Vutala vua 1 Junho ya 1912 vua handekele nguavo: “Cingi ca vantu ve ku tanda mikanda yetu.” Va tantekeya vantu va vengi va pua tupuputa, . . . “Va kevo vakele na ku tambula mikanda ya vuana mikanda yaco ye ku asuisa tupuputa ku i tanda.” Kaha Vutala vua co vua handekele naua nguavo: “Cingi ca tupuputa ve ku vuahelela na mizimbu ya vivezikiso vi va ka tambula ha mavu.”

 Aa mezi mu va a sonekele, tele ku kua kele imo sonekesi ya cili ya braile mu Ingles. Vunoni Vakaleho va Yehova va putukile laza ku longesa vusunga mu “ku pangesa visoneka” mu braile. Kaha na lelo lino tue ku tualelelaho ku lingamo! Lelo lino tuli na mikanda ya ku soneka mu braile ya ku tuvakana 50. Vunoni vati ve ku tuhula mikanda yaco?

 Cinanga ca katete ku soneka vinanga mu braile. Michael Millen ue ku pangela ku Seketa ya ku tuhula Mikanda ku Patterson, Nova Iorque, ua lomboluele ngueni: “Ku laza tua kele na ku pangesa software ya ku landa linga tu soneke mu braile,” vunoni kayakele na ku soneka malimi ose a tua tondele, “lelo lino tue ku pangesa Sistema de Tradução de Torre de Vigia, eyi sistema ye ku tu kuasa ku soneka honi mu malimi akuavo. Mua vusunga na imo programa ya kalako ya ku li setekesa neyi.”

 Mu mikanda ya vi braile ka mua kele lika visoneka, vunoni ye ku lombolola naua vikupulo. Ca ku muenako cikupulo ca helu ca livulu Yoyenu mu Ndzolela ku Miaka Yose! Mu braile va i lombolola ngecize: “Umo yala enda mu imo tapalo ya ku li zenga-zenga kaha a mona miti ya cili, vintemo via cili na mincinda.” Jamshed ua pua kapuputa kaha uapua mukua ku kuasa vipanga ua handekele ngueni: “Cifua ci va lomboluelamo eci cikupulo, ce ku nji kaniamesa mua kama.

 Kaha mu nima ya ku lombolola vikupulo, mizimbu yaco ve ku i tuma ku viMbetele kuze ku ve ku tuhuila mikanda ya braile. Kaha mikanda yaco ve ku i tuhula na mapapelo aze ka eku tavuka ambe vene mu va ka a pangesa vantu kaha mu nima yaco ve ku pandakana mapapelo na ku a tuma hamo lika na mikanda i ve ku lomba vikungulukilo, mikanda yaco citava naua ku i tuma “ca ku hona ku fueta” nga vakua ku linga vipanga viaco ve ku tavesa ku lingamo. Kaha vi ntsimbu vimo viMbetele ve ku tuma mikanda ku vamuanetu va pua tupuputa ni kuli vamuanetu vaze ka ve ku tala vuino linga vakale na mikanda mu lukungulukilo.

 Mua vusunga vipanga viose evi ce ku tondeka ntsimbu na vimbongo. Kaha ntsimbu ye ku ambata grafica ya ku Wallkill, Nova Iorque linga i tupulule vi Mbimbiliya via kupua 50,000, i keyo ntsimbu ye ku ambata linga va tupulule mikanda i vali mu braile. Kaha nkala Mbimbiliya ya braile mu Ingles volume yayo yapua 25 kaha vikuata vie ku tondeka linga va tuhule vi Mbimbiliya via co, ndando yaco ya hilukilaho 123 ku tuvakana ndando ye ku tondeka linga va tuhule vi Mbimbiliya vikuavo. a Ca ku muenako, ndando ya cifuiko ca Mbimbiliya yaco yapua 150 mil dolares!

