Ku ciuano ca muaka ca Janeiro ya 2021, Vakua Civunga ca Vantuamena va hanene mutambi ku tuala ha njila ya iha ya ku lilongeselamo Mbimbiliya mu livulu Yoyenu mu Ndzolela ku Miaka Yose! a Vati mua livuile omo va lingile mutambi uaco? Matthew ua ku Canadá, ua handekele ngueni: Nja vuile ndzolela ya kama havueni muane! Kaha ndzolela yaco ya livuezelele omo nja kele na ku halakana ku vimpande kaha na vi video via lombonuene vati va lingile livulu liaco na ku i setekesa mu lihia. Nja lavelela na ndzolela ya kama vati tu ka pangesa livulu liaco.”

 Njila ya iha ya ku endeselamo cilongesa ca Mbimbiliya mu livulu Yoyenu mu Ndzolela ku Miaka Yose! Vunoni eci kati cikeco lika ku liseza ca ciha ca livulu liaco na njila ya iha ya ku endeselamo cilongesa ca Mbimbiliya. Nga mu li na ku pangesa livulu Yoyenu mu Ndzolela ku Miaka Yose! ya ha mapapelo, mu hasa ku mona ngecize hali ku liseza ca kama. Linga tu mone omo lia vika ku liseza caco, tantekeyenu ku liseza ca kala ha limo livulu likuavo.

 Cifua ca lipapelo. Omo lia vika ca tondekele? Livulu Yoyenu mu Ndzolela ku Miaka Yose! lia kala na vikupulo via ku pua 600, ku tuvakana livulu Vika i Ha ku tu Longesa Mbimbiliya! Ha mefo a mu livulu liaco hali vihela via ku toka—ka hesi vikupulo —ni ha mu hasa ku sonekeho vi mu na zange. Evi viuma vivali via ku liseza via kokele vimo vitanga: lipepa nga ya llia liehu, li hasa ku lingisa cikupulo cili ha lifo lia ku nima, ku soloka helu lia lifo likuavo. Omo lia vitanga viaco, vamuanetu va ku Seketa ya Tala via ku Tuhula Mikanda mu Mavu Ose ku Wallkill, New York, va hanguile mapepa auana a ku liseza-seza a ve ku pangesa ku grafika na ku tuhula na masona. Kaha Ndzango ya Vakua ku Soneka, ya hiluile ha mapepa aco na ku hangulaho lipepa lia ku hona ku halala. Mua vusunga, ndando ya cifua ca lipepa liaco ya kama cikuma ku tuvakana mapepa a mu mikanda yetu ikuavo. Kaha eci ce ku kuasa vandongesi va Mbimbiliya ku tanda mefo a livulu liaco ca ku hona ku mona vikupulo vili ha lifo lia ku nima.

 Ku liseza ca cifuiko ca livulu. Cifuiko ca livulu lia liha, ca liseza na mavulu akuavo, muomu vifuiko viaco kati via kola. Vutuhu cifuiko ca livulu liaco ka ce ku via kula ngue vifuiko via mavulu a tua tuhulaho laza, vunoni ku tsitsivala cayo ce ku lingisa cikupulo cili helu cisoloke vuino. Kaha omo lia ku kola ca cifuiko, ce ku kuasa livulu kati litavuke. Cikuavo naua, ndando ya lipepa liaco ya kama omo lia ku tsitsivala cayo. Omo liaco, vimbetele via vingi via pangelele hamo linga va mone cifua ca cifuiko cika va na pande ku pangesa.

 Omo lia vika tua hanguile ku pangesa lipepa lia ndando ya kama? Umo muanetu ue ku pangela ku Seketa ya Tala via ku Tuhula Mikanda mu Mavu Ose, ua handekele ngueni: “Mu ku linga livulu liaco va ka lipangesa mua kama, tu tonda litualeleleho ku soloka vuino. Muanetu Eduardo neni ue ku pangela ku Seketa ya Tala via ku Tuhula Mikanda, ua handekele ngueni: “Eli livulu lia ku vuaha cikuma, lia kola kaha lia liasi ku lipangesa. Nji na viukilila mua kama mu ku mona ngecize lukungulukilo lua Yehova lua pangesa cimo cikuata ca seho, ca ku hona ku sanduola milambu ya vamuanetu.”

