Mu ku hita ca muaka ua vipanga ua 2021, a cingi ca vantu mu mavu ose va yandele na musongo ua COVID-19. Kaha ngue mu u na muesa muzimbu “Ku Kuasa Mavu Ose mu ku Hita ca Musongo” Vivunga via Vakua ku Kuasa via ku pua 950 va pangesele makulukazi a makulukazi a vimbongo b mu ku hana vukuasi vu tondeka ha ntsimbu yaco.

 Ca vusiua ku handeka nguetu, vamuanetu va kele na ku pinda na musongo ua covid-19, cingi cavo mu mavu ose va pindile naua na visoti vie ku koka viyovo via mavu. Ngeci mukemuo, ku tuvakana vimbongo vi va kele na ku pangesa mu ku kuasa vamuanetu ku musongo, va pangesele naua vimbongo via ku pua 8 milhões ya vidolar ku viyovo viaco. Talenu vati va pangesele vuino milambu yenu mu ku kuasa vamuanetu va hitile mu viyovo via mavu.

 Lia 22 ya Maio ya 2021, Muncinda Nyiragongo ku cifuti ca Congo ua tuikilile tuhia. Ku tuikilila caco ca nongesele vindzivo, visikola na vututukilo via mema. Kaha kati ovio lika. Mu nima ya ku tuikilila muncinda, mpumputa yaco ya nehele visoti via kama mu vimbonge via mu Goma kaha mavu a ningangele ku vihela via vingi. Cingi ca vantu va sezele vimbonge viavo kaha makulukazi a vantu va teuele ku cifuti ca ha hiehi ku Ruanda.

 Ha kati ka vantu va sezele membo avo, ha kele Vakaleho va Yehova va ku pua 5.000. Vamo vindzivo viavo via nongele na tuhia kaha vakuavo co, mu vindzivo viavo mua kovelele vambanditu. Vakua Ndzango ya Vakua ku Kuasa va mu Ruanda na ya mu Congo, va sekasianene ku pangela hamo mu ku kuasa vamuanetu. Ku tuala ha vamuanetu va ku Ndzango ya Vakua ku Kuasa, Mbetele ya mu Congo ya handekele nguayo: “Vutuhu omo lia visoti via vikalu kaha ambe tele nguvulu kanda i ci leke vantu va seze vimbonge, Vakua Ndzango ya Vakua ku Kuasa ya putukile ku tepela via kulia, mema, vizalo na mapai.” Kaha mu vimo via vimbonge, vamuanetu va ku pua 2.000 va likunguluile kaha Vakua ndzango ya Vakua ku Kuasa va tepelele tunguua linga vamuanetu va liniunge ku musongo ua COVID-19 na ku musongo ua kolera.

 Mu nima yaco, vamuanetu va hasele ku tepela vitonelada vituvakana 6 ya luoso, 6 ya vunga, 3 ya mazi a ku telekesa, kaha 3 ya mema mu vingonde vitatu lika. Kaha linga va hase ku zokotoueya vimbongo, Mbetele ya landele via kulia via vingi mu mbonge yaco vene ku tuvakana ku landela mu vimbonge vieka, muomu ndando yayo ye ku puile ya kama.

 Umo ndumbuetu ndzivo yeni ya nongele ku tuhia, ua handekele ngueni: “Tu omine mua kama mutima.” Vunoni mu nima yaco, vusoko vueni vua tambule vukuasi vua ku muvila na vua mu lutsilielo. Kaha ua vuezeleko naua ngueni: “Na vukuasi vua Yehova, na vimo vie ku tu kambela viahi. Tuli na ku mona mua vati Yehova ue ku ambata viteli vietu kaha na ku tu kuasa ku pinda na visoti viose evi.

 Tunde ha ku londa ca vindando mu Venezuela mua hiti honi miaka. Mua vusunga, muono ua vamuanetu u na kaluua mua kama. Ca ku muenako, via kulia via vindende kaha vambanditu va na ku livuezelela. Vunoni lukungulukilo lua Yehova ka lue ku suva ava vamuanetu.

 Ku kuhua ca muaka ua vipanga, tua pangesele vimbongo vi tuvakana 1.5 milhão ya vi dólare mu ku landa via kulia na njapau linga vi ka kuase vamuanetu. Muzimbu ua tundile ku Mbetele ya ku Venezuela nguao: “Vitonelada via ku pua 130 ya via kulia ka via puile via viasi ku vi tepela ku vifuti via ku pua viuana mu nkala ngonde kaha na ku vihetesa ku vamuanetu va tondeka vukuasi.” Kaha linga kati vivole, tua pandele ku kala na vusunga ngecize via kulia viaco vili na ntsimbu ya kama. Muzimbu uaco ua vuezeleko naua nguao: “Linga tu hase ku landa via kulia viaco na ndando ya cili, tua pandele ku landa via kulia via ntsimbu yaco kaha via vingi. Kaha tua hasele kututa via kulia viaco na makalu a ndando ya cili.”

 Muanetu Leonel, ua ku Ndzango ya Vakua ku Kuasa ku Venezuela, ua lema mua kama cipanga ceni ua handekele ngueni: “Ku pua mukua ndzango ya vakua ku kuasa capua ku vezika ca kama. Tunde ha na tsila mpueyange na musongo ua covid-19, vipanga viaco vie ku nji kaniamesa mua kama. Via ku linga mutumbo, kaha nje ku livua ngecize citava nji kuase vamuanetu vali na ku hita mu lamba. Kaha nje ku limuena na meso ange mpundu mua vati Yehova ue ku puisamo vikulaheso vieni ku tuala ha vangamba veni ngecize ka ka va seza na limo litangua liahi.”

 Umo ua vamuanetu ua pangelaho laza ku Ndzango ya Vakua ku kuasa neni va mu kuaseleho laza, ua handekele ngueni: “Ya hetele honi ntsimbu yange ya ku nji kuasa. Vukuasi vu tua tambuile, ka vua puile lika vua ku muvila, vunoni na vua mu lutsilielo. Kaha cikuavo naua, vamuanetu va kuasele mua kama mpueyange ku tula mutima kaha na ku tu lembezieka mua kama.”

 Vintsimbu via vingi, viyovo via mavu via tu tungumuine. Vunoni lukungulukilo lua Yehova lue ku hana vukuasi mu vuasi-vuasi, ku hitila mu milambu ya vamuanetu mu mavu ose. Kaha cingi ca milambu yavo ve ku i linga ku hitila mu saiti yetu donate.pr418.com. Tua santsela mua kama ku vuhuanga vuenu.