Yehova Njambi a tonda vantu vose va mu tantekeye na ku tantekeya Vuangana vueni vua muilu. (1 Timoteo 2:3, 4) Ngeci mukemuo, Vakaleho va Yehova va tuhula viMbimbiliya kaha na ku longesa na vantu vavengi, hamo lika na tuveveve. Cikuavo naua, lukungulukilo luetu lue ku tuhula makulukazi na makulukazi a mikanda mu cifua ca vivideo mu lilimi lia tuveveve, a kaha kua kala malimi a heta kampe 100 a tuveveve! Vati honi ve ku tuhula mikanda yaco na ku i tepela ku vantu? Kaha viuma vika tua puisamo mu ku hita ca ntsimbu?

 Vakua ku langulula mu mavu ose, vakevo ve ku langulula vivideo viaco. Nkala civunga ca vakua ku langulula, ve ku tala mikanda ika va tondeka ku langulula. Mu nima yaco, va hangula vati va hasa ku languluilamo muzimbu uaco mu lilimi lia tuveveve. Kaha amba cose va ngalavale mu cifua ca vivideo. Lelo lino kua kala vivunga via vakua ku langulula malimi a tuveveve a ku pua 60 kaha vivunga via ku pua 40 vapua vakua ku kuasa lika noho-noho.

 Ku miaka ya ku nima, ca puile ca cikalu ku langulula vivideo via tuveveve. Vikuata viaco ngeci mua kamera na vikuata vikuavo via ku ngalavala navio via puile via ndando ya kama. Cikuavo naua, etu vavenia tua kele na ku litondela vihela vi tu ka ngalavelela vivideo kaha vintsimbu vimo vene, ca tondekele ku panga kamo kahondo. Kaha va tondekele vimbongo via ku pua $30,000 b linga va hase ku landa vikuata viose vitondeka ku civunga ca vakua ku langulula.

 Linga tu hase ku pangesa mua cili milambu ya vamuanetu, lukungulukilo luetu lue ku linga cose mu ku pangesa vimbongo viaco mu njila ya cili kaha na ku asiuisa vipanga via ku langulula. Hano honi tua kala na vikuata via cili vie ku tu asiuisa ku langulula vuino kaha via ndando ya cili. Mu cihela ca ku pangesa kandzivo ka ku ngalavalelamo, vivunga via vakua ku langulula ve ku panga civumbe ca vuntsompo mu viseketa viavo na ku ngalavala vivideo. Vunoni nga ku tondeka ku ngalavala vamuanetu vavengi, vamuanetu na vandumbuetu ve ku ngalavala tumitamba tuavo mu viseketa ni ku vindzivo viavo. Kaha ku lingamo ka ce ku tondeka studio ni nguetu kandzivo ka ku ngalavalelamo.

 Cikuavo naua, tua panga software yetu linga i tu kuase ku puisamo vipanga vietu. Cikuata caco, ce ku kuasa vakua ku langulula ku tepulula ku ntsimbu ya ku langulula mikanda mu lilimi lia tuveveve. Vamuanetu ve ku santsela mua kama ku vukuasi vuaco. Umo muanetu ua lizina Alexander ua handekele ngueni: “Lelo lino ve ku tuhula vivideo via vingi ku tuvakana na mua laza. Evi vie ku nji vuisa ndzolela ya kama. Kaha nje ku tala vivideo matangua ose.”

 Lelo lino honi, ndando ya vikuata ya vakua ku langulula ya pua $5,000. Kaha evi vie ku kuasa ku langulula vivideo via tuveveve mu malimi a engi.

 Ca ku muenako, nga cimo civunga ca mane ku langulula umo mukanda, kue ku tondeka ku ngalavala naua na vivideo linga vi ka hete kuli vaze va i tonda. Ku laza, tua kele na ku tuhula videocassete na vi DVD, vunoni tua kele na ku pangesa vimbongo via vingi, ya kele na ku ambata ntsimbu, kaha ca tondekele ku lihondolola mua kama. Kaha mezi a tua kele na ku ngalavala, tua kele na ku a tuma ku mbandza ku imo impreza linga va ka tuhule vivideo via vingi. Mu nima yaco, amba cose honi DVD vi hete mu vikungulukilo. Mu 2013 lika tua pangesele vimbongo vi tuvakana ku $2,000,000 mu ku tu hula viDVD mu lilimi lia tuveveve.

