TUALELENUHO KU VINGILA!
Viuma vi Hasa ku tu Lingisa ku Kala na Lulavelelo mu 2023—Vika Mbimbiliya ya Handekaho?
Mu muaka uno ua uha ua 2023, tu vose tua lavelela viuma via cili kaha na ku vusoko vuetu. Omo lia vika tua pande ku kala na lulavelelo?
Mbimbiliya ye ku hana lulavelelo
Mu Mbimbiliya mua kala muzimbu ua cili ua muesa ngecize, visoti vi tue ku pinda navio via ka ntsimbu lika vuovuno va vi manusulako. Mua vusunga Mbimbiliya va i “sonekelele ku tu longesa, linga ku. . . ku-lembezieka via ku visoneka tu kale na ku lavelela.”—Loma 15:4.
Linga mu tantekeye naua vika Mbimbiliya ya kulahesa, talenu cimpande “Você pode acreditar num futuro melhor.”
Lulavelelo lu tu kuasa ntsimbu ino
Lulavelelo lua mu Mbimbiliya lua pua “ngue ngundzi ya muono uetu.” (VaHevelu 6:19) Lulavelelo lu hasa ku tu hana ndzili. Kaha naua, lu tu kuasa ku lua na visoti vietu na ku yoya mu ndzolela cipue mu ntsimbu ino vene. Ca ku muenako:
Nongononenu vati lulavelelo lua mu Mbimbiliya lua kuasele umo yala kulua na vilinga via ku pihia. Talenu video Cifua ca Muono Uange ca Nji Futukile.
Talenu vati lulavelelo lua mu Mbimbiliya lu hasa ku tu kuasa nga tua tsisa muntu u tua lema. Talenu video Mua ku Lembeziekela Vali mu Vusiua.
Kaniamesenu lulavelelo luenu
Vantu va vengi va lavelela viuma via cili, vunoni ka va kele na vusunga nga viuma vi va lavelela tangua vi ka lipuisamo mpundu. Vunoni viose vi ya kulahesa Mbimbiliya, tangua vi ka lipuisamo. Omo lia vika? Muomu vikulaheso via mu Mbimbiliya via fuma kuli Yehova Njambi a uze “ka hasa ku onga” (Tito 1:2) Yehova ua kala na ngolo ya ku puisamo via kulahesa; ikeye a hasa ku linga ‘Viose vi a na zange’—Visamo 135:5, 6.
Tua mi vundila linga mu uane vukuasi ku lulavelelo lua vusunga lua mu Mbimbiliya. Mu hasa ku kaniamesa lulavelelo luenu mu ku ‘hilula visoneka’ (Vilinga 17:11) Limuenenu yenu va vene mu ku kavangeya cilongesa ca vuana ca Mbimbiliya. Putukenu mu muaka ua 2023 ku kala na lulavelelo!
a Yehova lia pua lizina lia Njambi.—Visamo 83:18.