“Nja kele na ku vandamena litangua lia lelo mu miaka 19 yose!” Vika ua kele na ku vandamena ou muanetu? Mbimbiliya ya Tradução do Novo Mundo das Escrituras Gregas Cristãs mu lilimi lieni lia Bengali. Mukemuo mu ve ku livua vamuanetu vavengi mu ve ku tambula Mbimbiliya ya Tradução do Novo Mundo mu lilimi liavo. Vuno mua singaniekaho laza vipanga vie ku kalaho linga va tuhule evi viMbimbiliya?

 Ha katete, Ndzango ya Vakua ku Soneka ya ku Civunga ca Vantuamena ye ku kundika cipanga caco ku cimo civunga ca vakua ku langulula. Ntsimbu ingahi ve ku ambata linga va langulule Mbimbiliya? Muanetu Nicholas Ahladis ua panga ku Seteka ya Vakua ku Langulula ku Warwick, Nova York, ngueni: “Linga va puisemo cipanga caco, kua tondeka via vingi. Ca ku muenako, vakua ku langulula vangahi valiko, nga lilimi liaco lia kala na mezi a engi, nga vavene lilimi va tantekeya vati ua fuile muono ua vantu va va tumbula mu Mbimbiliya, kaha nga lilimi liaco ve ku lihandeka ku vihela ni vifuti via vingi. Mu ku puisamo viose evi, halumo vakua ku langulula va hasa ku langulula Visoneka via ciNgelengu mu muaka umo ku tuala itatu. Kaha Mbimbiliya ya mutuntu co i hasa kuambata miaka iuana ni ku tuvakana. Vunoni ku li vakua malimi a tuveveve ye kuambata ntsimbu ya kama.”

 Ku langulula Mbimbiliya ka ca puile lika cipanga ca vakua ku langulula houe. Ve ku hangula cimo civunga ca vamuanetu va ku vihela ni vene vifuti via ku liseza-seza, linga va hilule muzimbu u va na langulula. Ve ku linga cipanga caco vuana. Vinguli vi ve ku hilula ava vamuanetu, vie ku kuasa vakua ku langulula va langulule Mbimbiliya mu cindambo na ku sungama. Ku lingamo ca kala na seho ya kama. Umo muanetu ku África do Sul ua pua mulongisi ua vakua ku langulula Mbimbiliya ua handekele ngueni: “Vakua ku langulula, va va kundika cipanga ca kama kaha va tonda ku lihakela kapandi ka kuya Yehova ku mutima na vaze va ka tanda Lizi lieni.”

 Nga ku langulula cinahu, ve ku tuma viMbimbiliya viaco mu ku vi tuhula. Linga va hase ku tuhula Mbimbiliya kua tondeka viuma via ku pua likumi: mapapelo, tinda, adesivo, fita prateada, fita marca-páginas, cabeceado, reforço para a lombada, via tondeka ku kala ha lipapelo lia helu, mapapelo a ku pangesa lipapelo lia helu mu kati kalio, na viuma vikuavo vie ku kuatesa kumo mapapelo ose. Mu 2019 lika, vimbongo via kuasele ku tuhula viMbimbiliya via hetele ku 11 milhões ya kwanza. Kaha mu muaka uaco vene, vamuanetu va pangele vi ola 300.000 linga va tuhule, ku longekeya na ku tuma viMbimbiliya.

 Omo lia vika tue ku pangesa cikuma ntsimbu na vimbongo ku vipanga viaco? Muanetu Joel Blue ua pangela ku Seketa ya ku Tuhula Mikanda ngueni: “Mbimbiliya likelio livulu lia hiana seho ya kama li tue ku tuhula. Ngeci mukemuo, tua tonda cifua ci ye ku solokelamo ci zumbangeye Njambi u tue ku lemesa na muzimbu u tue ku ambulula.”

 Tue ku tuhula naua Mbimbiliya ya Tradução do Novo Mundo, mu cifua ce ku kuasa vaze va kala na vitanga via meso ni matuitui. Ca ku muenako, Mbimbiliya ya Tradução do Novo Mundo ya tupuputa ya kalako mu malimi likumi. Linga va hase ku tuhula Mbimbiliya imo lika ya tupuputa, ye ku ambata vi ola 8. Cikuavo naua, mu ku linga ya kala na mitamba ya yingi, vukama vuayo vu hasa ku heta ku 2.3 metros. Tue ku tuhula naua vimo viMbimbiliya via mapapelo lika vi ve ku tavesa ku pangesa mu tumenga.

 Mbimbiliya ya Tradução do Novo Mundo ye ku kuasa vantu vavengi. Ca ku muenako, aci talenu via solokele ku cimo cikungulukilo ca Kiluba ku Tombe, mu cifuti ca República Democrática do Congo. Mbonge ya Tombe ya kala 1.700 km ku tunda mu mbonge ya kama ya mu Congo. Vamuanetu va mu cikungulukilo caco, va kele lika na ku pangesa Mbimbiliya imo lika ya lilimi liavo kaha handekesi yaco ya puile ya laza cikuma. Va kele na ku linga i tunda mu livoko lia muanetu na ku ya naua mu livoko lia mukuavo, linga va hase ku liviukisila mitamba yavo. Vunoni ku tunda mu Agosto ya 2018 ha ya tuhukila Mbimbiliya ya Tradução do Novo Mundo mu kiluba, muntu ku muntu mu cikungulukilo ua kala honi na yeni kaha naua ya kala na handekesi ya yasi.

 Umo ndumbuetu ua ka alemão mua tambuile Mbimbiliya ya Tradução do Novo Mundo mu lilimi lieni, ua handekele ngueni: “Ka nje ku handeka naua nguange nja pande ku tanda Mbimibliya. Vunoni ntsimbu yose nje kuivua cizango ca ku tanda via vingi.” Umo yala mu kamenga ua sonekele ngueni: “Va nji hanene Mbimbiliya ya Tradução do Novo Mundo, kaha ili na ku nji alulula. Tunde ha nja putukila ku tanda ino Mbimbiliya, njili na kuivuisisa vuino Lizi lia Njambi ku hiana laza. Ngeci mukemuo, nji tonda ku tantekeya via vingi ku tuala ha Vakaleho va Yehova na vika nja pande ku linga, nji pue mukaleho.”

 Vose vakua ku tanda Mbimbiliya ya Tradução do Novo Mundo ve ku santsela cikuma ku milambu i ve ku hana vamuanetu mu ku kuasa cipanga mu mavu ose, ye ku kuasa ku tuhula eli livulu lia seho ya kama. Kaha cingi ca milambu yaco ve ku i lingila ku hitila mu donate.pr418.com. Tua santsela cikuma vamuanetu ku vuhuanga vuenu.