Tuli na ku yoyela ku matangua a ku kotokela. Ngeci mukemuo, ku ivua mizimbu ya “vindzita na vinguavo via zindzita” ka vi tu komouesa. (Mateo 24:6) Vunoni omo vamuanetu mu ve ku hita mu visoti vie ku iza omo lia ndzita, ve ku tambula vukuasi vu tondeka. Muzimbu #3 ua Vakua Civunga ca Vantuamena ua 2022, ua tu kaniamesele mua kama. Muomu tua hasele ku tantekeya vipanga vi vali na ku linga vamuanetu ku vucelo vua ku Europa mu ku kuasa vamuanetu va ku Ucrânia omo lia ndzita. Vati honi vali na ku hasa ku linga vipanga viaco vutuhu kuli ndzita? Kaha vati vipanga viaco vili na ku kuasa vamuanetu ku Ucrânia?

 Ndzita mu ya putukile lia 24 ya Fevereiro ya 2022 ku Ucrânia, vakua Ndzango ya Vakua ku Kuatasanesa ya tavesele ku pangesa vimo vimbongo linga va ka kuase ku cifuti caco. Mbetele ya mu Ucrânia ya putukile ku landa viuma na ku vi tepela ku hitila mu Vivunga via Vakua ku Kuasa ku Viyovo via Mavu via ku pua 27.

 Linga va hase ku puisamo vukuasi vu ve ku hanene ku Mbetele ya ku Ucrânia, vamuanetu va ku cikota ca kama va singaniekele ha vukuasi vuka mpundu vu tondeka. Kaha Ndzango ya Vakua ku Kuatasanesa na Ndzango ya tala via ku Tuhula Mikanda, va lombele vukuasi ku Seketa ya Tala via ku Landa mu Mavu Ose linga va pangele hamo na Mbetele ya mu Ucrânia na ya mu Polônia linga va hane vukuasi vu tondeka kaha na ku linga vumo vutumbe vua vuasi-vuasi. Vamuentu ve ku pangela ku Seketa ya Tala via ku Landa, Seketa ya Tala via Mikanda, Ndzango ya Vakua ku Sompesa ya nkala Mbetele, umo mukuluntu ua ku Mbetele ya ku Ucrânia kaha na vamo vamuanetu va ku Seketa ya Tala via ku Landa mu mavu ose, ntsimbu yose va kele na ku likungulula linga va tale vukuasi vuka va hasa ku hana.

 Muanetu Jay Swinney ua pangela ku Seketa ya Tala via ku Landa mu mavu ose ngueni: “Cuma ca ku livanga ca puile ku tantekeya vukuasi vuka vua tondekele. Ca tondekele ku landa via kulia na vikuata via ku li lelesa navio, vize vi va izilila laza vamuanetu ku cihela caco. Vunoni citanga ca kele ha ku tantekeya vika mpundu va tondeka. Cikuavo naua, ca tondekele ku singanieka mu njila ika vikuata viaco vie ku hetele ku Ucrânia mu vuasi-vuasi kaha na mu njila ya cili.”

 Lia 9 ya Maio ya 2022, vamuanetu va tantekeyele honi vikuata vika via tondekele. Ca tondekele ku landa vikasa via via kulia, ngeci mua ntsitu na vantsi va mu vilata, sereale, luoso, vipoke kaha na vikuata via ku li lelesa navio ngeci mua njapau na mapapelo a mu ka ndzivo ka ku likuasesa. Vimbongo vi ve ku pangesele ku muntu ku muntu linga va lande vikuata viaco mu visimano viuana lika, vie ku hetele kampe $65 (U.S). Mu ku linga cingi ca vamuanetu ve ku tondekele vikuata viaco, Vakua Ndzango ya vakua ku Kuatasanesa va tavesele ku pangesa vimbongo vie ku kuasele ku landa vikuata viaco. Vati honi vamuanetu ve ku hasele ku tuala vikuata viaco ca ku hona ku haka miono yavo mu vusonde?

 Lia 13 ya Março, vamo vamuanetu vavali va ku Polônia va setekele ku tuala vimo vikuata ku Mbetele ya ku Polônia ku cimo cisete ku hiehi na LVV, ku Ucrânia. Ntsimbu tele kanda va katuke, vamuanetu va ku Mbetele ya Polônia na ya mu Ucrânia va kuasele ava va muanetu vaco vavali ku li viukisila vungendzi vuavo. Vi Mbetele viaco vie ku kuasele vamuanetu va hete mu cifuti ca mu Ucrânia kaha na ku va kuasa ku haka vitantekeyeso mu makalu avo, mu ku muesa ngecize vali na kuya mu ku tuala vukuasi. Cikuavo naua, vi Mbetele viose vivali via pangelele hamo linga va hangule tapalo ika ye ku kuasele vamuanetu vaco ku ka heta vuino ku Ucrânia. Omo lia ku liviukisila vuino kaha na vukuasi vua Yehova, vikuata via ka hetele vuino kuli vamuanetu va ku Ndzango ya vakua ku Kuatasanesa ku LLV mu litangua lia ngongo, kaha vamuanetu vaco va hasele ku hiluka vuino ku Polônia.

