TUALELENUHO KU VINGILA!
Iya a Kovola vaze ka ve ku Likovelesa mu via Ndzita?—Vika Mbimbiliya ya Handekaho?
Vakua Estados Unidos va handekele nguavo:
Ku putuka lia 7 ya Outubro ku tuala 23 ya Outubro ya 2023, vantu va ku pua 6.400 va tsile ku ndzita kaha 15.200 va vulumukile mua kama, vunoni cingi cavo va puile vaze ka va likovelesele mu via ndzita. Kaha makulukazi a vantu va va sindiyile ku seza vindzivo viavo.
Ngue mu via solokele lia 24 ya Setembro ya 2023, vantu va ku 9.701 va tsile mu ndzita ya Russia na Ucrania kaha cingi cavo va puile vaze ka va likovelesele mu via ndzita. Vunoni vantu va ku pua 17.748, va vulumukile mua kama.
Mbimbiliya ya hana lulavelelo luka kuli vaze ve ku yanda omo lia ndzita?
Vusunga vu tu lingisa ku kala na lulavelelo
Mbimbiliya ya polofetele laza ngecize Njambi a ka “lingisa zindzita ku likela na haze ha lenga mavu.” (Visamo 46:9) Ku hitila mu vuangana vueni vua muilu, ni nguetu muangana, a ka nongesa mavuangana ose a vantu. (Ndaniele 2:44) Vuangana vua Njambi vu neha muono ua cili.
Tu talenu vika Yesu Kilistu, Muangana ua Vuangana vua Njambi a ka linga:
“Ikeye a kohiela mukua ku zela omo tambeka, na muhutu uze kesi na mukuasi. A ka tetela vahutu na vakua ku zela, na miono ya vakua ku zela a ka i ohiela. A ka kula muono uavo ku mapakeso na luozi.”—Visamo 72:12-14.
Eci cilomboloka ngecize ku hitila mu Vuangana vueni, Yehova a ka manusulako vuhutu mu vutuntu kaha na lamba i ye ku koka ndzita na luozi.
“A ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala: viuma via ku livanga vi na hiti.”—Ku-Solola 21:4.
Vuovuno Vuangana vua Njambi vu alulula mavu. Vi ya polofetele Mbimbiliya ku tuala ha vindzita, tuli na ku vi mona vi li na ku soloka lelo lino. (Mateo 24:6) Ku tuala hali evi na viuma vikuavo vi li na ku soloka, vi li na ku muesa ngecize tuli na ku yoyela ku “matangua a ku kotokela.”—2 Timoteo 3:1.