Vakaleho va Yehova ve ku linga viuano viavo na ku kuasa vantu ve ku hita mu viyovo via mavu mu vifuti vi tuvakana 200. Vunoni vifuti 35 lika vikevio vie ku tambula milambu ya ku puamo mu ku tuala cipanga ku lutue. Vati honi ve ku fuetela vi tondeka mu vifuti via vuhutu?

 Civunga ca Vantuamena ce ku tala vi va tondeka vamuanaye mu lutsilielo mu mavu ose kaha na vipanga vi ve ku linga. Ntsimbu kanda va pangese milambu, ve ku hilula ha vati va hasa ku i pangesa vuino. Nga imo Mbetele i tambula milambu ya yingi ku tuvakana i va tondeka mu ku puisamo vipanga, ve ku hanako milambu yaco ku vifuti via ku kalekeya. Mu ku lingamo tue ku kava lungano lua Vakua Kilistu va ku livanga, vaze va kele na ku likuasa umo na mukuavo mu ku “puisa mumo.” (2 Kolintu 8:14) Va pangesele vi va kele navio mu ku kuasa vamuanaye va kele na via vindende.

 Vati ve ku livua vamuanetu ve ku tambula milambu ku tundilila ku vimbetele vikuavo? Ca ku muenako, cingi ca vantu va kala mu Tanzânia va pua vihutu, kaha milambu yaco va i pangesele mu ku tungulula Ndzivo ya Vuangana ya cikungulukilo ca Mafinga. Cikungulukilo caco ca sonekele nguaco: “Tunde ha va tunguluilile Ndzivo yetu ya Vuangana, vantu ve ku likungulula netu va na livuezelela! Tu santsela cikuma lukungulukilo lua Yehova na vamuanetu mu mavu ose omo lia vuhuanga vuavo. Va na tu kuasa tu kale na cihela ca cili ca ku lemesela.”

 Vamo vamuanetu mu Sri Lanka, vali mu ndzala omo lia musongo ua COVID-19. Umo ua vamuanetu vaco, ndumbuetu Imara Fernando na muaneni ua mundende Enosh. Ou ndumbuetu na muaneni va tambuile vukuasi vu va tondekele omo lia milambu ya vamuanetu va ku vifuti vieka. Ngeci va sonekele nguavo: “Tu santsela vamuanetu mu ku tu muesa cilemo mu ntsimbu ino ya ikalu. Mua vusunga, tue ku ivua ndzolela omo lia ku pua mutamba ua vusoko vua Njambi. Kaha tue ku tualelelaho ku vundila Yehova a kuase vamuanetu vakuavo, kuno ku matangua a ku kotokela.”

 Kuose-oko ku va kala vamuanetu, ve ku kuasa vakuavo na vize vi va kala navio. Ca ku muenako, Enosh ua pangele kacikasa a tulikilemo kambongo linga neni a hane mulambu mu ku kuasa masoko ali na ku tondeka vukuasi. Ndumbuetu Guadalupe Álvarez neni ua muesele cimbembesi caco. Ua kala ku Mexiku, kaha cingi ca vantu ka va kele na vimbongo ni mingoso ya ku likuasa nayo. Vutuhu ngoco, ue ku lambula vize vi a hasa. Tangua limo ua sonekelele ku Mbetele ngueni: “Nje ku santsela kuli Yehova omo lia ngozi na cilemo ceni. Nja tantekeya nguange milambu yange va ka i pandakana na milambu ya vakuetu na ku i pangesa mu ku kuasa vamuanetu va tondeka vukuasi.”

 ViMbetele vie ku tuma vimbongo ku vihela vi tondeka vukuasi, vie ku lingamo na ndzolela. Muanetu Anthony Carvalho, umo ua vakuluntu va ku Mbetele ku Brazil ngueni: “Mu miaka ya yingi, cipanga ca ku ambulula muno mu cifuti cetu, ca tondekele milambu ya ku vifuti vieka. Vukuasi vuaco vua kolesa mua kama cipanga cetu kuno. Ngeci lelo lino, netu honi tua liimanena kaha tue ku hasa ku kuasako vakuetu. Vamuanetu kuno ku Brazil ve ku tonda honi vinjila via ku kuaselamo cipanga cetu ku vifuti vieka.”

 Vati Vakaleho va Yehova va hasa ku kuasa vuino vamuanaye va ku kalekeya? Kati mu ku tuma mpundu vimbongo ku vifuti vieka, vunoni mu ku haka lika milambu mu cikasa ca vipanga vietu mu mavu ose. Kaha citava ku lingamo ku hitila mu cikasa ca milambu “Obra Mundial” ni mu donate.pr418.com. Tue ku santsela mua kama ku milambu yose.