Ka tu ka suvu ciuano ca muhato ca 2020—muomu ca puile ciuano ca ku livanga mu mavu ose ci va lingile ya ku gravala kaha na ku ci haka mu saiti! Ca ku muenako, ku Malawi na ku Moçambique, cingi ca vamuanetu na vandumbuetu va hasele ku tala ciuano ca muhato ku hitila mu internete. Vati va hasele ku lingamo?

 Ca ku muenako, Ndzango ya Vakua ku Kuatasanesa na Ndzango ya Tala via ku Longesa ca Vantuamena, ya tavesele ciuano ca muhato ci hitile ku televizau na mu vi visandzi via mu Malawi na Moçambique. Omo lia vika evi via tondekelele? Muomu ndando ya internete ku Malawi ya kama cikuma ku tuvakana vindando via ku mafuti a engi mavu ose. Muanetu William Chumbi ua pua mukuluntu ua Mbetele ku Malawi ngueni: “Njila imo i va hasele ku muenamo ciuano ca muhato vamuanetu, ca puile ku hitila mu visandzi na televizau.” Muanetu Luka Sibeko neni ua pua mukuluntu ua Mbetele ya ku Malawi ua vuezeleko ngueni: “Nga ciuano ca muhato ku hitila mu televeizau na ku visandzi kuahi, nga vamuanetu va vandende lika ve ku hasele ku tala ciuano ca muhato.” Na ku Moçambique vene, vamuanetu va vandende lika ve ku hasele ku landa imo telefone ambe vene internete yaco.

 Omo lia COVID-19, vimo visandzi na viprograma via televizau, via kele laza na ku hitisa viuano vietu. a Ngeci mukemuo vamuanetu va lombele va va haneko mutamba ukuavo linga va hitisilemo ciuano ca muhato.

 Vamuanetu ku Malawi, ve ku lihita na visoti via vikalu. Kaha linga muntu a hase ku pangesa pangesa programa ya televizau, ue ku kala lika na ola imo lika. Muomu nguavo nga programa i ambata ntsimbu ya kama, vantu ka va i leme. Ngeci vamuanetu va lomboluele ngecize cipanga cetu ce ku kuasa cikuma vantu. Ambe mu ntsimbu ino ua musongo, tu tonda ku lembezieka vantu na muzimbu ua cili ua Mbimbiliya, ize i hasa ku va kuasa ku pua vantu va cili kaha na ku yoya mu ndzolela mu vusoko. Mu va halakanene ngoco, vamuanetu va va vuezele ku ntsimbu i va pandele ku pangesa ku programa i va va tavesele.

 Ku Malawi, ciuano ca muhato ca hitile ku imo programa ya televizau na ku visandzi. Mu ku linga viprograma viose vivali va ka handekamo malimi a cisemua, makulukazi a makulukazi a vantu mu cifuti cose va hasele ku kavangeya ciuano ca muhato. Kaha ku Moçambique co, ciuano ca muhato ca hitile ku televizau na viprograma via ku pua 85 via ku visandzi.

 Vimbongo vi va pangesele ku vifuti viose evi vivali, via puile $28. 227 (12.952.6 Kwanzas)  b linga vafuete viprogroma via televizau. Kaha ndando ya viprograma via visandzi vize via vindende via puile $15 (6883.07 Kwanzas) kaha ndando viprograma via kama via visandzi ya puile $2,777 (1.274.286 Kwanzas).

 Vamuanetu va lingile cose linga va hase ku pangesa vuino milambu. Ca ku muenako, ku Malawi vamuanetu va lombele va va tepuluileko ku ndando, ngeci va va tepuileko imo 30%. Omo liaco, va hasele ku tulika vimbongo via ku pua $1.711 (785.129 Kwanzas). Kaha ngeci mua ku Moçambique, va tu tepuluileko ku dando ya vimo viprograma omo lia vilinga vietu via cili kaha omo lia ku fueta ha ntsimbu.

 Vamuanetu, va muesele ku santsela ca kama omo lia ku kavangeya ciuano ca muhato ku hitila mu viprograma via muimbo liavo. Muanetu Patrick, umo ua vakuluntu ku Malawi ngueni: “Tu santsela cikuma ku vamuanetu va ku civunga ca Vantuamena ku viose vi ve ku tu lingila cikumakuma mu ntsimbu ino ya musongo ua covid-19.” Kaha Isaac neni ua ku Malawi, ua handekele ngueni: “Cisandzi cimo lika tua kala naco. Ngeci mukemuo, tua vuahelela cikuma ku viuma evi via seho vi va na lingi lukungulukilo lua Yehova mu ku hitisa ciuano ca muhato na ku visandzi. Omo liaco, vusoko vuange vuose vu na hasa ku kavangeya ciuano. Evi via tu muesele ha toma ngecize Yehova ua lema mua kama vantu veni.”

 Umo mukua ku ambulula ku Moçambique ua muene ciuano ca ku livanga ca 2020 ua handekele ngueni: “Vi ya lingile lukungulukilo linga ciuano cihitile ku TV, ca nji lingisa ku mona mpundu ngecize Yehova ua pua Njambi mukua Ngolo yose. Ambe vene covid-19, ku ya hasele ku imika linga tu hase ku tambula via kulia via mu lutsilielo kaha na ku pangela Njambi ambe vene ku ndzivo. Nji na limuena ha toma cilemo ca vangamba va Yehova. Njili na vusunga vua ku sula ngandza ngecize ovu vukevuo vulombelo vua vusunga.”

 Wyson, umo muanetu ua pua mukuluntu mu cikugulukilo ngueni: “Nji tonda ku muesa ku santsela cange kuli mukuamanda ua cili mu cifua ca ali na ku tu niungilamo mu ntsimbu ino ua musongo ua covid-19. Ci na pu civezikiso ca kama ku mona ku tala ciuano ca muhato ku TV na mu visandzi. I na kuasa mua kama, cikumakuma omo lia visoti vi tue ku pinda navio ngeci mua ku honoua vimbonge, kuno ku cihela ca mavu ca vuhutu kaha na ku uanamo ku lembezieka.”

 Ku ciuano ca muhato ca 2021, Ndzango ya Vakua ku Kuatasanesa kaha na Ndzango ya Tala via ku Longesa, va tavesele naua ngecize ciuano ca muhato cihitile ku televizau na mu visandzi ku vihela vikuavo. Kulihi ve ku uana vimbongo linga ciuano ca muhato ci kaleko mu njila eyi? Ku hitila mu milambu yetu mu mavu ose, cingi ca milambu ve ku i lingila ku hitila mu donate.pr418.com. Vamuanetu, tua santsela cikuma ku milambu yenu ya ngozi.