 Ku eseka ca ku livanga cendele vuino, vunoni vamuanetu va hasele ku ambata tonelada imo lika, vutuhu vutumbe vua keleko tele vua ku ambata vitonelada via ku pua 200. Vati honi tue ku tutile viose na ku vi tepelela ku vamuanetu mu vuasi-vuasi?

 Vantu mu va tandele mizimbu mu saiti yetu jw.org, ku tuala ha vamuanetu vali na ku yanda mu cifuti ca Ucrânia omo lia ndzita, mu mavu ose vantu va tondele ku kuasa. Cingi ca vaze va kele ku vihela via ku laako va lingile milambu yavo ku hitila mu saiti ya Vakaleho va Yehova, muomu va tantekeyele ngecize vimbongo viaco ve ku vi pangesele vuino. Vaze co va kala mu vifuti via li hata na Ucrânia va pangesele ntsimbu yavo, ndzili na vikuata viavo mu ku kuasa. Tu ci talenu amo malungano.

 Ku cifuti ca Polônia, vantu va muesele cizango ca ku kuasa va hanene makulukazi a makulukazi a vikuata kaha na vamo vanike va hanene ma vuana. Muanetu Bartosz Kościelniak, ua pangela ku Seketa via Tala via ku Landa ku Mbetele ya ku Polônia ua handekele ngueni: “Nja tandaho laza Visamo 110:3 mu vi njila via ku liseza-seza. Mukanda uaco ua handeka nguauo: ‘Vantu vove va lihana ku cizango cavo. ’ “Vunoni nji na limuena na meso ange mpundu, vukuasi vuose vu va na hana vamuanetu kaha na vakua ku lihana vavengi vezile mu vuasi-vuasi mu ku panga, evi via nji muesele ha toma vusunga vua mezi a ku mukanda uaco.”

 Umo muanetu a ka pangela ku imo impreza ya mazi a makalu ya mu mavu ose, ua hanene makalu a engi kaha a kama linga va a pangese mu imo ntsimbu na ku hakamo mazi a tondekele, muanetu uaco ua handekele ngueni: “Kuli yange eci ca puile vukovelelo vua ku muesa cilemo cange kuli vamuanetu na kuli Yehova. Nja vuile ndzolela ya kama mu ku hana vukuasi vuaco.” Cimoneka ngecize ua zumbuile vilitru 7.700 via mazi a makalu kaha vamuanetu vendesele makalu aco, vendele ntunda ya kupua 48.000 kilometru mu ku pangesa ntsimbu yavo, ndzili linga va ka hetese vikuata viaco ku vamuanetu.

 Vamuanetu na va ndumbuetu va li hanene na mutima uavo uose mu ku kuasa. Kaha eci ku eseka ca ku livanga, lia 28 ya Março mu nima ya matangua 15, vitonelada via kupua 100 via via kulia, vikuata via ku li lelesa navio, na vihemba va vi tualele ku vamuanetu mu Ucrânia! Kaha ku hitila mu milambu ya vamuanetu na vaze vakua ku pangela ku vi impreza mu ku kuasa ku hetesa viuma, tua hasele ku zokotueya vimbongo. Tunde ha litangua liaco Vakaleho va Yehova va na hasa ku tuma vitonelada via kupua 190 via via kulia na vikuata vikuavo mu Ucrânia. Vati evi via kuasele mua kama vamuanetu?

 Omo vikuata via hetele ku Lviv, vakua Ndzango ya Vakua ku Kuatasanesa, va tepelele viuma viaco ku vose va tondekele vukuasi mu Ucrânia. Va vi tepelele mu vimbonge via ku li seza-seza, vimo viavio via kele ntunda ya kupua 1,300 kilometro na Lviv. Vutuhu vamuanetu va lihakelele kapandi kose, vunoni via ambatele ntsimbu ya kama. a

 Muanetu Markus Reinhardt ua pua mukuluntu ku Mbetele ya ku Ucrânia, ua handekele ngueni: “Eyi ntsimbu yose ya ikalu, cingi ca vamuanetu vali na ku limuena na meso avo mpundu mua vati Yehova ua tu lema kaha na seho ya kala ha ku kava vimamuna via mu lukungulukilo lueni—ambe vene omo tele kanda tu hite mu vitanga ngeci mu evi. Ca ku muenako vose ve ku va mamuna vakele na mema kaha na via kulia via ku puamo mu vimo visimano. Ku tuala ha cimamuna caco, umo muanetu ku Kyiv ua handekele ngueni: Lukungulukilo lua Yehova lue ku tu viukisila vua lumo visoti via ku lutue via ku linga na ha meso vui kaha eci capua civezikiso ca kama. Ku kala na via kulia, mema kaha na cisandzi, covola miono yetu mpundu. Ca tu ile cikuma ku mutima ku mona seho i va hakele vamuanetu ha cimamuna caco, muomu vamuanetu ku Mbetele va uanene ntsimbu ya ku liviukisila vuino mu ku hana vukuasi.”

