mu ku linga ku zituka ca vamuanetu ca ku lemesa Yehova ca kele mu vitanga, Mbetele ya ku Amerika Sentral ya lingileko mumo. Ha katete, va vundilile vakua masiko va konke ha cimpande caco. Mu nima yaco, Ndzango ya Vakua ku Kuatasanesa ya ku Civunga ca Vantuamena ca Vakaleho va Yehova ya va kuasele. Ya va tavesele va pangele hamo na Seketa ya Masiko ya ku cikota cetu, linga tuale cimpande caco ku masiko na ku hakuila vamuanetu na vandumbuetu va ku Huichol. Cimpande caco ca ka hetele ku ndzango ya kama ya mu Cifuti ca Mexiku.

 Cimo civunga ca vangazi va mu vifuti via ku liseza-seza, va viukisile imo nguli ya ndzili nguavo, ngeci muze mu ve ku singimika visemua via muimbo liavo, va pande naua ku singimika ku zituka ca vantu vose va mu membo avo. Vantu vose va kala na imo mpoko ka ci tava ku va niekayo kuose-oko ku va kala.

 Lia 8 ya Julho ya 2020, vangazi vose va mu Ndzango ya Kama va hakuilile Vakaleho va Yehova. Kaha va sikile ngecize vose vaze va va sekuile muimbo va va tavese ku hiluka. Muanetu Agustín, u tu na tumbuile ha katete, ua santselele ngueni: “Tuli na ndzolela ya kama kaha tua viukilila cikuma, ku viuma vi va na tu lingila vamuanetu. Nga vakevo kuahi, nga ka tua vi hasele cipue kamandende.”

 Mu ntsimbu yaco, vamuanetu va ku limbo lia San Juan de Ilumán, ku Equador kua sula vakua cisemua ca Otavalo, navo va kele na ku pinda na visoti via cifua eci. Mu 2014, va putukile ku tunga Ndzivo ya Vuangana mu nima ya ku tambula mikanda yose ya tondeka mu ku lingamo. Vunoni umo mukuluntu ua vulombelo ua tuamenene civunga ca vantu va tuvakana 100 vemike vipanga via ku tunga. Kaha limbo liose lia vindikile Vakaleho va Yehova va likele ku likungulula mu ku lemesa.

 Viseketa via Masiko via ku Mbetele ya ku Equador na ku Cikota Cetu, via pangelele hamo mu ku hakuila mpoko i ca kala nayo cikungulukilo caco mu ku lemesa. Vamuanetu va tualele cimpande caco ku ndzango ya ku sompela. Evi via lingisile vantu va muimbo liaco, va likele ku luisa vamuanetu na ku va tavesa va manusule ku tunga Ndzivo ya Vuangana mu ciyulo. Linga va hakuile mpoko ya vamuanetu ku lutue, mahako vetu va vundilile vindzango via kama via ku sompela vi hilule ha cimpande eci: Vuno membo a mu misenge nayo a pande ku singimika masiko a tumbika mu ku hakuila vantu mu mavu ose ni?

 Lia 16 ya Julho, 2020, Ndzango ya kama cikuma mu Equador ya hiluile ha cimpande caco. Kaha vamuanetu va pua mahako mu Equador vemanene cikungulukilo. Cikuavo naua, vamuanetu 4 va pua mahako ve ku tala vimpande via mu vifuti viose navo va ka hakuilile cimpande caco. Vunoni omo lia COVID-19, va litokakanene ku ndzango yaco ku hitila mu video oku vali mu vifuti viavo. Eyi ikeyo ndzango ya ku livanga ku tavesa vakua masiko vemanena Vakaleho va Yehova mu mavu ose ku lombolola vinguli mu cifua eci. c Civunga caco ca tumbuile masiko a mu mavu ose, a muesa ngecize vantu va mu membo ve ku tualelelaho hakuila mpoko yavo ya vuntu omo lia ku kala ku membo.

 Vamuanetu va ku cana ca Otavalo va na lavelela na ndzolela cihangula ca ndzango. Vunoni mu ntsimbu ino, va santsela cikuma ku vukuasi vu va tambula. Muanetu César, ua pua mukuluntu mu cikungulukilo ca Ilumán Quichua ngueni: “Yehova lika, ku hitila mu lukungulukilo lueni, a hasa ku linga via vingi ngecize mu ku kuasa vandende.”

 Vangazi vose va kuasele mu cimpande caco va pua Vakaleho va Yehova, kaha ve ku ivua ndzolela ya ku pangesa vuhasi vuavo mu ku kuasa lukungulukilo lua Yehova ca ku hona fueto. Vutuhu ngoco, ku sonekesa evi vimpande, ku vi viukisa na ku ka vi hakuila mu ndzango ca lile ntsimbu na vimbongo. Vangazi vetu na vamuanetu vakuavo va pangesele viola vi tuvakana 380 mu ku viukisa vinguli via litombola na masiko, na ku pangesa naua viola 250 mu ku langulula vidukumentu linga vakua ndzango ya mu Mexico va ka hase ku vi ivuisisa. Kaha kampe vangazi va ku pua 40, va mu vifuti via ku liseza-seza, va pangesele viola via vingi mu ku hakuila cimpande ca ku Equador. Vati tua hasa ku fuetela vimbongo viose via tondekele mu ku hakuila evi vimpande vivali? Ku hitila mu milambu yenu, i mue ku hana ku hitila mu vinjila via ku liseza-seza vi va lombolola mu donate.pr418.com. Tua santselako cikuma ku vuhuanga vuenu.