Mbimbiliya ya polofetele laza ngecize lelo lino kue ku solokele mandunduma, misongo ya ku litambuisa, na viuma “via ku zuzuisa.” (Luka 21:10, 11) Vupolofete vuaco vuli na ku tualelelaho ku lipuisamo mu ku hita ca muaka ua vipanga ua 2022. a Ca ku muenako, ndzita ku Ucrânia ili na ku tualelelaho na ku kaluuisa miono ya vantu vavengi. Kaha mu vifuti via vingi musongo ua COVID-19 tele ua ku tepuluka. Cikuavo naua, vantu vavengi va na pindi na viyovo via mavu, ngeci mua mandunduma a hitile ku Haiti na mpuendza ya hitile ku América Central, ku Filipinas na ku sudeste da África. Vati Vakaleho va Yehova va kuasele vakua ku hita mu viyovo viaco?

 Mu muaka ua vipanga ua 2022, Lukungulukilo luetu lua hanene vukuasi ku vakua ku hita mu viyovo via kupua kampe 200. Kaha tua pangesele vimbongo vi heta kampe ku 6.044.625.60 kwanza. Talenu vati milambu va i npangesele mu ku kuasa vakua ku hita mu viyovo.

 Lia 14 ya Agosto ya 2021 ku Haiti kua hitile mandunduma a ku pua 7.2. Ca vusiua, Vakaleho vatatu va tsile—vandumbuetu vavali na muanetu umo lika. Vakua kuovoka kasi ve ku pinda na visoti vi a kokele mandunduma aco. Muanetu Stephane ngueni: “Mu mbonge mua tsile vantu vavengi omo liaco, mu vingonde vi tuvakana vivali, simano ku simano va kele na ku tsinda vantu.” Kaha Muanetu Éliézer ngueni: “Vakaleho vavengi ka va kele na vindzivo, vizalo, visapato, na viuma vikuavo vi va tondekele. Mu vingonde via vingi, vavengi va yoyele mu liova omo lia mandunduma a kele na ku soloka kusua kumo.”

 Lukungulukilo luetu lua kuasele mu vuasi. Mbetele ya ku Haiti ya hanene via kulia via vingi, vitenda, vi colchão, na vi placa solar. Cikuavo naua, mu muaka ua vipanga ua 2022 va tunguluile vindzivo vi tuvakana 100. Mu cipanga caco tua pangesele vimbongo vi tuvakana 503.718.800.00 kwanza.

 Vamuanetu na vandumbuetu ve ku santsela cikuma. Ndumbuetu Lorette ngueni: “Mandunduma a puzuile ndzivo yetu na ku tu pihisila mingoso. Ka tua kele na via kulia, vunoni lukungulukilo lua Yehova lua tu kuasele mu ku tu hana viose vi tua tondekele.” VaMicheline nguavo: “Lindunduma lia pihisile ndzivo yetu i tua yoyelele na vana vange vavali. Ka nja tantekeyele via ku linga, ngeci nja vundilile kuli Yehova kaha ua tu kumbuluile ku hitila mu lukungulukilo lueni. Tuli honi na ndzivo ya cili. Nja lihakela kapandi ka ku linga viose-ovio mu ku muesa ku santsela cange kuli Yehova.”

 Vakua ku sika va nongonuene kapandi ketu ka ku kuasa vantu. Umo ntuamena ua ku Lazil ngueni: “Nji mi sangala ku kapandi kenu ka ku kuasa vuasi-vuasi. Cikuavo naua, nji sangala muomu mue ku singimika cikuma vakua ku sika. Nje ku mi komoka muomu ka mue ku tuameka vimbongo. Vunoni, mua lema ku kuasa vantu kaha mue ku lingamo omo lia cilemo.”

 Lia 24 ya Janeiro ya 2022 Mpuendza Ana ya livangele ku Moçambique kaha ya ka hetele na ku Malawi. Mpuendza yaco ya ambateselele kumo na kankumba ua kama. Ya pihisile viavu, ku vatula vintsambo via tuhia tua vunengu na viuma via vingi.

