Mbimbiliya ya polofetele ngecize ku ku-kotoka ca ano mavu, “cifuti ci ka katukila cifuti” kaha ku ka kala “mandunduma a mavu kueka na kueka.” (Mateu 24:3, 7) Mua vusunga, tua limuena ku lipuisamo covu vupolofeto mu hita ca muaka ua 2023. a Vutuhu visoti via ndzita na mandunduma via hitile ku vifuti vi tuvakana 100, vunoni Vakaleho va Yehova va limuesele cilemo na ku likuata kumo. Mu njila ika?

 Mu ku hita ca muaka ua vipanga ua 2023, vamuanetu va hitile mu viyovo via mavu ni via ku koka ku vantu via ku pua 200. Vindzango via tala via masiko ya Vakaleho va Yehova mu mavu ose, va pangesele vimbongo via ku pua 10 milhões ya vidólare b mu kuasa kuose kua hitile viyovo via mavu. Evi vimbongo viaco ve ku vi fumisa ha milambu i ve ku hana vamuanetu. Kaha talenu vati milambu yenu va i pangesele mu ku kuasa ku viyovo vivali via kama cikuma, ha kati ka viyovo via vingi vi va hitile navio vamuanetu.

 Ku vihela vimo ku Nigeria, kua hitile vimpuendza kaha vindzivo via vingi via zavamene mu mema. Vunoni, mpuendza ya hitile mu Outubro ya 2022 ya puile ya kama cikuma ku pulakana vimpuendza via ku miaka ya ku nima. Kaha vihela ni vihectares via ku pua 676.000 (1,670,432 acres) via ku limina via nongele ku mpuendza yaco. Kaha vantu va ku pua 2 milhões va nungulukile. Kaha mu vuasi-vuasi Mbetele ya ku Nigéria ya hanene vukuasi vua tondekele mu ku pangesa Ndzango ya Tala via ku Kuasa. Kaha va lingile vimo vivunga mangana va tuale vukuasi vua ku muvila na vua mu lutsilielo ku va vaze va hitile mu visoti viaco.

•   Vakua kuambulula va ku pua 7,505 va nungulukile

•   Vindzivo via ku pua 860 via zavamene mu mema kaha vimo via lundumukile

•   Vindzivo via Vuangana via ku pua 90 na limo Lipela lia Viuano lia zavamene mu mema

 Va pangesele vimbongo vi heta ku 250,000 US$ mu ku kuasa vaze va na hiti mu viyovo, hamo lika na ku va hana evi:

•   Via kulia ngeci mua luoso, vipoke, massa na macarrão.

•   Vimo vikuata via ku liyoyesela, ngeci mua vicolchões na mosquiteiros

•   Ku vuahesa na tunga vindzivo vi na lundumuka

 Vati vamuanetu va pangesele na mana milambu yose i va tambuile? Imo njila cili, ya puile mu ku hilula vuino nkala ndzivo ya lundumukile kaha na ku mona vati ve ku i tunguluile. Cikuavo naua, nga imo ndzivo ya tondekele ku i tunga lueka, va kavele imo tungisi ya yasi kaha ya litombola na muhela uaco.

 Vamuanetu na vandumbuetu va tambuile vukuasi vuaco, va santselele mua kama. Umo ndumbuetu ua handekele ngueni: “Mpuendza ya hakele miono yetu mu vusonde. Muomu vindzivo na mehia etu via vihile, kaha ka tua kele na cihela ca ku yoyela. Tua vuile ku lembama ca kama omo vamuanetu vezile mu ku tu kuasa ha litangua lize kaha na ku tu hana viose via tu kambelele. Cikuavo naua, tua vuile ndzolela mu tua tambuile via kulia via tundile ku Mbetele. Tua likomokelele ku mona ku lipuisamo ca mezi a ku Yoano 13:34, 35, mu miono yetu. . . . Cilemo ca vusunga ku ca kala mpundu. Na mutima uose, yange na vavusoko vuange tua santselako mua kama ku vamuanetu vose vezile mu ku tu kuasa ha ntsimbu ya cili.”