 Mu Março ya 2021, tua putukile ku tuhula livulu Yoyenu mu Ndzolela ku Miaka Yose! mu ku hita ca musongo ua COVID-19. Omo liaco, tua liuanene na vimo vitanga. Omo lia ku hona ku kovela na ku tuhuka ca vamuanetu va ha mbandza ku Mbetele, va kele na ku pangela ku Seketa ya Tala via ku Tuhula Mikanda, ambe vene ku tavesa vamuanetu va ku pangele ku Mbetele, ca tu kaluuilile cikuma. Kaha omo lia masiko a tumbikele nguvulu, ka tua kele na vamuanetu va ku puamo mu ku tualelelaho ku pangela ku seketa yaco. Ngeci vimo viseketa via sokele.

 Vati honi tua hasele ku vula visoti viaco? Tua kele na ku lania vamuanetu na vandumbuetu va ku viseketa vikuavo via hano ha mbetele linga va ku kuase ku cipanga caco mu ka ntsimbu kakandende. Muanetu Joel, ue ku pangela ku Seketa ya Tala via ku Tuhula Mikanda, ua handekele ngueni: “Ku lihana ca vamuanetu na ku lilongesa ku linga cipanga ca ciha, mua vusunga ca puile ca seho ya kama linga tu hase ku puisamo cipanga caco.”

 Vutuhu tua hitile mu visoti evi, vunoni tua hasele ku tuhula makulukazi na makulukazi a livulu Yoyenu mu Ndzolela ku Miaka Yose! Kaha linga tu hase ku a tuhula, tua tondekele vikuata via vingi ngeci mua, chapas de impressão, película de proteção, papel, tinta e cola. Mu vingonde vitanu via ku livanga lika, tua pangesele vimbongo vi tuvakana 2,3 milhões ya vi dólare ku vikuata via tondekele linga tu hase ku tuhula livulu liaco. Vunoni linga tu hase ku zokotueya vimbongo, tue ku tuhula lika mavulu a va tondeka mpundu vikungulukilo.

 Vati valongisi na vandongesi ve ku livua ku tuala ha livulu lia liha? Umo muanetu Paulu ua ku Canadá, ua handekele ngueni: “Ku endesa cilongesa ca Mbimbiliya mu livulu Yoyenu mu Ndzolela ku Miaka Yose! ce ku nji vuisa ndzolela ya kama. Muomu mizimbu i limo ya yasi ku ivuisisa kaha ce ku kuasa ku ku simutuila. Mizimbu yaco, ye ku litombola vuino-vuino na vihula vie ku kuata mpundu ku mutima, vivideo, vikupulo, vikasa kaha na vizango via na pande ku puisamo ndongesi. Mua vusunga, eci cipanga ci nji lingisa ku pua mulongisi ua cili.”

 Umo ndongesi ua Mbimbiliya ku Estados Unidos ngueni: “Nji na leme cikuma eli livulu lia liha. Vikupulo vie ku nji kuasa ku ivuisisa vinanga via vingi. Vi video vie ku nji kuata cikuma ku mutima kaha na ku lingako mumo.” Ndongesi uaco, ue ku lilongesa Mbimbiliya luvali mu simano kaha ue ku kunguluka ntsimbu yose.

 Makulukazi na makulukazi a mavulu Yoyenu mu Ndzolela ku Miaka Yose! va tualelelaho ku a tuhula mu malimi a engi. Vakua Civunga ca Vantuamena, va na tavesa ku langulula eli livulu mu malimi a ku pua 710 ku tuvakana livulu Vika i Hasa ku tu Longesa Mbimbiliya? li va langulula mu malimi a ku pua 340 lika.

 Kulihi honi tue ku hasa ku uana vimbongo tu hase ku tuhula mavulu aco? Ya pua milambu i ve ku linga vamuanetu mu mavu ose. Kaha cingi ca vimbongo viaco ve ku vi lingila ku hitila mu donate.pr418.com. Vamuanetu, tua mi sangala mua kama ku vuhuanga vuenu, muomu vie ku kuasa ku tuhula mikanda ize i hasa ku kuasa vantu va tonda ku tantekeya Yehova kaha na ku yoya “miaka ya ya-ye.”—Visamo 22:26.