 Vati ve ku livua vaze ve ku kuasa ku vipanga viaco? Nadia ua kala ku Mbetele ya ku Afrika do Sul, ua handekele ngueni: “Vamuanetu na vandumbuetu va pua tupuputa, muono uavo ka ua puile ua uasi. Ngeci mukemuo kuli yange, ca pua civezikiso ca kama ku lingako mumo mu ku kuasa, kaha eci ca muesa ngecize Yehova ua lema mua kama vamuanetu vaco.”

 Vati honi nga kapuputa ka tantekeya ku tanda braille? Tua tuhula limo livulu uli na mutue Lilongesenu ku Tanda Braille. Mu livulu liaco mua kala masona a asi ku a tanda. Va lipangela ku kuasa muntu ua pua kapuputa ka tantekeya ku tanda na vukuasi vua muntu ue ku mona. Livulu liaco lia kala na tu vikuata tue ku asiuila ku soneka braille. Kaha muntu ali na ku lilongesa braille, ue ku pangesa vikuata viaco linga a hase ku soneka nkala ci sona, eci ce ku kuasa ku patekeya vi sona viaco kaha na ku a tantekeya vuino muze mua papateya.

 Vati eyi mikanda ili na ku kuasa cingi ca vamuanetu na va ndumbuetu vapua tupuputa ni ka ve ku mona vuino? Ernest ua kala ku Haiti, laza ka kele na mikanda mu braille linga a pangese ku viuano. Ngeci ua kulahelele lika vize via kele mu mutue ueni linga a hase ku linga mitamba ku viuano na ku hana vikumbululo, vunoni i vene ngueni: “Hano honi, citava nji kumbulule ntsimbu yose oyo i nji tonda. Nje ku livua honi mu hiehi na vamuanetu mu mavu ose ngecize tu vose tuli na ku tambula via kulia vimo lika!”

 Jan ua ku Áustria ua pua kapuputa kaha mukuluntu mu cikungulukilo, ue kuendesa cilongesa ca Vutala ua handekele ngueni: Mikanda yetu ya yasi ku ivuisisa ku tuvakana mikanda i kuavo ya braille i nja tandaho laza. Ca ku muenako, mafo aco a kala na vinumelu, matota a asi ku uana kaha a kala na mezi a vikupulo.”

 Seon-ok ua ku Coreia do Sul, ua pua pioneiro ua pua kapuputa kaha kaveve, laza ku viuano ua kele na ku hitukila ha vukuasi vua vakuavo linga va mu languluileko. Vunoni mu ntsimbu ino honi, ue ku tanda lika lieni mikanda mu Braille. Ivene ngueni: “Imo mikanda mu braille ka ya puile ya yasi ku i tanda, muomu ha kamba tumo tu vitoma, vipalo via ku henga ni omo lia mapapelo a ku pepuka cikuma, vunoni Vakeleho va Yehova ve ku pangesa mapapelo a cili ku mikanda yavo kaha na matoma eku soloka vuino. Eci ce ku asiuisa ku ku tanda.” Kaha ua vuezeleko naua ngueni: “Laza nja tondekele vukuasi vua vakuetu linga nji pangese mikanda mu ku lilongesa mu vulika, vunoni hano honi nje ku lilongesa lika liange. Mua vusunga, nje ku ivua ndzolela ya kama mu ku livuahesela viuano viose kaha na ku hana vikumbululo. Nje zilila honi ku tanda mikanda yose mu braille.”

 Mu mikanda yetu ya braille kaha na mikanda ikuavo, muakala mezi aa: Lino livulu kati lia ku landesa va lisonekela ku longesa vantu Mbimbiliya mu mavu ose. Evi vipanga ve ku vi lingila ku hitila mu milambu ya vuana, tua mi santsela mua kama ku milambu yenu i mue ku hana ku hitila mu donate.pr418.com. Milambu yenu ye ku kuasa vantu vose linga va kale na via kulia via mu lutsilielo hamolika na vaze va kala na citanga ca ku mona ni tupuputa.