Yesu ua lekele vandongesi veni ngueni: “Mu ka pua Vakaleho vange . . . ku mutamba uze ha lenga mavu.” (Vilinga 1:8) Lelo lino, Vakaleho va Yehova vali na ku puisamo cipanga caco na ntuima. Vutuhu ngoco, kumo ku vihela hamo lika na vihela kua kala vantu va vengi, muzimbu ua cili kanda u heteko. Cikuavo naua, mu vifuti vimo mua kala Vakaleho va vandende. (Mateo 9:37, 38) Vika tuli na ku linga mangana tu ambuluile vantu vavengi?

 Mu ku tu kuasa ku ononoka ku lisiko lia Yesu, Ndzango ya Civunga ca Vantuamena ca Vakaleho va Yehova, ye ku tuma vamisionaliu ku vihela kuze ku tondeka vukuasi mu mavu ose. Mu ntsimbu ino, tuli na vamisionaliu va ku pua 3.090 mu mavu ose. a Kaha cingi cavo va ile ku sikola ya Vuangana, ngeci mua Sikola ya Vakua ku Ambulula Vuangana. Vamisionaliu ve ku seza membo avo na ku ka pangela ku vihela vieka. Mu ku linga vamisionaliu va pua va kuhia mu lutsilielo kaha va kala na vuhasi vua vuingi, ve ku kuasa ku sanduola muzimbu ua cili na ku hana lungano lua cili ku vakua ku ambulula va vaha.

 Ku nkala Mbetele, Seketa ya Tala via Vakua ku Ambulula va ku Seketa ya Tala via Vipanga, ye ku panga na Vakuluntu va Mbetele mu ku kuasa vamisionaliu mu viuma via tondeka ngeci mua, ndzivo, cihindu, na tu mbongo tua kuli kuasa natuo. Mu muaka ua uha ua 2020, lukungulukilo lu na pangesa vimbongo viheta 27 milhão ya dolar ($27 million) (U.S.) mu ku kuasa vamisionaliu. Tua santselako ku vukuasi, muze va misionaliu va na hasa ku tualeleho na ndzili ya ku longesa na ku kaniamesa vi kungulukilo.

 Vivezikiso vika vamisionaliu ve ku uanamo mu cipanga ca ku ambulula? Frank Madsen, ua pangela ku Mbetele ya ku Malawi ua handekele ngueni: “Omo lia lutsilielo lua va misionaliu kaha na ku lihana cavo, ce ku kuasa vikungulukilo ku lua na visoti via ku vihela viavo. Vimo viayo via pua ku ambuluila ku vihela via vikalu ni nguetu ku ambuluila ku vikondominio kaha na ku vihela ku ve ku handeke malimi eka. Cikuavo naua, ve ku hana lungano lua cili ku kapandi ka ve ku lihakela mu ku lilongesa lilimi na cisemua ku cihela ci va kala. Kaha eci ce ku lingisa vamuanetu vavengi va vakuendze ku kala na cizango ca ku kovela mu cipanga ca ntsimbu yose. Mua vusunga, tu santsela cikuma kuli Yehova ku cipanga ca va misionaliu.”

 Umo muanetu ua pua mukuluntu ua Mbetele ku cimo cifuti, ua handekele ngueni: “Vamisionaliu ve ku muesa ha toma ngecize vangamba va Yehova mu mavu ose va likata kumo. Ambe vene vaze ka vapuile Vakaleho va Yehova ve ku mona ngecize ka tua litepele omo lia visemua vietu. Vunoni Mbimbiliya ye ku tu longesa ku likuata kumo na vamuanetu mu mavu ose.”

 Vati cipanga ca vamisionaliu ce ku kuasa vakua ku ambulula? Muanetu Paulu ua ku Timor-Leste, ue ku santsela cikuma ku vamisionaliu va kala mu cikungulukilo ceni. Ivene ngueni: “Kuno ku cihela cetu kua ku yukuma cikuma. Vutuhu vamisionaliu va tunda ku vihela via ku tontola, vunoni evi ka vie ku imika cipanga cavo. Matangua ose ku cimene, ve ku likungulula ku ciuano ca ku tuhuka mu lihia. Ntsimbu yose nje ku va mona vaya mu mangendzi a ku hilukila ku vinguezi viose, ambe nga kuli mutania ua kama kaha na ku matsiki. Vamisionaliu ve ku kuasa cikuma vantu ku lilongesa vusunga, ngeci muange. Ve ku pangesa ntuima na ndzolela yavo yose mu cipanga ca Yehova kaha eci ce ku kaniamesa cikungulukilo cose ku lihakela kapandi ka ku pangela hamo.”

 Ndumbuetu Ketti, ua pua pioneiro ku Malawi, ua handekele mua vati vamisionaliu va kuasele vusoko vueni. Ivene ngueni: “Omo vamisionaliu vampuevo na yala vezile mu cikungulukilo cetu, yange lika nja puile Mukaleho ua Yehova mu vusoko vuange. Vunoni ava vampuevo na yala va nji kuasele mua kama ku likata kumo, hamo lika na vusoko vuange. Lungano luavo lua cili, lua kuasele vana vange ku mona ngecize ku pangela Yehova ce ku neha ndzolela ya kama mu muono. Nji santsela cikuma ku lungano lua cili lua vamisionaliu, muomu lua kuasa vana vange vatatu ku pua vapioneiro va ntsimbu yose kaha mukua ndzivo yange na putuka ku kunguluka.”

 Vuno vamisionaliu ve ku va fueta omo lia cipanga ci ve ku linga ni? Mu mavu ose vamuanetu ve ku linga milambu mu ku kuasa cipanga caco ku hitila mu donate.pr418.com. milambu yaco ye ku kuasa cikuma.