Vanguvulu vavengi mu mavu ose, va na vindika mbunga ya yingi ku likunguluila hamo ni ku linga viuano via mbunga. Vakaleho va Yehova ve ku ononoka masiko aco, vunoni ve ku likungulula mu cifua ci vindika ku haka mu vusonde cihindu ca vose. Ngeci mukemuo, vikungulukilo vili na ku pangesa viaplikativu via videoconferencia ngeci mua Zoom linga va likungulule.

 Linga viuano vi tualeleho ku kalako ntsimbu yose, Civunga ca Vantuamena va tavesele ku pangesa milambu linga va fuetele vikonta via Zoom ku vikungulukilo. Eci ca kuasele cikuma vimo vikungulukilo, muomu ce ku va kaluuilile ku uana vimbongo via ku fuetela imo konta ya videoconferencia ya kala ha 15 ku tuala 20 dolar (USD) vimbongo viaco vi hasa ku pua (9.000Kz ku tuala 12.000Kz). Ku vuputukilo, evi vikungulukilo via kele na ku pangesa vikonta via vuana. Vunoni vikonta viaco, vie ku tava lika vantu vavandende kaha via kalako na vumo vusonde. Hano honi vikungulukilo vie ku pangesa konta ya zoom ya lukungulukilo, ve ku hasa ku pangesa vuino konta yaco kaha vantu vavengi ve ku hasa ku kovela mu ciuano linga va kunguluke. Na hano, vikungulukilo vi tuvakana 65.000 mu vifuti vi tuvakana 170 vali na ku pangesa evi vikonta viaco.

 Talenu via solokele ku Cikungulukilo ca Kairagi ku Manado ku Sulawesi do Norte (Indonésia). Eci cikungulukilo ca likela ku pangesa aplikativu ya vuana kaha ce ku pangesa honi konta ya Zoom ya lukungulukilo. Muanetu Hadi Santoso a lombolola ngueni: “Hano honi, cipue vene vamuanetu ka va kele na vutongue vua kama vua ku pangesa vitelefone, vitablet na vikomputador, ve ku hasa ku litokakana vuino ku viuano kaha na ku lilongesa via vingi. Muomu ka ve ku litokakana lua luingi ku ciuano cimo lika.”

 Muanetu Lester Jijón ua pua mukuluntu mu Cikungulukilo ca Guayacanes Oeste ku Guayaquil, Ecuador ngueni: “Omo lia ku hona vimbongo, vamuanetu na vandumbuetu vavengi nga ka va hasele ku fuetele imo konta ya Zoom, linga cikungulukilo cose ci hase ku kunguluka. Vunoni na vukuasi vua lukungulukilo, vantu vavengi ve ku litokakana ku ciuano ha ntsimbu imo lika. Kaha vamuanetu va hasa ku lania mbunga yose oyo i va na zange ca ku hona ku lisosomua nga va hasa ku litokakana ni kuahi.”

 Muanetu Johnson Mwanza ua pua mukuluntu mu Cikungulukilo ca Ngwerere North ku Lusaka mu Zambia, ua sonekele ngueni: “Vamuanetu na vandumbuetu vavengi ka ve ku hona ku handeka nguavo, ‘Zoom ya lukungulukilo ya tu kuasa ku livua mu hiehi na vamuanetu, kaha na ku mona nguetu Yehova ua tu lema na ku tu haka seho.’”

 Omo lia milambu ya mu mavu ose, lukungulukilo lua hasa ku landa evi vikonta via Zoom. Kaha ve ku pangesa mpundu milambu ya tala via ku kuasa vakua ku hita mu viyovo. Cingi ceyi milambu ve ku i hanena ku hitila mu saiti ha mutamba donate.pr418.com. Tu santsela cikuma ku vamuanetu va mu mavu ose omo lia vuhuanga vuenu, kaha milambu yenu ye ku kuasa naua ku vipanga via ku kuasa vamuanetu vali mu visoti mu mavu ose.—2 Kolintu 8:14.