Miaso ya pua vuana vua cili vua tu hana Yehova. I hasa ku kuata ku visinganieka vietu, ku kuata ku cifua ci tue ku livuilamo na ku tu hana ndzili. Vikevio vie ku soloka mu tue ku halakana miaso yetu. Vunoni ku hiana evi, miaso yetu i hasa ku tu kuasa ku suena mu hiehi na Yehova.

 Tunde mu 2014, lukungulukilo lua tuhula miaso i tuvakana 70, kaha imo ha kati kayo va imba mu malimi a tuvakana 500! Halumo mu hasa ku lihula nguenu: ‘Veya ve ku imba kaha vati ve ku i tuhula?’

 Miaso ve ku i tuhula ku cimo civunga ca vamuanetu na vandumbuetu va ku Seketa ya Tala via ku Ngalavala, i ve ku tuamenena ku Ndzango ya Tala via ku Longesa ya ku Civunga ca Vantuamena. Mu civunga caco mua kala vamuanetu 13, ve ku soneka miaso, ku panga vikumo na ku ngalavala, ku panga programa, na vipanga vikuavo via tondeka. Cikuavo naua, Ndzango ya Tala via ku Longesa ya tava vamuanetu va mu mavu ose va kuase cipanga caco. Ca ku muenako, ngeci mua vamuanetu va tantekeya ku soneka miaso, va tantekeya ku sika vingoma na vikuata vikuavo via miaso, kaha na vamuanetu va tantekeya kuimba. Vamuaneutu vaco, ve ku pangesa vuana vuavo na ku likehesa cose ca ku hona ku tonda ku tsimanena cipanga caco.

 Vati honi ve ku tuhula miaso? Ha katete, Ndzango ya Tala via ku Longesa ye ku hangula mukanda ua mu Mbimbiliya ku va tundisa muaso kaha na vati va ka livua vantu mu va ka u halakana. Mu nima yaco, civunga ca tala via miaso ce ku putuka ku panga muaso na ku u soneka. Ku tunduho, va ngalava muaso ua cimueso na ku u tuma ku Ndzango ya Tala via ku Longesa linga va ka u hituluke na ku u sungamesa. Mu nima yaco, civunga ca tala via miaso ce ku sungamesa haze ha tondeka na ku ngalavala muaso u ka tuhuka. Miaso yaco ve ku i ngalavalela ku vihela via ku liseza-seza, ngeci mua vindzivo via kundama ku vimbetele na vindzivo via vamuanetu va kala na vihondo via ku ngalavalela.

 Linga va soneke na ku tuhula miaso yetu, vamuanetu ve ku pangesa viprograma via ku liseza-seza via mu komputador. Cipanga caco ce ku tondeka ku pangesa vikuata via miaso, makina a ku pandakanesa vikumo, vimicrofone kaha na vikuavo. Microfone imo lika ku hasa kuya 59.700kz ni ku tuvakana oho. Mu 2020, tua pangesele 69.252.000kz mu ku landa makina a ku ngalavalesa miaso na vikuata vikuavo via tondeka.

 Vika ve ku linga vamuanetu linga va zokotueye milambu? Mu cihela ca ku kala na civunga ca kama ca tala via miaso ku Mbetele, ve ku pangesa vamuanetu vavengi ve ku pangela ku vindzivo viavo. Cikuavo naua, mu cihela ca ku kungulula vamuanetu vavengi mu cihela cimo lika va ngalavale miaso, vamuanetu ve ku soneka na ku tuhula miaso ku vindzivo viavo.

 Vamuanetu va lema ku halakana miaso yetu. Ndumbuetu Tara ua ku Alemanha, ngueni: “Miaso yetu ye ku nji kuasa ku tula mutima nga nja sakalala. Kaha mu nje ku i halakana mu lilimi liange nje kuivua ngue Yehova na nji vumbatela.” Muanetu Dmitry ua ku Cazaquistão, ngueni: “Nja lema ku halakana miaso yetu muomu ka nje ku lisosomua nga vi vali na kuimba via litombola na vitume via mu Mbimbiliya. Vunoni eyi miaso ye ku nji kuasa ku kaniamesa vusamba vuange na Yehova.”

 Ndumbuetu Delia ua ku Africa do Sul a handeka vati ue ku livua mue ku halakana miaso yetu, ngueni: “Eyi miaso ye ku kaniamesa lutsilielo luange. Nga njili mu vusiua ni njili na ku hita mu cimo cisoti, kasi kua kala umo muaso ue ku litombola vuino na visoti viange. Vintsimbu via vingi, ku halakana lika ku vingoma via miaso ce ku alulula cifua ci nje ku livuilamo!”

 Cikuavo naua, kuli imo miaso i va lema cikuma vamuanetu. Ca ku muenako, ndumbuetu Lerato ua ku Africa do Sul a handeka ngueni: “Muaso ‘Vuovuno Vili Puisamo’ na ‘Mavu a Tua Lavelela’ ye ku nji singaniekesa ku lutue ha ntsimbu i nji ka sesa vanana. Ntsimbu yose mu nje ku halakana miaso yaco, nje ku livua ngue nji mona vanana vali na ku nji sesa linga va nji vumbatele.”

 Umo muaso ua kuasele cikuma umo ndumbuetu ua miaka 16 ua ku Sri Lanka. Ivene ngueni: “Omo lia ku pua Mukaleho ua Yehova, mulongisi uange ku sikola ua nji handekele mua ku vihia ha meso a vakuetu vandongesi. Nja vuile vuoma, kaha ka nja tantekeyele via ku handeka. Mu nja hilukile ku ndzivo, vanana va nji kaniamesele nji halakane muaso ‘O Estudo me Faz Bem.’ Muaso uaco ua nji kuasele ku mona seho ya kala ha ku tondesesa na ku livuikisila cikumbululo. Lia mukuavo, nja ka handekele na mulongisi uange. Ua nji halakanene kaha ngueni nevuisisa honi vi va tsiliela Vakaleho va Yehova. Nji santsela cikuma lukungulukilo lua Yehova mu ku tu hana eyi miaso ye ku kaniamesa cikuma.”

 Kulihi tue ku uana vimbongo linga tu tuhule eyi miaso? Vie ku tunda ku milambu ya vamuanetu mu ku kuasa vipanga vietu mu mavu ose. Ya ambatesela kumo na milambu i ve ku hana ku hitila mu vinjila vi va lombolola ha mutamba donate.pr418.com. Tua santselako cikuma ku milambu yenu.