Mu miaka 30 i na hiti, vantu vavengi va muene ngue ha kele ku litavasiana ca vifuti via vingi kaha ha kele ku livuasiana ha kati kavo. Vunoni viuma vili na ku soloka ku matangua ano via muesa ngecize ka via puile vusunga.

•   “Vantu vali na kuivua liova lia ndzita ya ku Gaza, nguavo i hasa ku kuata ku vifuti vikuavo vi va lihatela, muomu Isaleli na Hezbollah ve ku liluisa ku mukuakua ua ku Líbano.”—Reuters, 6 ya Janeiro ya 2024.

•   “Civunga ca masualale ca ku Irã, ci li na kulua ndzita ku vihela vikuavo via vingi kaha Irã ili na panga naua matendangonge ni mata a hasa ku nongesa vantu mu mavu ose. Cikuavo naua, Russia na China vali na ku pangela hamo na Irã. Viose evi vili na ku pua vusonde ku vifuti via ku cihava ca ku Irã.”—The New York Times, 7 ya Janeiro ya 2024.

•   “Russia, ili na ku tualelelaho papuola na ku neha visoti via kama ku Ucrânia yose.”—Mizimbu ya vakua Nações Unidas 11 ya Janeiro ya 2024.

•   “Ku livuezelela ca vupite mu China, ndzili ya masualale vavo na ku lihalesa ca Taiwan ce ku lingisa China ku liluisa na Estados Unidos. Kaha evi hasa ku katula ndzita ha kati kavo.”—The Japan Times, January 9, 2024.

 Vuno Mbimbiliya ya handeka ku tuala ha viuma vili na ku soloka lelo lino ni? Vuno evi vi hasa naua ku koka ndzita ya mu mavu ose ni?

 Mbimbiliya ka ya handekele mpundu ha mazina a vindzita vi tuli na ku mona lelo lino. Vunoni ya polofetele ku tuala ha ndzita ili na ku tundisa “ciyulo ha mavu.”—Ku-Solola 6:4.

 Livulu lia Ndaniele lia polofetele naua ngualio ku “ntsimbu ya ku kotokela,” vamiangana va kala na ngolo ya kama mu mavu va ka ‘likatukila’ na ku lizunga, iya na pande ku tumina mavu ose. Kaha evi vie ku va lingisa ku panga matendangonge na ku pangesa “vupite” vua vuingi.—Ndaniele 11:40, 42, 43.

 Mbimbiliya ya handeka nguayo visoti vi ka livuezela kaha mu nima yaco, vi kahuako. Yesu ua handekele naua ngueni ‘ku ka kala lamba ya kama ya ku linga kanda ici kaleko tunde ha ku tanga ca mavu.’ (Mateu 24:21) Mu nima ya kuhua ca lamba ya kama ku keza ndzita ya Alemangendo. Kaha ndzita yaco ya pua “ndzita ya litangua lia kama lia Njambi, Mukua ngolo yose.”—Ku-Solola 16:14, 16.

 Vunoni Alemangendo i kohiela vantu vakua kuononoka. Kaha ku hitila mu ndzita eyi, Njambi a ka nongesa mavuangana a vantu ali na ku koka vindzita via vingi mu mavu ose. Linga mu tantekeye vati Alemangedo i ka neha ciyulo ca ya-ye mu mavu ose, tandeni vimpande vi na hatako:

•   “Ndzita ya Alemangendo ya pua Ika?”

•   “Tu Lavelelenu Alemangendo na Ndzolela!”