 Vati vamuanetu va livuile mu va tambuile vukuasi vuaco? Mykola na Zinaida, va kala ku Kharkiv, va handekele vati va livuile ku mutima nguavo: ku lisosomua ca vamuanetu ca tu ile cikuma ku mutima, tua santsela mua kama ku via kulia na vihemba. Mua vusunga tua limuena mpundu livoko lia Yehova. Kaha Valentyna ua kala ku mbonge yaco, ua handekele ngueni: Tunde mu i na putukila ndzita, mu vivenda mue ku sula cikuma vantu vakua ku landa via kulia, ku ce ku pua ca casi ku landa viuma vi tue ku tondeka. Vunoni Yehova ua muene visoti vi tua kele na ku pinda navio kaha ua pangesele vamuanetu mu ku tu tepela via kulia ku vindzivo vietu kaha mu vikasa viaco mua kele viose vi tua tondekele. Ha vi ntsimbu evi via ku linga na ha meso vui, hakeho tu na limuena ku niunga ca Yehova na lukungulukilo lueni mu njila ya ku lifuila. Mua vusunga capua ku vezika ca kama kutambula vukuasi ha ntsimbu i tondeka.

 Va Yevhen, Iryna, na Mykyta va tinina ku Mariupol va handekele nguavo: “Tua santsela mua kama mu ku tu niunga kaha na ku kuasa vusoko vuetu. Kalenu na vusunga ngecize vukuasi vuose vu mua hanene, vua hetele ha ntsimbu ya cili kaha omo tua tambuile vikasa viaco tua singaniekele nguetu mua kele lika via kulia, vunoni mua tua vi sokoluele tua muene mpundu cilemo cenu hali yetu!”

 Mua vusunga, tu na limuena mua vati Yehova ue ku tuamenena vangamba veni ku hitila mu sipilitu santu yeni mu ku hana vukuasi vu tondeka mu vi ntsimbu via vi ndzita na mizimbu ya vi ndzita. Milambu i mue ku linga na mutima uenu uose mu ku kuasa vamuanetu mu mavu ose, cingi cavio mue ku vi lingila ku hitila mu donate.pr418.com, vie kuasa mua kama ku puisamo viose evi, tua santsela mua kama ku vuhuanga vuenu!

Ku Hana Vukuasi Vu tondeka mu Njila ya Vuasi-vuasi Kaha ya Cili

1. Lia 24 ya Fevereiro ya 2022: Ndzango ya Vakua ku Kuatasanesa ya tavesa vimo vimbongo linga va kuase ku Ucrânia, eyi njila yaco ili na ku kuasa Mbetele ku hana vukuasi vu tondeka

2. Lia 24 ya Fevereiro ku tuala 8 ya Março ya 2022: Mbetele ya mu Ucrânia ya putukile ku landa viuma mu cifuti caco vene kaha na ku vi tepela ku hitila mu Vivunga via vakua ku Kuasa. Cikuavo naua Mbetele ye ku liviukisila vua lumo, ku tambula vikuata vie ku tunda ku Polônia

3. Lia 9 ya Março ya 2022: Ndzango ya Vakua ku Kuatasanesa ya tavesa ku tuma vukuasi ku cifuti ca Ucrânia

4. 10–12 ya Março ya 2022: Va lingile vumo vutumbe va mone nga ve ku hasele ku tuma vikuata ku mbonge ya Lviv ku Ucrânia

5. 13 ya Março ya 2022: Va setekele ku tuma vikuata viaco ku hitila mu cifuti ca Polônia linga vi ka hete ku Lviv, ku Ucrânia

6. 14–16 ya Março ya 2022: Vamuanetu va ku Viseketa via tala via ku Tunga, va ile ku imo ya vindzivo kue ku hitila viuano via kama ku Polônia ku hiehi na Poznan, mu ku ka kuasa ku longolola vikuata vi va tumine ku vamuanetu va tondeka vukuasi, ngeci mua via kulia na vikuata via ku lilelesa navio.

7. Lia 17 ya Março ya 2022: Tua putukile ku tutangeya vitonelada via ku pua 13 ku nginga ya Ucrânia, mu ku linga ku eseka ca ku livanga cendele vuino

8. Lia 21–27 ya Março ya 2022: Tua pangesele njila imo lika, tua putukile kututa via kulia viose ku Polônia na ku vi tuala ku Ucrânia kaha na ku vi tepela ku vihela viose kua tondekele vukuasi, mu li tangua lia ngongo

9. Lia 28 Março ya 2022: Mu nima ya ku tavesa amo matangua 20, tua tutile 100 toneladas ya via kulia, vi kuata via cihindu kaha na vihemba ku Ucrânia

 Na hano, Vakaleho va Yehova va na tumu 190 toneladas ya via ku lia na vi kuata vikuavo mu ku kuasa Ucrânia.