 Kaha Vakaleho va Yehova va tuvakana 30.000 ku Malawi na ku Moçambique va hitile mu mpuendza yaco. Muanetu Charles ua ile mu ku kuasa, ngueni: “Nja vuile vusiua vua kama ku mona tuyando na viuma vi va zimbalesele vamuanetu.” Cikuavo naua, via kulia na vimbuto viavo viose via pihile. Vindzivo via vavengi via pihile. Kaha ca vusiua umo muanetu ua tsisile mpueyeni na vana veni vavali omo vuato vua vombelele.

 Mpuendza ya puile ya ku tungumuna. Vumo vusoko ku Malawi ku vandemba va vuile ku cuma ca mema. Vindonga vivali via sulile cikuma. Muanetu Sangeredo na vusoko vueni va tuhukile vuasi mu ndzivo. Va lingile cihangula ca cili muomu kantsimbu ka kandende lika, mpuedza ya vihisile ndzivo na viuma viavo viose. Ngeci va ile ku Ndzivo ya Vuangana vutuhu citava kuendaho viminutu 30, vunoni vendeleho vi ola vivali. Va hetele va na zulu na ku hona, vunoni va hetele vuino.

 Mbetele ya ku Malawi na Moçambique via putukile cipanga ca ku kuasa vakua ku hita mu viyovo. Va tumine tuniungi va ku zinguluka na vakuluntu va tantekeye vika va tondekele vamuanetu va hitile mu visoti viaco, kaha na ku va kaniamesa. Va hanguile Vivunga via Vakua ku Kuasa ku Viyovo via Mavu linga va tuamenene cipanga. Vivunga viaco vuasi-vuasi via putukile ku kuasa vamuanetu va kale na via kulia na vikuavo vi va tondekele. Va pangesele vimbongo vi tuvakana 16.622.720.40 kwanza mu ku kuasa vantu. Kaha na 151.115.640 kwanza mu ku viukisa na ku tungulula vindzivo.

 Vivunga via Vakua ku Kuasa ku Viyovo via pangesele vuino vimbongo, kaha ca seho ku lingamo omo lia ku londa ca vindando. Ca ku muenako, mu vingonde vitanu na vivali mu va putukile cipanga ca ku kuasa vakua ku hita mu viyovo, ndando ya vunga ku Malawi na mazi a mu makalu via londele cikuma. Linga va zokotueye vimbongo, vamuanetu va landele via kulia via vingi na vikuata via ku tungisa mu Malawi ha ntsimbu imo lika. Omo liaco, va va tepuluile ku ndando kaha ka va pangesele vimbongo via vingi mu ku vi tuta.

 Cipanga ca ku kuasa vakua ku hita mu viyovo ca hetele ku mitima ya vangamba va Yehova. Muanetu Felisberto ua ku Moçambique ngueni: “Kanda nji moneho lukungulukilo lu hana viuma via vingi ngeci mua: vikuata via ku tungisa, mendelo, vakua ku tunga, via kulia, na ku tuamenena na cilemo. Cipanga caco ca muesele ha toma cilemo ca vamuanetu ca tumbuile Yesu ku Yoano 13:34, 35.” Ndumbuetu Ester ua ku Malawi ngueni: “Ka nja hasele mua ku lingila muomu ka nja kele na vimbongo via ku tungisa ndzivo ikuavo. Ngeci mukemuo, vamuanetu mu va nji tungilile ndzivo, nja livuile ngue njili laza mu Citungu.”

 Omo tuli mu hiehi na ku kovela mu mavu a aha, kasi vene tu ka mona ku livuezelela ca viyovo. (Mateo 24:7, 8) Tua santsela ku milambu yenu, tuli na vusunga nguetu vangamba va Yehova va ka tambula vukuasi vu tondeka. Kaha mu saiti donate.pr418.com va lombolola mua ku hanena milambu. Tua santsela ku vuhuanga vuenu.