Muaka ku muaka, ve ku lania vamuanetu va kala mu cipanga ca ntsimbu yose ca ku lifuila ku Sikola ya Mbimbiliya ya Ngileande ye ku hitila ku Cikota ca Kama ca Vilongesa, ku Patterson, Nova York. a Ku sikola yaco, vandongesi ve ku lilongesa vati va hasa ku puisamo vuino vipanga viavo mu lukungulukilo lua Yehova. Evi vilongesa vie ku va kuasa ku kolesa na ku kaniamesa vikungulukilo na viMbetele via mu mavu ose.

 Mua vusunga, sikola ya Ngileande ye ku kuasa mu mavu ose. Ca ku muenako, sikola ya vu147 ya hitile mu 2019, ya kele na vandongesi va ku pua 56 va tundile ku vifuti via ku pua 29. Ava vamuanetu va ile ku sikola ya Ngileande tele va kala laza mu cipanga ca ntsimbu yose ca ku lifuila. Vamo va kele na ku pangela ha Mbetele, vamo va puile tuniungi va ku zinguluka, vamissionaliu ni vapioneiro va ku lifuila.

 Linga viose vi puemo, ve ku livanga ku liviukisila mu ntsimbu ya kama. Ca ku muenako, Seketa ya Tala via Mangendzi ya ku Cikota ca Kama ye ku tondela vindeke vaze va va na lania ku sikola. Ku tuala hali vaze va kele mu sikola ya vu147, ndando ya ndeke ya nkala muntu ya kuya na ku hiluka ya hetele ku 643.683kz. Vamo vandongesi va tundile ku Ilhas Salomão, va londele vindeke viuana linga va ka hase ku heta ku Patterson, kaha mu ku hiluka va londele vindeke vitatu. Ku tanda tunda i vendele i heta 35.400 km! Kaha ndando i va fuetele muntu ku muntu ya puile 1.377.182kz. Linga va zokotueye vimbongo, Seketa ya Tala via Mangendzi ye ku pangesa imo programa ya mu komputador linga va uane vindando via vindende. Kaha cipue mu nima ya ku landa, programa yaco ye ku tualelelaho ku tondesesa mu nkala simano ni vene mu ngonde linga va mone nga vindando via kokoloka. Cikuavo naua, eyi seketa ye ku pangesa vimbongo na mangendzi a ve ku hana vamuanetu mu ku pua vuana, linga va lande mapapelo a ku londa nao mu vindeke.

 Cingi ca vandongesi va ve ku lania, ve ku tondeka vi visto linga va ka kovele mu Estados Unidos. Ngeci mukemuo, Seketa ya Tala via Masiko ya ku Cikota ca Kama ye ku kuasa ava vamuanetu. Vimbongo vi ve ku fueta linga nkala ndongesi a kale na visto vie ku heta ku 305.375kz muntu ku muntu.

 Vukuasi vuka tue ku uana ku vilongesa vi ve ku tambula ava vandongesi? Muanetu Hendra Gunawan ua pua mukuluntu mu cikungulukilo ku Sudeste Asiático, kaha va kala mu cikungulukilo cimo na vamo va yala na mpuevo va ile ku sikola ya Ngileande. Muanetu Hendra a handeka ngueni: “Laza, cikungulukilo cetu tele ka ca kele na vapioneiro va ntsimbu yose. Vunoni mu va hetele ava vamuanetu va ile ku sikola, ntuima yavo na cimbembesi cavo ca ku lihana ca sambukilile vakuavo, ngeci vamo va pua vapioneiro. Mu nima ya ntsimbu, umo ndumbuetu va mu laniene vene na ku Sikola ya Vakua ku Ambulula Vuangana!”

 Muanetu Sergio Panjaitan ua pangela ha Mbetele ya ku Sudeste Asiático hamo lika na vamo va ile ku sikola ya Ngileande, ngueni: “Vilongesa vi va ka tambuile ka via puile lika civezikiso kuli vakevo, vunoni civezikiso na kuli yetu. Va na ka lilongesa via vingi! Vunoni mu cihela ca ku lihalesa omo lia vilongesa viaco, ve ku lekako vakuavo vi va na ka lilongesa. Evi vie ku tu kaniamesa cikuma kaha netu ce ku tu lingisa tu kaniamese vakuetu naua.”

 Kulihi lukungulukilo lue ku uana vimbongo via ku fuetela eyi sikola? Ku milambu i ve ku hana vamuanetu mu ku kuasa cipanga mu mavu ose, kaha cingi cayo ve ku i lingila ku hitila mu donate.pr418.com. Tua mi santsela mu vose omo lia vuhuanga vuenu, mu ku kuasa eyi sikola ya vandongesi ve ku tunda mu mavu ose.