Mu muaka uno, cuma ca kama ci va lavelele Vakaleho va Yehova mu mavu ose, ku tuhuka ca mutamba ua vivideo Muzimbu ua Cili ku Hitila Muli Yesu: Muzimbu 1. Makulukazi a vantu va u monaho laza. Unapu muzimbu ua ku livanga ua mitamba 18 i va ka tuhula ku lutue! Kapandi kaka vali na ku lihakela vamuanetu na vandumbuetu mu ku viukisa eyi mitamba ya vivideo, kaha vati nenu mua hasele ku kuasa?

 Ku Mbetele ya ku Australasia, kukekuo ku vali na ku ngalavalela cingi ca mitamba ya Muzimbu ua Cili, kaha kue ku soloka vantu 50 ku tuala 80 ha ntsimbu ya ku ngalavala. a Ve ku viukisa viakulia via vivunga viose litangua ku litangua. Kaha viakulia viaco ve ku vi vuahesa na ntsimbu. Ndumbuetu Ester ue ku pangela ku Seketa ya Tala via ku Landa, nguendi: “Tue ku landa viakulia via vingi ku vakua va ku landesa va ku liseza-seza, linga tu uane viakulia via cili kaha na ndando ya cili.” Kaha ua vuezeleko naua nguendi: “Tue ku alulula-alulula vi tue ku landa mangana kati tu teleke viakulia vimo lika ntsimbu yose.” Kaha nkala litangua tue ku landa viakulia vi heta ku 4 dólare mu nkala muntu.

 Vivunga vietu ka vie ku tondeka lika ku va hana viakulia vunoni na ku va niunga. Ku va niunga ku vika? Vutuhu ku Austrália kue kutua mutania ua cili, vunoni vintsimbu vimo kue kuenia cikuma kaha ci hasa ku pua vusonde ku cihindu. Ngeci mukemuo, linga tu liniunge ku vusonde vuaco, civunga ca vakua ku ngalavala ve ku fuitangana mua kama mu tunga vitenda, ku viukisa vihela via ku tontola, vipisola kaha na mema a cili. Kevin, ua pangela ku Vipanga via Audio/Video, ua lomboluele nguendi: “Cingi ca vakua ku ngalavala vapua vakua Mbetele kaha ve ku zinguluka vihela. Vunoni na ku likehesa cose ve ku panga via vingi na ndzolela.”

 Imo mitamba ya vivideo ka citava ku i ngalavalela ha mbetele, mu seketa ni cipue mu estúdio, muomu ka i tuhuka mu cindambo. Ngeci kue ku tondeka kualulula cihela ca ku ngalavalela. Linga va hase ku ngalavala vuino mizimbu ya mu Mbimbiliya, kue ku tondeka kuya ku vihela via ku laako, kuze ka kua kele tuhia tua vunengu, vitapalo via ku vumba na mavue, ngeci mua vindzivo via ku matangua ano. Vuzalo na vikuata viose ve ku vi longekeya vuino na ku vi tutila ku cihela ca ku ngalavalela. Ntsimbu kanda va putuke ku panga, va ntuamena ve ku kala na vusunga ngecize mutoli, mema a kunua kaha na vihondo via ku tanena va na vi viukisa laza. Kaha Vakaleho va Yehova va kala mu hiehi na cihela ca ku ngalavalela, vakevo ve ku tambula evi vivunga na ku va tuala ku hotele, vipundo na ku vindzivo vikuavo va kaleko.

 Ku ngalavalela ku cihela ca ngoco ce ku pua ca cikalu ku vose ve ku pangelako. Ngeci mukemuo mu 2023, Civunga ca Vantuamena ca tavesele ku landa cimo cikuata ci ve ku sana nguavo civumbe ca vivideo, mu ndando ya ku pua 2,5 milhões de dólares (EUA). Eci cikuata caco ce ku kuasa ku pangesa vitela via cili, linga va pange vivideo ku hitila mu tecnologia. Ku lingamo ce ku kuasa ku zokotueya zimbongo. Darren, Mukua Civunga ca Vakuluntu va Mbetele ya ku Australásia, ua lomboluele nguendi: “Ku ngalavala ku hitila mu civumbe ca vivideo ce ku lingisa vamuanetu linga kati va hone cikuma omo va hilukila hilukila mizimbu. Ca ku muenako, vamuanetu ve ku kala na viminutu via vindende nga va tonda ku kupula litangua ntsimbu kanda likovele. Vunoni ku pangesa eci cikuata ce ku kuasa ku hilukila na hilukila vikupulo, na ku uana cikupulo ca cili.”

 Nkala mutamba ua video Muzimbu ua Cili ue ku tondeka vamuanetu va tuvakana 100 mu ku ngalavala vivideo viaco. Vika ve ku handeka ava vamuanetu ku tuala ha kapandi ka ve ku lihakela?

 Ndumbuetu Amber ua kala ku Melbourne, ua lingile vungendzi vua 700 kilometrus linga a ka kuase mu ku ngalavala, ua sonekele nguendi: “Vusoko vua mbetele vua nji tambuile na ndzolela ku vututikilo vua vindeke, na ku nji niunga vuino. Vamuanetu vavengi mu vusoko vua mbetele va nji laniene mu kulia na kunua tumo tuchá. Vose va nji muesele cilemo ca vusunga kaha nja livuile ku zituka. Nja tambuile vivezikiso via vingi mu vuze vungendzi. Ku nja ci Muene Kupua Cipanga ca Kulema!”

 Muanetu Derek, ua panga na civunga ca vakua ku tuhula vivideo, ngueni: “Tunde ku vuputukilo, viseketa via vingi va lihanene mu ku tu kuasa. Nje ku santsela cikuma ku kapandi ka vali na ku lihakela vamuanetu na vandumbuetu mu ku pangesa ntsimbu, vikuata na ndzili yavo mu cipanga eci. Vakevo va kala na ndzolela, vukatuisi kaha na ngozi. Kaha Yehova ua va vezikisile mu ku kuasa ku vipanga evi. Mua vusunga, evi vie ku nji hana vusunga ngecize vakevo ka ve ku lisosomua lika na vipanga vietu, vunoni na mu cifua ci tue ku lingilamo evi vipanga.”

 Tua santsela cikuma ku milambu yenu mu ku kuasa ku tuhula eyi mitamba ya vivideo, hamo lika na milambu i mue ku hana ku hitila mu donate.pr418.com.