 Mua vusunga, tuveveve ve ku santsela mua kama ku vukuasi vuose. Vunoni laza ku ca ku puile ca casi ku pangesa vivideo cikuma-kuma omo videocassete ni vi DVD via kele na ku livuezelela. Ambe vene nga kua tondekele ku ngalavala limo livulu lia mu Mbimbiliya, via kele na ku livuezelela. Umo muanetu ua ku Brazil ua lizina Gilnei ua handekele ngueni: “Ambe mu tua tondele ku tanda cimo cinimbu ca mu Mbimbiliya, tua pandele ku tonda videocassete yaco mpundu, amba cose honi tu tande cinimbu caco. Ca puile ca cikalu havueni. Umo ndumnbuetu ua lizina Rafayane, ua kele na ku pangesa vi DVD via lilimi lia tuveveve ua handekele ngueni: “Cilongesa cange ca mu vulika, ca kele na ku nji honouesa mua kama. Ca tondekele ku pangesa ntsimbu ya kama linga nji hase ku tondesesa mikanda ya mu Mbimbiliya ni mikanda ikuavo.” Kaha vamuanetu na vandumbuetu mu va kele na ku tuhuka mu lihia, va kele na ku ambata vi DVD na videocassete linga va ka hase ku lekesa ku muntu uose ouo a muesa cizango. Vamo vamuanetu va kele na ku ambata vikuata viavo via ku muesa DVD. Kaha mu nima ya ntsimbu, cingi ca vamuanetu navo va hasele ku kala na vikuata viaco. Bobby ua ku Estado Unidos, ua handekele ngueni: “Mu nima ya ku tandela muntu cimo cinimbu ca mu Mbimbiliya kaha u tonda ku mu lekesa cimo cinimbu cikuavo, ca tondekele ku pangesa DVD ikuavo. Eci cifua ca ku simutuila, ca kele na ku tu honouesa kaha na ku tanganesa vutongue vuetu vua ku pangesa vuino Mbimbiliya mu ku ambulula.”

 Mu 2013, lukungulukilo lua Yehova lua tuhuile aplicativo JW Library Sign Language, linga i kuase vamuanetu na vandumbuetu ku tupulula vivideo na ku vi tala mu lilimi lia tuveveve mu vi telefone viavo ni vitablet. Vunoni ha katete, aplicativo yaco va i tuhuile lika mu lilimi lia tuveveve mu Ingles ya ku America. Kaha mu 2017, aplicativo va hasele ku hakamo malimi ose a tuveveve. Mua vusunga evi via vuisile ndzolela ya kama ku vamuanetu na vandumbuetu mu mavu ose. Umo muanetu ua lizina Juscelino ua ku Brazil, ua handekele ngueni: “Nja komokele mua kama! Kaha nja singaniekele mua vati vakua Civunga ca Vantuamena ve ku muesa cilemo ku tuveveve kaha na vati ve ku tonda tu kole mu lutsilielo ngeci mua vantu vose ovo ve ku handeka. Nja viukilila mua kama havueni, kaha aplicativo ya nji kuasa ku vueza ku cizango cange ca ku lilongesa Mbimbiliya ambe mu ka ntsimbu lika.”

 Lelo lino honi, tue ku langulula vivideo mu lilimi lia tuveveve na ku vihaka mu saiti yetu kaha na mu aplicativo JW Library Sign Language. Ngeci mukemuo, mikanda e tue ku langulula, ku ngalavala na ku vi havazela mu matangua lika, ku tuvakana vi ambate vingonde ni miaka. Kaha cingi ca mikanda ya tuveveve ye ku tuhuka ha ntsimbu imo lika na mikanda a malimi a ku handeka mpundu.

 Tu halakaneneu vi va handekele vamo vamuantu na vandumbuetu va tuveveve. Umo ndumbuetu ua lizina Klízia, ua handekele ngueni: “Mua vusunga, lukungukilo lua Yehova lua haka seho ya kama ku tuveveve mu ku va hana via kulia via mu lutsilielo mu njila ize ya yasi. Mu mavu ano, na lumo lukungulukilo luahi lua kalako lu tu hasa ku lusetekesa na lukungulukilo lua Yehova lue ku tu hana viose vi tu tondeka.” Vladimir ua handekele ngueni: “Vivideo via nji muesa ha toma ngecize Yehova ua haka seho ya kama ku tuveveve ngue mu ku linga na vantu ve ku handeka mpundu.”

 Vivideo vietu mu lilimi lia tuveveve, vintsimbu via vingi vie ku handeka nguayo: Uno mukanda, va u sonekela ku longesa vantu Mbimbiliya mu mavu ose. Evi vipanga ve ku vi linga ku hitila mu milambu ya vuana. Tue ku santsela mua kama ku milambu yenu kaha cingi cavio mue ku vi lingila ku hitila mu donate.pr418.com. Mua vusunga, milambu yaco ye ku tu kuasa ku langulula viMbimbiliya na ku longesa Mbimbiliya ku vantu vose, hamo lika na tuveveve.