Lia 19 ya Maio ya 2022, vakua Segurança das Nações Unidas va tambuile mizimbu ku vantuamena va vifuti va ku tuvakana 75. Nguavo: Via kulia via kehele omo lia musongo ua COVID-19, ku aluluka ca vintsimbu kaha omo lia ndzita mu Ucrânia. Citanga caco cili na ku livuezelela mua kama. Kaha mu nima yaco vakua The Economist ua muesele ngecize: “Ndzita mu Ucrânia, ili na ku koka visoti via kama mu mavu ose, cikumakuma kuze kua kala kale vitanga via ndzala.” Vunoni Mbimbiliya ya polofetele kale ngecize kuno ku matangua etu a ku kotokela evi vie ku solokele.

•    Yesu ua polofetele ngueni: “Cifuti ci ka katukila cifuti, na vuangana ku vuangana; kaha ku ka kala ndzala.”—Mateo 24:7.

•    Mbimbiliya, mu livulu lia Ku-Solola ya handeka via vamala vauana vakua tuvalu va mu cimueso. Umo uavo uemanena ndzita. Kaha mukuavo uemanena ndzala. Ni nguetu, yemanena ku keha ca via kulia kaha na ku londa ca vi ndando viayo. Mbimbiliya nguayo: “Talenu, kavalu ua ku lava; na uze ua tumameneho ua kele na cipeseleso mu livoko lieni. Kaha nja vuile ngue lizi . .  ngualio, Njongo ya tiliku na lumbongo lua palata, na zinjongo zitatu zia sevanda na lumbongo lua palata; na mazi na viniu kati u vi pihise.”—Ku-Solola 6:5, 6.

 Ovu vupolofeto vuaco vua mu Mbimbiliya vua handeka ku tuala ha ku keha ca via kulia, vuli na ku lipuisamo ku matangua etu. Kaha Mbimbiliya ya tumbula matangua aco nguayo: “Matangua aze a ku kotokela.” (2 Timoteo 3:1) Linga mu tantekeye mizimbu ikuavo ku tuala ha matangua a ku kotokela kaha na via tuvalu vauana, talenu video “O Mundo Mudou Desde 1914” na cimpande “Vamala Vauana Vakua Tuvalu—Va pua Veya?”

•    Mu Mbimbiliya mua kala vimamuna via seho vize vi hasa ku tu kuasa nga tu hita mu visoti via ku linga na ha meso vui, ngeci mua ku londa ca vindando via via kulia, ni vene ku keha ca via kulia. Talenu amo malungano a mu cimpande “Como viver com menos dinheiro?””

•    Cikuavo naua, Mbimbiliya i hasa ku tu kuasa ku kala na lulavelelo ngecize ku lutue viuma tangua via ka aluluka. Ya kulahesa nguayo: “Ku ka kala ku-lana ca mbuto ha mavu” kaha vantu vose va ka kala na via kulia via ku puamo. (Visamo 72:16) Linga mu tantekeye vikuavo ku tuala ha lulavelelo lu ya hana Mbimbiliya kaha omo lia vika tua pande ku vi kulahela, talenu cimpande “Você pode acreditar num futuro melhor.”