Mu miaka ya ku tuvakana 130, Vakaleho va Yehova va likungulula ku viuano via muhato. Ntsimbu ino ku viuano viaco kue ku kala vimpande via ku pua 40, hamo lika na miaso, vimona, vimueso na vivideo. Linga viuano viaco vi kuase na ku kaniamesa vaze ve kuyako, va na pande ku ‘vi tala na ku vi halakana vuino.’ (Luka 2:20) Vati vali na ku pangesa milambu yenu linga vose ve kuya ku viuano viaco va uaneho vukuasi, kuose-oko ku va kala?

 Cingi ca vifuti via kala ku vucelo, via kala laza na vikuata via vintsambo via audio video. Vunoni omo lia vika tue ku pangesa vikuata via vintsambo vietu? David ue ku pangela ku Seketa ya Tala via Vintsambo ya ku Cikota ca Kama ngueni: “Cingi ca vihela vi tue ku kumuna, vintsambo via kalako ka va vi pangelele ku panga viola via ku tuvakana 6. Kaha va vi pangela lika mu ku halakana mitambi ya indende na ku sikisa imo miaso. Cikuavo naua, vie ku muesa vivideo via kuasa mbola.

 Nkala cihela kue ku hitila ciuano ca muhato ca lifuila, ngeci vikuata via Audio/video via pande ku litombola na cihela caco. Ngeci mu nima ya ku hangula vihela ku ka hitila ciuano ca muhato, Seketa ya Tala via Vintsambo ya nkala cifuti, ye ku hangula kulihi mbunga i ka tumama, vantu vangahi va kakalako na vikuata vingahi vi ka tondeka. Kaha vamuanetu ve ku hangula vialtifalante na vitela vingahi vi tondeka, kaha na kulihi va ka vi tumbikila. Cikuavo naua, ve ku noneka vuino vintsambo linga vose mu mbunga va ka hase kuivua na ku mona ciuano.

 Seketa ya tala via Audio/video ve ku tondeka ku lihakela kapandi ka kama, ku vihela kue ku hitila viuano via muhato mu malimi a ku liseza-seza. Nga kuli lilimi likuavo, vakua vintsambo ve ku tumbika vintsambo mu cifua ca ku linga, vi hasa ku kuasa ku langulula programa mu lilimi liaco. Kaha lelo lino, midia ye ku asiuisa ku tala na kuivua vivideo mu malimi heta 8 ha ntsimbu imo. Kaha muanetu David ngueni “Kati ca casi ku panga na vintsambo viaco,” ngeci ca tondeka ku longesa mua kama vaze ve ku pangelako.”

 Ha cingi ca vimbetele ha kala seketa ya tala via viaudio/video vikevio vi ve ku pangesa miaka ku miaka. Omo liaco, vamuanetu vakua ku tala via zintsambo ve ku nunguluka-nunguluka mangana va tuale zintsambo ku vihela vikuavo ku ka hitila viuano via muhato. Ku mbetele ya ku Estados Unidos ve ku pangesa vimbongo vi tuvakana ku US$ 200.000 a mu muaka linga va tume vikuata via zintsambo ku viuano via muhato. Ku lingamo, ce ku tepulula ku vize vi tu tonda ku landa na ku viniunga vuino vize vi tuli navio. Steven, ua puile ntuamena ya vikuata via audio/video ku cimo ciuano ca muhato ca ku canadá, nguendi: “Civunga cetu ca tala via zintsambo ca niungile nkala cikuata cose-oco, ku vi tanda na ku vi tulika vuino-vuino viose, mangana va ka vi pangese ku ciuano ca muhato cikuavo ci na hatako.”

 Ku kumuna vikuata via audio/video ca kala na ndando ya kama, kaha vikuata viaco ka vie ku lekesa vuino vivideo. Cikuavo naua, ka ve ku vi niunga vuino. Lelo lino, vikuata via LED ya vivideo ya kala na vimetru 5/3, ndando yayo $24,000. Kaha mukole ua ku microfone ua 15 metro ndando yauo $20. Ngeci Seketa ya Broadcasting ye ku panga na Seketa ya Tala via ku Landa, linga va mone “vimbongo vingahi via tondeka” va ka lande vikuata viaco. (Luka 14:28) Ca ku muenako, vantu vangahi va ka uana vukuasi ku vitenga viaco? Vuno ku landa vitenga via viha vikevio via tondeka mu ku manusula visoti viaco ni? Kaha tuli na cihela ca cili ca ku vi tulikila, vikuata via ku likuasa navio, na vantu vakua ku lihana va va longesa mua cili ni?

 Vikuata viaco via tondeka ku vi niunga vuino vi simbule, linga vi tepulule ku ndando ya ku vi vuahesa. Kaha vintsimbu vimo vikuata viaco, vie ku tondeka ku viambatela mu mbapolo ni vuato linga vi ka hete vuino.

 Vantu ka va puile Vakaleho va Yehova ka ve ku komoka lika vilongesa vietu, vunoni ve ku kumoka naua vivideo vi ve ku mona vuino-vuino ca ku hona ku tsitsivala. Ca ku muenako, ku cimo ciuano ca muhato umo mukua ku pangela ku visandzi via mu mavu ose, ua handekele ku tuala ha vivideo na vintsambo via cili vi tue ku pangesa. Jonathan ua pangela ku seketa ya tala via vintsambo ku viuano via muhato, ngueni: “Uze yala ua komokele mua tantekeyele ngecize, vose va kele mu civunga cetu va puile vakua ku lihana kaha ka va lilongesele ku visikola via kama.” Kaha “yala uaco naua ngueni, nga impreza yendi ye ku lingile vipanga viaco, nga yambatele matangua 5 mu ku vi viukisa.” Kaha ku ciuano cikuavo, ntuamena ya cimo cihela ngueni: “Ku cihela cino nja monaho vakua vutongue vavengi va ka miaso na vivideo, vunoni kanda nji ci moneho vakua vutongue ngeci mueni!”

 Vukuasi vuka mua uana mu ku tala ciuano ca muhato omo lia ku viukisa vuino viaudio na vivideo? Halumo mue ku livua ngue muanetu David, ua yoyela ku Inglaterra. Ua handekele ngueni: “Njili na miaka 88, kaha nja kunguluka ku viuano viose via muhato. Mu miaka ino honi ce ku nji puila ca casi ku halakana vuino na ku tuala mana ku ciuano cose. Nje ku santsela cikuma ku vivideo via cili, programa ye ku hita vuasi-vuasi kaha muzimbu ue ku nji tovala.” Michael ua kala mu Nigeria, ngueni: “Lelo lino vamuanetu ka ve tatuoka naua kulihi va tumama, muomu ha cihela cose-oco va hasa ku tala na ku halakana vuino vivideo ni mukua cimpande. Kaha ce ku va kuasa naua ku tuala mana ku ciuano cose.”

 Omo mu ka kala ku Ciuano ca Muhato ca ku Lifuila ca uno muaka, ‘Ambululenu Muzimbu ua Cili!’ ka uanenu ntsimbu ya ku singanieka ha viuma viose vina tondekele, linga mu mone na ku halakana vuino programa. Tua santselako cikuma ku milambu yenu yose hamo lika na ize i ve ku lingila mu donate.pr418.com, muomu i na kuasa linga ciuano caco ci lipuisemo. Tua santselako.