Março ya 2020, vakua Civunga ca Tala via Cihindu mu Mavu Ose va handekele via ku putuka ca musongo ua COVID-19, kaha cingi ca vantu ka va singaniekele ngecize musongo uaco ue ku isualele mu ntunda ya kama. COVID-19 i na kuata cikuma ku miono ya makulukazi a vantu, hamo lika na vamo Vakaleho va Yehova ku muvila, mu visinganieka kaha na vuhutu vene. Vati Vakaleho va Yehova va hasele ku liviukisila na ku hana vukuasi vuze vu tondeka?

 Ndzango ya Vakua ku Kuatasanesa ya ku Civunga ca Vantuamena ca Vakaleho va Yehova va pangele Vindzango via ku Kuasa Vakua ku Hita mu Viyovo via Mavu, vi tuvakana 950 mu mavu ose. Cikuavo naua, va lingile tumo tu vivunga ku vihela viaco mpundu ku tondeka cikuma vukuasi kaha vintsimbu vikuavo co Vakaleho va Yehova ve ku tambula vukuasi vua vanguvulu. Kaha Ndzango ya Vakua ku Kuatasanesa navo ve ku hana vukuasi ha vintsimbu vikuavo naua.

 Ca ku muenako, taleni via hitile ku Paraguai. Kuliya na imo jornal ya handekele ku tuala ha visoti viluli na ku koka musongo ua COVID-19, nguayo: “Cingi ca vantu mu cifuti ca Paraguai ka vesi na via kulia ku vindzivo viavo. Vunoni civunga ca CAH ku Paraguai, ca putukile ku ku tepela viuma via tondekele ngeci mua, via kulia, vikuata via ku lelesa hembo, vikuata via ku muvila ku vantu vose. Viuma viose vi va kele na ku tambula nkala muntu, ndando yaco ya puile 30$ (U.S.).

 Vati vakua ku hana vukuasi, ku vihela kue ku hita viyovo via mavu, ve ku hasa ku liniunga ku musongo ua Covid-19? Ve ku liniunga mu ku zala tu nguua ku tunua na ku lisondoloka ku vantu. Cikuavo naua, ve ku haka miono yavo mu vusonde mu ku kovela mu vivenda via kama ku ve ku landela via kulia viaco, linga va mone nga navo ve ku ononoka lisiko lia ku niunga mua cili viuma. Kaha evi via ambatesela kumo na ku tala nga vantu vose ve ku liniunga vuino, nga makalu a ve ku pangesa a ku lelesa, kaha nga via kulia ve ku vi tulikila ha vihela via ku lelesa vuino. Kaha mu ku manusula, vaze ve ku tuala vi kuata viaco navo ve ku lihakela kapandi ka ku kala ku laako na vamuanetu ve ku iza mu ku tambula.

 Mu Janeiro ya 2021, Ndzango ya Vakua ku Kuatasanesa, ya pangesele vimbongo vi tuvakana 25 milhões ya dólare mu ku kuasa vaze vali na ku hita mu musongo ua Covid-19. Vimbetele na vakua CAHs ve ku pangesa vimbongo via milambu linga va lande viuma na ndando ya cili. Ca ku muenako, ku Chile, va muanetu ve ku pangela hamo na civunga ca vakua ku kuasa vaze ve ku hita mu viyovo, va tondele ku landa 750 kilu ya vipoke. Vunoni ndando yaco ya londele mua kama! Kaha mu nima ya vi ola vivali vamuanetu mu va tondele ku fueta ndando yaco, mukua ku landesa ua lekele vamuanetu ngecize kuli umu muntu ua landele vipoke mu ngonde i na hiti, na vi hiluisa. Ngeci vamuanetu va hasele ku landa na ndando ya indende.

 Vunoni ambe ngoco, omo vamuanetu va ile ku venda mu ku ka hanga vipoke viaco, mukua venda ka tondele ku tambula vimbongo vi va likuminine na ku vangeya vamuanetu ngecize ve ku pangela kuli mu njila ize kati ya cili ngue mu ve ku linga vakua vindzango vikuavo via vakua mavu. Mu nima ya umo muanetu ku vundila mu mutima, ua lomboluele muntu uaco ngecize va lingile laza vihangula ku tuala ha viuma vi va tondele nkala masoko mu cikungulukilo. Vamuanetu va lomboluele naua ngecize mu ku linga mu cikungulukilo mua kala vamuanetu va ku miyati ya ku liseza-seza, mu nkala njeke tua pande ku hakamo vize vi ve kulia nkala masoko. Na ku mu lomboluela naua ngecize vimbonge viaco via pua milambu i ve ku linga vamuanetu. Mukua venda ua komokele mua kama. Ngeci ua tavele ku landesa na ndando ya cili kaha na ku linga mulambu ueni mu ku vuezeleko 400 kilu ya vipoke.

 Lusu, umo ntulue ua ku Libéria, ua yoya na muaneni ua mpuevo, na isemueno, na vana vavo vatutu. Tangua limo ku cimene tele vali na ku tanda mukanda ua litangua na ku liaula. Omo mutekulieni ua muane ngecize ku vesi naua na via kuli ku ndzivo, ue huile ngueni: “Vika tu lia lelo?” Kukueni Lusu, ua mu kumbuluile ngueni ua vundilile laza kuli Yehova kaha ua kele na vusunga ngecize Yehova a va hana viose vi va tondeka. Ku cinguezi ca litangua lize vakuluntu va mu cikungulukilo va mu sanene linga a ka hange via kulia vi va va viukisilile. Ivene ngueni: “Mutekuliange ua handekele ngueni, njili honi na vusunga ngecize Yehova ue ku ivua vivundilo vietu na ku vikumbulula, muomu na kumbulula civundilo cetu.”

 Umo mpuevo ua ku República Democrática do Congo, ndzivo yeni ya kala ku mukulo ya ndzivo ya umo mukaleho vua Yehova. Omo ua muene vusoko vuaco vuli na ku tambula via kulia ku vakuavo Vakaleho va Yehova, ua lekele mukua ndzivo yeni ngueni: “Musongo ua Covid-19 mu u hua, nange nji pua Mukaleho ua Yehova, muomu ve kuli kuasa umo na mukuavo mu ntsimbu ino ya musongo.” Kaha mukua ndzivo yeni ngueni: “U pua Mukaleho ua Yehova omo lia njeke imo ya luoso?” Ikeye ua kumbuluile ngueni: “kuahi, kati omo liaco. Vunoni njeke yaco ya luoso, i muesa ngecize va lilema umo na mukuavo.”

 Vakaleho va Yehova ve ku linga viose evi mu vuasi-vuasi linga va hase ku kuasa vamuanaye va tondeka cikuma vukuasi mu ntsimbu ino ya musongo omo lia milambu i mue ku hana. Ngeci mukemuo, tu tonda ku mi santsela cikuma ku milambu yenu i mue ku hana ku hitila mu saiti yetu donate.pr418.com.