Umo muana mpuevo, ua ku Colombia, ua lizina Nicole, nguendi: “Nja lema Ndzivo yetu ya Vuangana! Kukekuo ku nje ku liuana na vusoko vuange vua mu lutsilielo.” Nenu mukemuo mu mue ku livua ni?

 Mu mavu ose Vakaleho va Yehova va kala na Vindzivo via Vuangana vi heta ku 63.000. Vutuhu vindzivo viaco vie ku tu kuasa ku lemesa vuino Njambi, vunoni kuli vikuavo naua. David, umo pioneiro ku Colombia nguendi: “Ku vuaha ca Vindzivo vietu via Vuangana ce ku koka vantu. Cingi ca vantu ve kuizamo ve ku komoka cifua ci tue ku vi niungilamo.” Cili vene, tue ku lihakela kapandi ka kama ku niunga Vindzivo vietu via Vuangana. Vati honi tue ku lingamo?

 Vikungulukilo vie ku pangesa Vindzivo via Vuangana vikevio naua via kala na kapandi ka ku vi niunga. Ngeci vamuanetu na vandumbuetu ve ku vi komba kusua kumo. Kaha ve ku viukisa viuma vi na vihia ni ku hingisamo vieka.

 Mu ku kuasa vikungulukilo vi puisemo vuino cipanga caco, vakua LDC (Seketa ya Tala via ku Tunga) ve ku hangula vamuanetu linga va longese vikungulukilo mua ku niungilamo Ndzivo ya Vuangana. Nkala muanetu va mu kundika Vindzivo via Vuangana 6 ku tuala 10. Ue ku yako na ku longesa vakua ku ambulula mua ku niungilamo Ndzivo ya Vuangana. Mu nima ya nkala miaka 3, ue ku hilula Vindzivo via Vuangana vi va mu kundika a mone nga vili na vimo vitanga vi hasa ku koka mponde.

 Vamuanetu na vandumbuetu ve ku santsela muakama ku vilongesa vi ve ku tambula kuli ava valongisi. Ndumbuetu Induhumathi ua ku India, nguendi: “Nja lemene mua kama vilongesa viaco. Va tu longesele mua ku niungilamo Ndzivo yetu ya Vuangana linga i tualeleho ku soloka vuino.” Muanetu Evans ua ku Kenya, nguendi: “Va tu longesele mua ku zokotueyela vimbongo, mu ku livangelela ku viukisa tuvitanga tua tundende, ntsimbu kanda tu hame.”

 Muaka ku muaka, ku pangesa na ku niunga Vindzivo via Vuangana ce ku tondeka vihita ni vene makulukazi a vidolare, a kuliya na cihela ci via kala, miaka i vili nayo, na numelu ya vikungulukilo vie ku vi pangesa. Kulihi kue ku tunda vimbongo viaco?

 Ku niunga Vindzivo via Vuangana ca hitukila ha milambu. Muanetu Alexander ua ku Cazaquistão, nguendi: “Vimo vimbongo vie kuya ku Internete, na viuma vikuavo ngeci mua mema na tuhia tua vunengu. Vikuavo vie kuya ku mapapelo a mu tundzivo tua ku likuasela, viluva, vinjapau, tinta na vikuavo.” Nkala vimbongo vie ku lisupaho, tue ku vi hana ku cipanga cetu mu mavu ose, linga vi ka kuase ku panga via kama via ku tungulula kuose-oko ku vi tondeka.

 Nga Ndzivo ya Vuangana i tondeka vimbongo via vingi mu ku i viukisa, ku pulakana luvali ni lutatu, vimbongo vie kuyaho mu ngonde, vakuluntu ve ku lekako mulongisi ue ku i niunga ua ku LDC. Kaha nga LDC i tava, Ndzivo yaco ve ku i viukisa na vimbongo vie ku tunda ku milambu ya mu mavu ose. Mu 2023 va viukisile Vindzivo via Vuangana via ku pua 8.793 kaha ha ile 76.6 milhões ya vidolare. Tu hilulenu mizimbu ivali.

 Mu Angola, imo Ndzivo ya Vuangana ya miaka 15 ya kele na vitanga via vingi. Vintsambo via tuhia tua vunengu via tondekele ku vi sintsisa, vivumbe via kele na miandzi, kaha vakua vindzivo via lihata nayo va kele na ku linienga nguavo mema a niondzi a ku tundako a kele na ku kovela mu vindzivo viavo. Ngeci vakua LDC via tavesele ku i viukisa. Ha ile 9.285 dolare kaha vantu va lihata nayo va santselele mua kama ku cifua ci viendelelemo vipanga viaco.

 Ku Polónia, imo Ndzivo ya Vuangana ya kele na ku nokoua, kaha tapete ya volele. Ngeci vakua LDC va tavesele ku viukisa ndzivo yaco mu ku hakaho shapa yeka na ku landa tapete yeka. Ha ile 9.757 dolare. Omo liaco, Ndzivo yaco ya Vuangana i simbula mua kama amba i ka tondeke naua ku i tungulula.

 Ku viukisa Vindizvo via Vuangana ka ce ku zokotueya lika vimbongo vunoni ce ku zumbangeya naua Yehova. Muanetu Shaun ua ku Tonga, nguendi: “Omo lia ku viukisa, tue ku hasa ku lemesela Yehova mu cihela ca ku lela, ca cili kaha ce ku lingisa vantu muimbo va sangale Yehova. Ngeci ka tue ku singanieka luvali ku tuala ha ku lania vantu ku viuano.”

 Tu vose tu hasa ku kuasa mu ku komba na ku niunga Ndzivo yetu ya Vuangana. Muanetu Marino ua pua Mulongisi ue ku niunga Vindzivo via Vuangana ku Australia, nguendi: “Tu vose tu hasa ku kuasa ku cipanga ca ku lifuila ca ku viukisa Vindzivo vietu via Vuangana. Mu tue ku lingamo, tue ku kuasa mua kama ku zokotueya milambu, linga va ka i pangese kuze mpundu ku i tondeka mua kama.”

 Muanetu Joel ua ku India, mueka ua lema ku viukisa Ndzivo yavo ya Vuangana. Vavenya nguendi: “Ku panga na vamuanetu ce ku nji kuasa ku mona vati u ka fua muono mu citungu.” Nicole u tu na tumbuile laza nguendi: “Tangua limo, nja kuasele ku hunda ha mavu, omo vamuanetu va kele na ku zika cimo cina ca kele na ku nokouesa mu kandzivo ka ku likuasela. Vutuhu kati yange nja viukisile mpundu citanga caco, vunoni nja tundisile ku senena cize ce ku kokele mponde.”

 Nga mu tonda ku lihana mu ku kuasa ku viukisa Ndzivo yenu ya Vuangana, handekenu na vakuluntu va mu cikungulukilo cenu. Cikuavo naua, nga mu hana milambu ka i ka kuasa lika ku Ndzivo yenu ya Vuangana, vunoni na ku vikuavo muaya mavu ose. Mu hasa ku hanena milambu yenu mu vikasa via milambu ku ndzivo yenu ya Vuangana ni ku hitila mu donate.pr418.com. Tue ku santsela mua kama ku vuhuanga vuenu.