Vakaleho va Yehova va haka seho ku vamuanaye va mu lutsilielo (1 Petulu 2:17) cingi cetu tue ku livua ngeci mua Tannis umo ndumbuetu ua ku Kenya, uze ua handekele ngueni: “Yange nja lema ku tantekeya vi vali na ku hita navio vamuanetu na va ndumbuetu mu mavu ose.” Vati va Tannis na makulukazi a Vakaleho vakuavo, ve ku hasa ku tantekeya mizimbu yaco? Tunde mu 2013, tueku hasa ku tantekeyamo ku hitila mu Mutamba ua Mizimbu mu saiti jw.org.

 Mu mutamba uaco tu uanamo mizimbu ya vusunga ya Vakaleho va Yehova, ku tuala ha ku tuhula vi Mbimbiliya, cipanga ca ku hana vukuasi vu tondeka ku vantu ve ku lihita mu viyovo, vipanga via ku tunga na ku tungulula na viuma vikuavo naua via seho. Kaha tue ku uanamo mizimbu ya vamuanetu na va ndumbuetu ve ku va haka mu tumenga omo lia lutsilielo luavo. Kaha mu Mutamba uaco naua, ua mizimbu tu hasa ku-uanamo vimueso via ku kaniamesa ku tuala ha cipanga cetu ca ku ambulula na mulalelo ua ku vuluka kutsa ca Yesu Kilistu. Iya ue ku tondesesa mizimbu yaco, kaha vati ve ku i tuhula?

 Kua kala imo Seketa ya Tala via Mizimbu ya Mbunga (OPI). Ye ku niunga, mutamba ua mizimbu mu saiti jw.org, seketa yaco ya kala ku cikota ca kama ya mavu ose, kaha Ndzango ya Vakua ku Kuatasanesa ikeyo ye ku tuamenena seketa yaco. Vamuanetu na va Ndumbuetu va tuvakana 100, va pangela ku seketa yaco ya OPI. Cingi cavo, vapua vakua ku lihana ve ku pangela ku laako–ngeci mua, va ka ku soneka, ku-tondesesa mizimbu, ku sonasona ni nguetu ku vuahesa vikupulo kaha na vakua ku langulula. Vamo vipanga viavo via pua ku handeka na vakua masiko, na valongisi ku masikola kaha na vakua mizimbu. Seketa yaco ye ku tambula naua vukuasi ku vakua Ndzango ya Tala via Mizimbu ya Mbunga (PID) ya kala ku viMbetele viose via mu mavu ose vi tuvakana 80.

 Linga tu hase ku tuhula umo muzimbu, Seketa ya Tala via Mizimbu ya Mbunga (OPI) ya mu mavu ose, ye ku pangela hamo na vi seketa via PIDs ya ku vi Mbetele vikuavo. Vamuanetu mu ve ku uana umo muzimbu ua seho, ve ku tondesesaho linga va uane mizimbu ya vusunga. Ngeci mua kuya na ku handeka na vakua ku tondesesa mizimbu. Kaha omo ve ku manusula ku tondesesa na ku kungulula, ve ku soneka mizimbu yaco na ku hituluka, ku hakamo vikupulo kaha mu nima yaco ve ku tuma muzimbu uaco ku vakua Ndzango ya ku Kuatasanesa linga va hitulukeho.

 Vika ve ku handeka vamuanetu ku tuala ha mutamba ua mizimbu mu saiti yetu? Ndumbuetu Chery ua ku Filipina ua handekele ngueni: “Nja lema ku putuka litangua liange mu ku tanda mizimbu ya mu lukungulukilo lua Yehova kaha na ya vamuanetu mu mavu ose.”

 Cingi ca vakua ku tanda, ve ku mona ku liseza ca mutamba ua kala mu saiti yetu jw.org, na mizimbu i ve ku tanda mu internete. Tatiana ua ku Cazaquistão, ua handekele ngueni: “Nje ku santsela na ku kulahela ku mizimbu ye ku tuhuka mu saiti. Muomu ya pua ya vusunga mpundu.” Ndumbuetu Alma ua ku Mexico, neni ua tava vusunga vuaco, ua handekele ngueni: “Cingi ca mizimbu i tue ku ivua na ku mona mu internete ka ya puile ya cili, vunoni mizimbu ye ku tuhuka mu saiti yetu ya pua ya vusunga kaha ye ku kaniamesa.’’

 Eyi mizimbu yaco kati lika ya vusunga, vunoni ye ku kaniamesa vene na lutsilielo luetu. Bernard ua ku Quênia ua handekele ngueni: “Mutamba ua mizimbu ya kala mu saiti yetu, ye ku nji kuasa ku tantekeya vamuanetu na va ndumbuetu mu mavu ose mu ku pua vusoko vuange, vutuhu va kala ku vihela vieka. Nji hasa ku va kundika mu vivundilo viange na ku va tumbula vene ha mazina kaha na visoti vi vali na ku pinda navio.” Ndumbuetu Bybron ua ku Quênia ua handekele ngueni: “Mu nje ku tanda mizimbu nga va na tuhula imo Mbimbiliya mu lilimi lieka, ce ku nji vuisa ndzolela ya kama! Eyi mizimbu yaco ye ku nji hana vusunga ngecize Yehova kati mu kua kahangu.’’

 Mizimbu ya vamuanetu va vali na ku luisa, i hasa ku tu kaniamesa mua kama. Jackline ua ku Quênia neni mukemuo mue ku livua, ngueni: “Ku singanieka ha ku kolesa ca vamuanetu ce ku kaniamesa lutsilielo luange. Kaha nje ku tuala mana ku viuma vie ku va kuasa ku tualelelaho ku kolesa. Cikuavo naua, nja muene ngecize ku vundila, ku tanda Mbimbiliya tangua na tangua, kuimba miaso ya Vuangana, vikevio via va kuasele ku kolesa mu visoti.”

 Beatriz umo ndumbuetu ua kala ku Costa Rica, ua lema ku tanda mizimbu ya handeka via viyovo via mavu ua handekele ngueni: “Ou mutamba ua Mizimbu ye ku nji kuasa ku mona mua vati lukungulukilo lua Yehova lue ku niunga vuino vamuanetu ve ku hita mu visoti mu ku va hana vukuasi vu tondeka mu vuasi-vuasi kaha mu cilemo. Kaha eci ce ku nji lingisa ku kala na vusunga ngecize, olu lua pua lukungulukilo lua Yehova mpundu.’’

 Ku vezika ca kama ku tambula mizimbu ya vusunga ku tuala ha vamuanetu na va ndumbuetu va mu mavu ose! Nga milambu yenu kuahi, nga ka tua hasele ku puisamo viose evi, cingi ca milambu yaco ve ku i lingila ku hitila mu saiti donate.pr418.com. Tua santsela ku vuhuanga vuenu.