Vantu kampe 5 bilhões vali na ku tala Bola ya mu Mavu Ose ya putukile lia 20 ya Novembro i kahua lia 18 ya Dezembro ya 2022. Vavengi nguavo, nga vantu va talela hamo lika bola yaco ci hasa ku va lingisa va livue nguavo va likuata kumo.

•   “Vueho vua kala na ngolo ya ku alulula mavu. Kaha vua kala na ngolo ya ku lingisa vantu va likuate kumo mu cifua ca ku lifuila.”—Nelson Mandela, ua puile presidente ku Africa do Sul.

•   “Bola ye ku lingisa vantu va likuate kumo muomu ye ku va lingisa va kale na lulavelelo, ndzolela, ku lilema umo na mukuavo, kaha na ku lingisa vantu va litombole mu viose.”—Gianni Infantino, presidente ua FIFA. a

 Vuno bola ye ku puisamo mpundu viuma viaco ni? Vuno vantu va hasa ku kala mu ciyulo na ku likuata kumo ni?

 Bola ya Mavu Ose ya muaka uno ya lingisa vantu ku singanieka nguavo kati bola ya ngoco, houe. Ili na ku lingisa vantu va simutuile via pulitika, kahangu, na ku honoua vimbongo.

 Vutuhu ngoco, vavengi va lema ku tala vueho vua mu vifuti ngeci mua Bola ya Mavu Ose. Vantu va tonda vueho vu va lingise ku likuata kumo, vunoni ka vu hasa ku lingamo mu ntsimbu ya kama. Mu cihela ca ku lingamo, vue ku koka matepeso na vilinga vi ya muesa Mbimbiliya nguayo vie ku solokele “ku matangua aze a ku kotokela.”—2 Timoteo 3:1-5.

 Mbimbiliya ya hana lulavelelo ku tuala ha ku likata ca vantu mu mavu ose. Ya kulahesa nguayo vantu vose hano ha mavu va ka likuata kumo mu nguvulu ya muilu i va tumbula nguavo “Vuangana vua Njambi.”—Luka 4:43; Mateo 6:10.

 Yesu Kilistu, Muangana ua Vuangana vua Njambi a ka linga cose mangana ha mavu ose ha ka kale ciyulo. Mbimbiliya nguayo:

•   “Mukua vuviuke a ka sokolokela, na ku-lana ca ciyulo.”—Visamo 72:7.

•   “[A kohiela] muhutu uze kesi na mukuasi . . . A ka kula muono uavo ku mapakeso na luozi.”—Visamo 72:12, 14.

 Ambe lelo lino, vilongesa via Yesu vili na ku kuasa makulukazi na makulukazi a vantu va likuate kumo. Kaha va lilongesa ku likela ku zinda vakuavo. Linga mu tantekeye vikuavo, tandenu cimpande ci li na mutue “Mua ku Manusuila Vizindo.”