TUALELENUHO KU VINGILA!
Vika Mbimbiliya ya Handeka ku Tuala ha Cilanga?
“Muzimbu ua ku China nguauo muaka uno kuli ntuima ya kama ku hiana miaka i na hiti.”—The Guardian, 7 ya Setembro ya 2022.
“Vimo vifuti mu Africa vi hasa ku hita mu cilanga mu miaka itanu.”—Mizimbu ya vakua Nações Unidas, 26 ya Agosto ya 2022.
“Vimo vifuti mu Europa vili mu vusonde vua ku hita mu cilanga. Cilanga caco citava ci ka pua ca kama cikuma ku hiana vikuavo viose via keleko mu miaka 500.”—Mizimbu ya vakua BBC, 23 ya Agosto ya 2022.
Vakua ku lilongesa vavengi nguavo cilanga caco ci ka tualelelaho ku livuezelela. Vuno viuma vi ka vuaha ku lutue ni? Vika Mbimbiliya ya handekaho?
Cilanga na Vupolofeto vua mu Mbimbiliya
Mbimbiliya ya polofetele viuma vili na ku soloka lelo lino:
“Ku ka kala . . . Ndzala . . . kueka na kueka.”—Luka 21:11.
Vintsimbu via vingi, cilanga ce ku koka ndzala. Kaha visoti ngeci mua lamba na ku tsa, vili na ku puisamo vupolofeto vua mu Mbimbiliya.— Ku-Solola 6:6, 8.
Omo lia vika cilanga cili na ku li vuezelela
Mbimbiliya ya muesa omo lia vika cilanga cili na ku li vuezelela. Nguayo:
“Ka muesi muli muntu mukua ku enda ku liinikila vinanga vieni.”—Yelemiya 10:23.
Evi via lomboloka ngecize vantu ka va hasa “ku liinikila vinanga [viavo],” ni nguetu, ka va hasa ku lisika vakevo vavene. Ngeci mukemuo, vihangula viavo via vipi vie ku koka cilanga.
Vakua siensia vavengi nguavo vipanga via vantu vie ku pihisa mavu, omo liaco ve ku vuezelela cilanga mu mavu ose.
Vilinga via vakua lizangamena na vakua ku linga viuma ca ku hona ku singanieka ku lutue, vie ku koka ku nonga ca misenge, ku pihisa mavu, na ku hona ku pangesa vuino vupite vua mavu. Omo liaco, ve ku pihisa ku tue ku uana mema.
Vunoni Mbimbiliya ya tu hana lulavelelo.
Vuno viuma vi ka vuaha ku lutue ni?
Mbimbiliya nguayo Njambi a ka manusulako citanga ca mema. Vati a ka lingamo?
1. Njambi a ka “enieka vaze venieka mavu.” (Ku-Solola 11:18) A ka nongesa vose ve ku pihisa ku tue ku uana mema. Vakua vupi na vakua lizangamena vaze ve ku pihisa mavu va ka va nongesa.—2 Timoteo 3:1, 2.
2. “Na museke ua ku viazima u ka himpuka cisali.” (Isaya 35:1, 6, 7) Njambi a ka fumisako visoti vi ye ku koka cilanga na ku puisa ano mavu citungu, muze mu ka kala mema a engi.
3. “U hinduisa mavu na ku a tukumuina, u a fukisa cikuma.” (Visamo 65:9) Na vivezikiso via Njambi, vantu vose va ka kala na via kulia na mema a cili.