 Vavengi muimbo va muene kapandi ka tua lihakelele mu ku kuasa ha ntsimbu ya tondekele. Umo ntuamena ua limbo lia Sabagreia mu mbonge ya Bayelsa, ua handekele ngueni: “Kua kala vikungulukilo ni malombelo a engi ha mavu, vunoni Vakaleho va Yehova lika va pangele viuma ngeci muevi. . . . Ngeci lukungulukilo [luavo] lukeluo lika lue ku muesa cilemo ca vusunga mu mavu ose.”

 Mu ku hita ca ngonde ya Fevereiro ya 2023 ku Chile, kua solokele tuhia va kama cikuma mu vintsimbu 400 kaha via nongesele viuma via vingi. Kaha via uemekele mehia mu vihectares via ku pua 430,000 (1,062,553 acres) kumo lika na vimo vindzivo via seho ya kama ku Chile. Kaha vantu va heta ku 8,000 va nungulukile. Ngeci mu nima yeci ciyovo, Mbetele ya ku Chile ya putukile ku kungulula vukuasi linga va ka tuale ku vamuanetu.

•   Vakua kuambulula va ku pua 222 va nungulukile

•   Vindzivo via ku pua 20 via puzukile

 Va pangesele vimbongo vi heta ku 200,000 US$ mu ku kuasa vaze va na hiti mu viyovo hamo lika na ku va hana evi:

•   Via kulia na mema

•   Maholi, vikuata via ku kombesa na vihemba

•   Ku tungulula vindzivo vi na papuoka

 Vumo vusoko vua vuile vusiua vua kama mu va muane ngecize ndzivo na mingoso yavo vi na vihia na mpuendza. Evi via va lingisile kuma mua kama mutima. Ku vuputukilo va vuile vusiua mu ku mona muhela ha kele ndzivo na mehia avo vi na aluluka ngundu. Vunoni mu va muene ku tungulula ca vindzivo kamandende kamandende va putukile honi ku liziva ku lembama. Ku mona cilemo ci va muesele vaze vakua ku lihana, via va kuasele ku pinda na visoti viavo. Cikuavo naua, ku mona ku likata ca vaze va tunguluile ndzivo yavo, ca va vuisile cizango ca ku lihana mu ku ka kuasa mu ku tungulula ndzivo ya muanetu mukuavo.

 Vipanga via ku kuasa via kuatele mua kama ku mitima ya vamuanetu na vandumbuetu. Umo muanetu ua handekele ngueni: “Vutumbe vua Yehova vua ku tumbika Vivunga via ku Kuasa ku Viyovo vua pua vua cili cikuma. Litangua lia mukuavo mu nima ya ciyovo, vamuanetu vuasi vuasi va hetele mu ku hana viose-ovio via tondekele. Ce ku tu komouesa ku tanda vati vamuanetu mu mavu ose vali na ku tambula vukuasi mu vuasi vuasi. Vunoni nga vi na ku solokela mpundu hali yove, ce ku kuata mua kama ku mutima. U komoka mua kama lukungulukilo, ku mona vati vamuanetu ve ku tambuluisa vifua via Yehova kaha ve ku lisosomua na ku lihakela kapandi ka ku kuasa vamuanaye ku vize vi tondeka ku muvila, mu visinganieka kaha na mu lutsilielo. Mua vusunga, tua limuenene mpundu cilemo ca Yehova.”

 Omo ano mavu ali na suena ku ku nonga, viyovo via mavu via ka tua tualelelaho ku livuezelela. (Luka 21:10, 11) Vunoni ku hitila mu cikungulukilo ca Vakua Kilistu tue ku mona cilemo ca muangana uetu Yesu Kilistu muomu ikeye ali netu “matangua ose, na ha ku-kotoka ca miaka.” (Mateu 28:20) Ngeci milambu i mue ku hana ku cipanga ca ku kuasa mu mavu ose, ku hitila mu donate.pr418.com na mu vinjila vikuavo ngeci mua ndzili kaha na ntsimbu yenu, vie ku muesa ngecize mue ku kuasa Vuangana vua Njambi na Muangana Yesu. Tua santsela, vuhuanga vuenu vu tualeleho.